ብ24 ጥሪ 2023፡ ስነ ፍልጠተኛታት ንሰዓት መዓልቲ ጥፍኣት a ናብ ፍርቂ ለይቲ ኣቕሪቦምዋ፣ ከምኡ ዝገበሩ ድማ ናብ መወዳእታ ዓለም ከም ዝቐረብና ንምምልካት ተባሂሉ እዩ።

•   “እታ ብምሳልያዊ መገዲ ንጥፍኣት ወዲ ሰብ እተመልክት ‘ሰዓት መዓልቲ ጥፍኣት’ ኣብ መንጎ ውግእ ዩክረይንን ኑክልየሳዊ ውጥረትን ቅልውላው ኵነታት ኣየርን፡ ኣብ ሰሉስ ናብ ፍርቂ ለይቲ ኻብ ቅድሚ ሕጂ ብዝያዳ ኸም እትቐርብ ተገይራ ኣላ።”—ኤ.ኤፍ.ፒ. ኢንተርናሽናል ተክስት ዋየር።

•   “ኣብ ሰሉስ፡ ስነ ፍልጠተኛታት ነታ ‘ሰዓት መዓልቲ ጥፍኣት’ ንፍርቂ ለይቲ 90 ኻልኢት ጐደል ገይሮምዋ ኣለዉ፣ እዚ ድማ ወዲ ሰብ ናብ ኣርማጌዶን ካብ ቅድሚ ሕጂ ብዝያዳ ኸም እተጸግዐ የመልክት።”—ኤ.ቢ.ሲ. ኒውስ።

•   “ጕጅለ ኣህጉራውያን ስነ ፍልጠተኛታት፡ ህልውና ወዲ ሰብ ካብ ቅድሚ ሕጂ ብዝያዳ ኣብ ዝኸፍአ ሓደጋ ኸም ዘሎ ኣጠንቂቖም።”—ዘ ጋርድያን።

 መወዳእታ ወዲ ሰብን ምድርናን ይቐርብ ድዩ ዘሎ፧ ኣብ መጻኢ ብዛዕባ ዚኸውን ነገራት ክንፈርህ ኣሎና ድዩ፧ መጽሓፍ ቅዱስ እንታይ ይብል፧

 መጽሓፍ ቅዱስ፡ “ምድሪ . . . ንዘለኣለም ትነብር” እዩ ዚብለና፣ ብዘይካዚ ድማ፡ ሰባት “ኣብኣ . . . ንዘለኣለም ኪነብሩ እዮም” ይብለና። (መክብብ 1:4፣ መዝሙር 37:29) ስለዚ፡ ሰባት ንምድሪ ኣይኬጥፍእዋን እዮም፣ ወይ ከኣ ንምልእቲ ፕላነትና፡ ህይወታውያን ኪነብሩላ ዘይክእሉ ኣይኪገብርዋን እዮም።

 ኰይኑ ግና፡ መጽሓፍ ቅዱስ ብዛዕባ መወዳእታ ብርግጽ ይገልጽ እዩ። ንኣብነት፡ “ዓለም . . . ትሓልፍ እያ ዘላ” ይብል እዩ።—1 ዮሃንስ 2:17።

•   መጽሓፍ ቅዱስ ብዛዕባ መወዳእታ ዓለም ኪዛረብ ከሎ እንታይ ማለቱ ምዃኑ ንምፍላጥ፡ “መወዳእታ ዓለም ይመጽእ ድዩ ዘሎ፧ ኣፖካሊፕስ እንታይ እዩ፧” ዘርእስታ ዓንቀጽ ኣንብብ።

•   መጽሓፍ ቅዱስ ብዛዕባ እቲ ኣብ መጻኢ ኣብ ዓለም ዚኸውን ነገራት እንታይ ከም ዚብል ንምፍላጥ፡ “መወዳእታ ዓለም መዓስ እዩ፧” ዘርእስታ ዓንቀጽ ኣንብብ።

 ኣብ ዓለምና ጸገማት እናሃለወ ኽነሱ፡ መጽሓፍ ቅዱስ ግና ኣወንታዊ ኣረኣእያ ኽንሕዝ ይሕግዘና እዩ። ብኸመይ፧

•   መጽሓፍ ቅዱስ ግብራዊ ምኽሪ ይህበና እዩ። (2 ጢሞቴዎስ 3:16, 17) ንኣብነት፡ ኣብ ህይወት ጸገማት እናኣጋጠመና ኽነሱ፡ ብኸመይ ኣወንታውያን ከም እንኸውን ንምፍላጥ፡ “ጭንቀት—ብኸመይ ትቈጻጸሮ፧” ዘርእስታ ዓንቀጽ ኣንብብ።

•   መጽሓፍ ቅዱስ ብዛዕባ መጻኢ ዜተኣማምን ተስፋ ይህብ እዩ። (ሮሜ 15:4) ሕጅን ኣብ መጻእን እንታይ ክንጽበ ኸም እንኽእል ብልክዕ ይሕብረና እዩ፣ እዚ ኸኣ ነዚ ኣብ ዓለም ዚኸውን ዘሎ ነገራት እኳ እናረኣና፡ ከይተጨነቕና ኽንመላለስ የኽእለና።

 ካብ መጽሓፍ ቅዱስ ብዝያዳ ምእንቲ ኽትጥቀም፡ ነቲ ብናጻ ዝቐረበ ብሓገዝ መምህር ዚግበር መጽናዕቲ መጽሓፍ ቅዱስ ክትፍትኖ ንዕድመካ።