ዓለም ብብዝሒ ፖለቲካዊ ዓመጻ ተዋሒጣ ኣላ።

•   ብ እዋን መረጻ 2023-2024፡ ኣብ መክሲኮ ቕድሚ ሕጂ ተራእዩ ዘይፈልጥ፡ ኣብ ልዕሊ 39 ሕጹያት ፖለቲከኛታት ዝለዓለ ቝጽሪ ፈተነ ቕትለትን ካልእ ዓይነት ፖለቲካዊ ዓመጻን ኣጋጢሙ፣ እዚ ድማ ንሰባት ኣሰምቢድዎም እዩ።

•   ኣብ ኤውሮጳ፡ ብ15 ግንቦት 2024፡ ፈተነ ቕትለት ቀዳማይ ሚኒስተር ስሎቫክያ ሓዊስካ፡ ካልእ ፖለቲካዊ ዓመጻ ኣጋጢሙ እዩ።

•   ብ13 ሓምለ 2024፡ ኣብ ልዕሊ ፕረዝደንት ነበር ዶናልድ ትራምፕ ዘጋጠመ ፈተነ ቕትለት፡ ንሕቡራት መንግስትታት ኣመሪካ ኣሰንቢድዋ እዩ።

 ፖለቲካዊ ዓመጻ ዚበዝሕ ዘሎ ስለምንታይ እዩ፧ የኽትምዶኸ ይኸውን፧ መጽሓፍ ቅዱስ እንታይ ይብል፧

 መጽሓፍ ቅዱስ ኣብ ግዜና፡ ማለት ኣብ “ዳሕሮት መዓልትታት፡” ብዙሓት ሰባት ናይ ዓመጻን ናይ ዘይምስምማዕን ዝንባለ ኸም ዜማዕብሉ ተነብዩ ነይሩ።

•   “ኣብተን ዳሕሮት መዓልትታት ጽንኩር ግዜ ኸም ዚመጽእ ግና፡ እዚ ፍለጥ። ሰባትሲ . . . ዘየመስግኑ፡ ዘይእሙናት፡ . . . ንስምምዕ ፍቓደኛታት ዘይኰኑ፡ . . . ጨካናት፡ . . . ጠላማት፡ ነቓጻት፡ ብትዕቢት እተነፍሑ . . . ኪዀኑ እዮም።”—2 ጢሞቴዎስ 3:1-5።

 መጽሓፍ ቅዱስ ኣብዚ ግዜና ኸም ናዕብን ፖለቲካዊ ቅልውላውን ዝኣመሰለ ህውከት ከም ዜጋጥም እውን ተነብዩ ነይሩ እዩ። (ሉቃስ 21:9፡ እ.ጽ.) ይኹን እምበር፡ ፖለቲካዊ ዓመጻን ክፍፍልን ንሓዋሩ ኺጠፍእ እዩ።

 መጽሓፍ ቅዱስ፡ ኣምላኽ ንዅለን ሰብኣውያን መንግስትታት ብሰማያዊት መንግስቱ ኸም ዚትክአን ይገልጽ።

•   “ኣምላኽ ሰማይ . . . መንግስቲ ኬቕውም እዩ። . . . [መንግስቱ] ንዅለን እዘን መንግስትታት እዚአን ክትሕምሽሸንን ከተጥፍአንን እያ።”—ዳንኤል 2:44።

 መንግስቲ ኣምላኽ ናይ ሓቂ ሓድነትን ዓለምለኻዊ ሰላምን ከተስፍን እያ።

•   እቲ ገዛኢ የሱስ ክርስቶስ፡ ስሙ “መስፍን ሰላም ኪብሃል እዩ፣” ከምኡ እውን፡ “ንሰላሙ መወዳእታ ኣይኪህልዎን እዩ።”—ኢሳይያስ 9:6, 7።

•   ዋላ ሕጂ እውን፡ ተገዛእቱ ብኸመይ ብሰላም ከም ዚነብሩ ይምሃሩ ኣለዉ። ከም ውጽኢቱ ድማ፡ መጽሓፍ ቅዱስ “ኣስያፎም ቀጥቂጦም ማሕረሻታት፡ ኲናውቶም ከኣ ገዘሞታት ኪገብሩ እዮም። ህዝቢ ኣብ ህዝቢ ሰይፊ ኣይኬልዕልን እዩ፣ ደጊም እውን ውግእ ኣይኪምሃሩን እዮም” ይብል።—ኢሳይያስ 2:3, 4።

 ዝያዳ ሓበሬታ ንምርካብ፡ “መንግስቲ ኣምላኽ እንታይ ክትገብር እያ፧” ዘርእስታ ዓንቀጽ ኣንብብ፣ ከምኡ እውን፡ መንግስቲ ኣምላኽ እንታይ እያ፧ ዘርእስታ ቪድዮ ርአ።