ኣብ 2022፡ ውግእን ቍጠባዊ ጸገማትን ኣከባብያዊ ዕንወትን ኣብ ማዕከናት ዜና ይቃላሕ ነይሩ። እዚ ፍጻመታት እዚ ሒዝዎ ዘሎ ትርጉም፡ ኣብ መጽሓፍ ቅዱስ ጥራይ እዩ ኺርከብ ዚከኣል።

እቲ ብ2022 እተኸስተ ፍጻመታት ሒዝዎ ዘሎ ትርጉም

 እቲ ኣብ ዝሓለፈት ዓመት እተኸስተ ፍጻመታት፡ ኣብቲ መጽሓፍ ቅዱስ “ዳሕሮት መዓልትታት” ኢሉ ዚጽውዖ እዋን ንነብር ከም ዘለና ዜራጕድ ተወሳኺ መርትዖ እዩ። (2 ጢሞቴዎስ 3:1) እቲ እዋን እቲ፡ ብ1914 እዩ ጀሚሩ። እዚ ኣብ ቀረባ ግዜ እተኸስተ ፍጻመታት፡ ከምቲ መጽሓፍ ቅዱስ እተነበዮ ምዃኑ እስከ ንርአ፦

 “ውግእ።”—ማቴዎስ 24:6።

•   “2022 ዜስካሕክሕ ውግእ ናብ ኤውሮጳ ተመሊሱ ዝመጸላ ዓመት እያ ነይራ።” a

 “ጥሜት።”—ማቴዎስ 24:7።

•   “2022፦ ተራእዩ ዘይፈልጥ ጥሜት እተኸስተላ ዓመት።” b

 “ለበዳ።”—ሉቃስ 21:11።

•   “ፖልዮ ተመሊሱ ብምምጻኡ፡ ማንኪፖክስ ብምስፍሕፋሑ፡ ኮቪድ-19 እውን ብዙሕ ጥፍኣት ብምስዓቡ፡ ተመሓላላፊ ሕማማት ኣስጋኢ ኸም ዝዀነን ደቂ ሰብ ኣብ ሰንኮፍ ከም ዘለዉን ኣርእዩ።” c

 “መፍርህታት።”—ሉቃስ 21:11።

•   “ማዕበላት ሙቐት፡ ደርቂ፡ ባርዕ መሮር፡ ምዕልቕላቕ ማይ። ሓጋይ 2022 በቲ ኣብ ብዘላ ዓለም ጥፍኣት ዘምጽአ፡ ኣማእታት ኣሽሓት ህይወት ዘህለቐ፡ ንሚልዮናት እውን ዘመዛበለ ሕማቕ ኵነታት ኣየር እዩ ኺዝከር።” d

 “ህውከት [ወይ፡ “ናዕቢ፡” እ.ጽ.]።”—ሉቃስ 21:9።

•   “ቍጠባዊ ጸገማት፡ ምናዳ ኸኣ እቲ ሰማይ ዚዓርግ ዘሎ ዝቕባበ ዝፈጠሮ ቝጥዓ፡ ነቲ ኣንጻር መንግስቲ ዚልዓል ተቓውሞታት ብ2022 ናብ ዝለዓለ ደረጃ ኣብጺሕዎ እዩ።” e

ኣብ እትቕጽል ዓመት እንታይ ኪኸውን እዩ፧

 ብ2023 እንታይ ከም ዚኸውን ርግጸኛ ዀይኑ ኺዛረብ ዚኽእል ዋላ ሓደ የልቦን። እታ ሰማያዊት መንግስቲ ዝዀነት መንግስቲ ኣምላኽ ኣብ ቀረባ ግዜ ኣብ ጕዳያት ምድሪ ጣልቃ ኸም እትኣቱ ግና ንፈልጥ ኢና። (ዳንኤል 2:44) እታ መንግስቲ እቲኣ፡ ጠንቂ መከራ ደቂ ሰብ ከተወግድ፡ ፍቓድ ኣምላኽ ኣብ ምድሪ ኸም ዚኸውን እውን ከተረጋግጽ እያ።—ማቴዎስ 6:9, 10።

 እምበኣር፡ ነቲ “ንቕሑ” ዚብል የሱስ ክርስቶስ ዝሃቦ ምኽሪ ብምስዓብ፡ ነዚ ኣብ ዓለም ዚኽሰት ዘሎ መፈጸምታ ትንቢታት መጽሓፍ ቅዱስ ብንቕሓት ክትከታተል ንምሕጸነካ። (ማርቆስ 13:37) መጽሓፍ ቅዱስ ሕጂ ብኸመይ ኪሕግዘካ ኸም ዚኽእል፡ ብዛዕባ መጻኢ እውን ንዓኻን ንቤተ ሰብካን እንታይ ናይ ሓቂ ተስፋ ሒዙ ኸም ዘሎ ንምፍላጥ፡ ናባና ኽትጽሕፍ ነተባብዓካ።