ስሩዕ ፈላሚ ኽትከውን እንተ ደሊኻ፡ ጽቡቕ መደብ ኪህልወካ ኣለዎ። ኣብ ሰሙን 18 ሰዓት ተገልግል እንተ ዄንካ፡ ፈላሚ ኽትከውንን ናይ ዕረፍቲ ግዜ ኽትረክብን ትኽእል ኢኻ። እዚ መደብ እዚ፡ ከም ሕማምን ሕማቕ ኵነታት ኣየርን ንዝኣመሰለ ዘይተሓስበ ዕንቅፋታት ክትሰግር እውን ኪሕግዘካ ይኽእል እዩ። እዚ ኣብዛ ዓንቀጽ እዚኣ ቐሪቡ ዘሎ ሰሌዳ፡ ናይ ክፍለ ግዜ ወይ ናብ ምሉእ ግዜ ስራሕ ንዚሰርሑ፡ ጥዕና ንዘይብሎም ወይ ድሩት ዓቕሚ ንዘለዎም ዚኸውን መደባት ሒዙ ኣሎ። ሓደ ኻብ ኣባላት ስድራ ቤትካ ገለ ምትዕርራያት ብምግባር፡ ካብ መስከረም ጀሚሩ ፈላሚ ኪኸውን ይኽእል ይኸውን። ኣብ ዚቕጽል ኣምልኾ ስድራ ቤትኩም ብዛዕባ እዚ ኽትመያየጡ ትኽእሉ ኢኹም።