ኣገዳሲ ዝዀነ ስለምንታይ እዩ፧ ብሕታዊ መጽናዕቲ ቓል ኣምላኽ፡ ናይ ሓቂ ‘ግፍሑን ንውሓቱን ቍመቱን ዕምቈቱን እንታይ ምዃኑ ምሉእ ብምሉእ ከነስተውዕል’ ይሕግዘና። (ኤፌ 3:18) ብዘይካዚ፡ ኣብ ማእከል እዛ እክይቲ ዓለም፡ መንቅብ ዘይብልናን ኣበር ዘይብልናን ክንከውን፡ ከምኡ እውን ‘ነቲ ቓል ህይወት ኣጽኒዕና ኽንሕዞ’ ይሕግዘና። (ፊል 2:15, 16) ብሕታዊ መጽናዕቲ ቓል ኣምላኽ ነቲ ብውልቂ ዜድልየና ነገራት ክንመርጽ የኽእለና። ካብ ንባብን መጽናዕቲ መጽሓፍ ቅዱስን ብዝያዳ ምእንቲ ኽንጥቀም እንታይ ክንገብር ንኽእል፧

እንታይ ክትገብር ኣሎካ፧

• ኣብ መጽሓፍ ቅዱስካ ንዚርከብ ጥቕስታት ኣስምረሉን መዘኻኸሪ ጽሓፈሉን፣ እዚ ድማ ኣብ እተሓትመ ወይ ኣብ ኤለክትኖኒካዊ መሳርሒ ዚርከብ ኪኸውን ይኽእል እዩ

• ቃል ኣምላኽ ከተንብብ ከለኻ፡ ንርእስኻ ነዚ ዚስዕብ ሕቶታት ሕተታ፦ ‘መን፧ እንታይ፧ መዓስ፧ ኣበይ፧ ስለምንታይ፧ ብኸመይ፧’

• ቅኑዕ ሓበሬታ ርኸብ። ንምርምር ብዚሕግዝ ናውቲ ጌርካ ብኣርእስቲ ወይ ድማ ብጥቕስታት መጽሓፍ ቅዱስ ምርምር ግበር

• እቲ ሓበሬታ ንዓኻ ብኸመይ ከም ዚጠቕመካ ንምስትውዓል ነቲ ዘንበብካዮ ኣስተንትነሉ

• ነቲ እተምሃርካዮ ኣብ መዓልታዊ ህይወትካ ተግብሮ።—ሉቃ 6:47, 48

ነታ ‘ኣጽኒዕካ ሓዝ’—ብውጽኢታዊ ብሕታዊ መጽናዕቲ ዘርእስታ ቪድዮ ርኣያ እሞ፡ ድሕሪኡ ነዚ ዚስዕብ ሕቶታት መልሶ፦

• ገሊኦም ንብሕታዊ መጽናዕቲ ብኸመይ ይገልጽዎ፧

• ብሕታዊ መጽናዕቲ ቕድሚ ምጅማርና፡ ኵሉ ሳዕ ክንጽሊ ዘሎና ስለምንታይ ኢና፧

• ንሓደ ኽፋል መጽሓፍ ቅዱስ ብዝያዳ ምእንቲ ኽንርድኦ እንታይ ኪሕግዘና ይኽእል፧

• ኣብቲ ንመጽናዕቲ እንጥቀመሉ መጽሓፍ ቅዱስና፡ ከመይ ዝበለ ምልክታት ክንገብር ንኽእል፧

• ቃል ኣምላኽ ኣብ እነጽንዓሉ እዋን፡ ምስትንታን ኣዝዩ ኣገዳሲ ዝዀነ ስለምንታይ እዩ፧

• ነቲ እተምሃርናዮ ብኸመይ ክንጥቀመሉ ንኽእል፧