የሱስ፡ ብፍላይ ፈተናታት ወይ መስጐጕቲ ኼጋጥመና ኸሎ ኽንስዕቦ ዘሎና ኣብነት ሓዲጉልና እዩ። (1ጴጥ 2:21-23) የሱስ ኪጽረፍን መከራ ኺወርዶን ከሎ እውን ከይተረፈ ሕነ ኣይፈደየን። (ማር 15:29-32) ኪጻወር ዝሓገዞ እንታይ እዩ፧ ፍቓድ የሆዋ ኺፍጽም ቈሪጹ ስለ ዝነበረ እዩ። (ዮሃ 6:38) ብዘይካዚ፡ ኣብቲ “ኣብ ቅድሚኡ ዘሎ ሓጐስ” ኣተኲሩ ነበረ።—እብ 12:2።

ብምኽንያት እምነትና ምስ እንግፋዕ፡ እንታይ ዓይነት ምላሽ ኢና ኽንህብ ዘሎና፧ ናይ ሓቂ ክርስትያናት፡ ‘ክፉእ ኣብ ክንዲ ኽፉእ ኣይፈድዩን’ እዮም። (ሮሜ 12:14, 17) ነቲ ክርስቶስ መከራ እተጻወረሉ መገዲ እንተ ቐዲሕናዮ ኽንሕጐስ ንኽእል ኢና፣ ከመይሲ፡ ሞገስ ኣምላኽ ኣሎና።—ማቴ 5:10-12፣ 1ጴጥ 4:12-14።

ነታ ስም የሆዋ ኣዝዩ ኣገዳሲ እዩ ዘርእስታ ቪድዮ ርኣያ እሞ፡ ድሕሪኡ ነዚ ዚስዕብ ሕቶታት መልሶ፦

• ሓብትና ገርትሩት ፖይትሲንገር ንበይና ኣብ ሓንቲ ኽፍሊ ተኣሲራ ኣብ ዝነበረትሉ እዋን ንግዜኣ ብጥበብ እተጠቐመትሉ ብኸመይ እያ፧

• ሓውና ማርቲን ፖይትሲንገርን ሓብትና ገርትሩት ፖይትሲንገርን ኣብ እተፈላለየ መዳጐኒ ደምበታት ኣብ ዝነበሩሉ እዋን ከመይ ዝበለ መከራ እዮም ተጻዊሮም፧

• ኪጻወሩ ዝሓገዞም እንታይ እዩ፧