ካብ 2018 ኣትሒዙ፡ እቲ ንህዝቢ ዚሕተም መጽሔታትና፡ ምልእቲ መጽሔት ኣብ ሓደ ርእሰ ነገር ጥራይ ከም እተተኵር ጌርካ እዩ ዚዳሎ። ኵሉ እዚ መጽሔታት እዚ፡ ክፋል ናውቲ ትምህርትና እዩ። ስለዚ፡ ኣብ ኣገልግሎት ክንጥቀመሉ ንኽእል ኢና። ብዘይካዚ፡ ክንጓዓዝ ወይ ንዕዳጋ ኽንወርድ ከለና እተወሰነ መጽሔታት ክንሕዝ ንኽእል ኢና። መጽሔታትና መጽናዕቲ መጽሓፍ ቅዱስ ከተጀምር ተባሂሉ እተዳለወ እኳ እንተ ዘይኰነ፡ ንሰባት ኣብ መንፈሳዊ ነገራት ከም ዚግደሱ ኺገብሮም ይኽእል እዩ።

ምስ ሓደ ሰብ ዝርርብ ድሕሪ ምጅማርካ፡ ኣብ ዜገድሶ ጕዳይ ዘተኰረ ጥቕሲ መጽሓፍ ቅዱስን ካብ መጽሔታትና ኸኣ ሓደ ርእሰ ነገርን ጥቐሰሉ። ንኣብነት፡ ስድራ ቤት ዚናቢ እንተ ዀይኑ፡ ወይ ከኣ ሓዘን እንተ ኣጋጢምዎ ወይ ጭንቀት እንተ ኣልይዎ፡ ከምዚ ኽትብሎ ትኽእል ኢኻ፦ “ኣብዚ ቐረባ እዋን፡ ብዛዕባ እዚ ጕዳይ እዚ እትገልጽ ዓንቀጽ ኣንቢበ ነይረ። ነታ ዓንቀጽ ከርእየካዶ፧” እቲ ሰብ ተገዳስነት እንተ ኣርእዩ፡ ኣብ ናይ ፈለማ ምብጻሕ እውን እንተ ዀነ፡ ነታ መጽሔት ክትህቦ ወይ ከኣ ብኢ-መይል ክትሰድደሉ ትኽእል ኢኻ። ቀንዲ ሸቶና መጽሔታት ምዕዳል እኳ እንተ ዘይኰነ፡ ንዚምሃርዎ ኣብ ግብሪ ኼውዕሉ ፍቓደኛታት ንዚዀኑ ሰባት ክንረክብ ግና ኪሕግዘና ይኽእል እዩ።—ግብ 13:48።