ውገዳ ነታ ጉባኤ የዕቍባ፡ ንዘይተነስሑ ኣበስቲ ኸኣ ተግሳጽ እዩ። (1ቈረ 5:6, 11) ነቲ ኸምዚ ዝኣመሰለ ኻብ የሆዋ ዚውሃብ ተግሳጽ ክንድግፍ ከለና፡ ፍቕሪ ኢና እነርኢ። ውገዳ ንዅሎም እቶም በዚ እተጸልዉ፡ እንተላይ ንናይ ቀረባ ሰብ እቲ እተወገደን ንኮሚተ ፍርድን ስምዒታዊ ስቓይ ኬምጽኣሎም ከሎ እውን ከይተረፈ፡ እዚ ሓቂ ዚኸውን ብኸመይ እዩ፧

ልዕሊ ዅሉ ድማ፡ ንስም የሆዋን ነቲ ዘውጽኦ ስርዓታት ቅድስናን ፍቕሪ ኸም ዘሎና ነርኢ ኢና። (1ጴጥ 1:14-16) ብዘይካዚ፡ ነቲ እተወገደ ሰብ እውን ፍቕሪ ኸም ዘሎና ነርኢ ኢና። ሓያል ተግሳጽ፡ ዜጕሂ እኳ እንተ ዀነ፡ “ናይ ሰላም ፍረ፡ ማለት ጽድቂ” እዩ ዜፍሪ። (እብ 12:5, 6, 11) ብኣንጻሩ ግና፡ ምስ ሓደ እተወገደ ወይ ርእሱ ዘግለለ ምስ እንሓብር ንተግሳጽ የሆዋ ኢና እንጻረር። የሆዋ ንህዝቡ ‘ብልክዕ ከም ዚግስጽ’ ኣይንረስዕ። (ኤር 30:11) ንተግሳጽ የሆዋ ኽንድግፍን መንፈሳዊ ልማዳትና ኽንቅጽልን ከለና፡ እቲ ሰብ ናብቲ መሓሪ ኣቦና ኺምለስ ተስፋ ንገብር ኢና።—ኢሳ 1:16-18፣ 55:7።

ነታ ብሓደ ልቢ ተኣማንነትኩም ሓልዉ ዘርእስታ ድራማዊት ቪድዮ ርኣያ እሞ፡ ድሕሪኡ፡ ነዚ ዚስዕብ ሕቶታት መልሶ፦

• ሓደ ውሉድ ንየሆዋ ኺሓድጎ ኸሎ፡ ክርስትያን ወለዱ ኽሳዕ ክንደይ እዮም ዚጕህዩ፧

• ጉባኤ ንእሙናት ኣባላት ስድራ ቤት ብኸመይ እያ ኽትድግፎም እትኽእል፧

• ኣየናይ ናይ መጽሓፍ ቅዱስ ታሪኽ እዩ ንየሆዋ ዘለና ተኣማንነት ካብቲ ንስድራ ቤትና ዘለና ተኣማንነት ዝያዳ ኸም ዜገድስ ዜብርህ፧

• ካብቲ ንስድራ ቤትና ዘሎና ተኣማንነት ንየሆዋ ዘሎና ተኣማነት ከነቐድም ዘሎና ስለምንታይ ኢና፧