ኵሎም ኣገልገልቲ የሆዋ፡ ብኣምላኽ ንሓዋሩ ዘይርሳዕ ዕዮ ኺዓይዩ ይኽእሉ እዮም። ልክዕ ከምቲ ሓደ ንደቁ ዜፍቅርን ንዝገበርዎ ነገራት ዘይርስዖን ወላዲ፡ የሆዋ እውን ንግብርናን ነቲ ንስሙ ዘርኣናዮ ፍቕሪ ኣይርስዖን እዩ። (ማቴ 6:20፣ እብ 6:10) ሓቂ እዩ፡ ኵላትና እተፈላለየ ኽእለት እዩ ዘሎና፣ ኣብ ህይወትና ዜጋጥመና ዅነታት እውን ይፈላለ እዩ። ይኹን እምበር፡ ኣብ ኣገልግሎት የሆዋ ዚከኣለና ዘበለ እንተ ጌርና፡ ክንሕጐስ ንኽእል ኢና። (ገላ 6:4፣ ቈሎ 3:23) ኣብ ዝሓለፈ ዓመታት፡ ብኣሽሓት ዚቝጸሩ ኣሕዋትን ኣሓትን ኣብ ቤት-ኤል ኣገልጊሎም እዮም። ኣብ ቤት-ኤል ብወለንታ ኸተገልግል ትኽእልዶ፧ ንስኻ ዘይትኽእል እንተ ዄንካ፡ ካልእ ሰብ ከምኡ ኺገብር ወይ ንሓደ ኣባል ስድራ ቤት-ኤል ኣብዚ ፍሉይ ኣገልግሎት እዚ ኪቕጽል ከተተባብዖ ትኽእልዶ፧

ነታ ገዛእ ርእስኻ ንኣገልግሎት ቤት-ኤል ብኸመይ ተቕርብ፧ ዘርእስታ ቪድዮ ርኣያ እሞ፡ ድሕሪኡ ነዚ ዚስዕብ ሕቶታት መልሶ፦

• ኣብ ቤት-ኤል ንምግልጋል ኪድርኸካ ዘለዎ እንታይ እዩ፧

• ገሊኦም ኣብ ቤት-ኤል ብምግልጋል ብዛዕባ ዝረኸብዎ በረኸት እንታይ ኢሎም፧

• ኣብ ቤት-ኤል ንምግልጋል ዜድሊ ብቕዓታት እንታይ እዩ፧

• ኣብ ቤት-ኤል ንምግልጋል ብኸመይ ከተመልክት ትኽእል፧