ክርስትያን መንእሰይ ወይ ተምሃራይ መጽሓፍ ቅዱስ እንተ ደኣ ዄንካ፡ ክትጥመቕ ሸቶ ኣሎካዶ፧ ክትጥመቕ ዜድልየካ ስለምንታይ እዩ፧ ምኽንያቱ፡ ወፈያን ጥምቀትን ምስ የሆዋ ፍሉይ ርክብ ንምምስራት መገዲ ዚኸፍት እዩ። (መዝ 91:1) ናብ ድሕነት እውን ዚመርሕ እዩ። (1ጴጥ 3:21) ናብዚ ደረጃ እዚ ኽትዓቢ እትኽእል ብኸመይ ኢኻ፧

ንሓቂ እመነሉ። ኣብ ኣእምሮኻ ሕቶታት እንተ መጺኡካ ምርምር ግበር። (ሮሜ 12:2) ክትገብሮ ዜድልየካ ለውጢ ኸም ዘሎ እንተ ኣስተብሂልካ፡ ንየሆዋ ንምሕጓስ ኢልካ ዜድሊ ለውጢ ግበር። (መዝ 27:11፣ ኤፌ 4:23, 24) የሆዋ ምእንቲ ኺሕግዘካ፡ ወትሩ ጸሊ። ንሱ በቲ ሓያል መንፈስ ቅዱሱ ኣቢሉ ኸም ዜበርትዓካን ከም ዚድግፈካን ተኣማመን። (1ጴጥ 5:10, 11) እቲ እትገብሮ ጻዕሪ ጻማ ኣለዎ። ንየሆዋ ምግልጋል፡ ዝበለጸ መገዲ ህይወት እዩ።—መዝ 16:11።

ነታ መገዲ ጥምቀት ዘርእስታ ቪድዮ ርኣያ እሞ፡ ድሕሪኡ፡ ነዚ ዚስዕብ ሕቶታት መልሶ፦

• ገሊኦም ኪጥመቑ እንታይ ዕንቅፋታት እዮም ሰጊሮም፧

• ርእስኻ ንየሆዋ ኽትውፊ ዜድልየካ እምነት ብኸመይ ከተማዕብል ትኽእል፧

• ንገሊኦም ንጥምቀት ዜድሊ ስጕምትታት ኪወስዱ ዝደረኾም እንታይ እዩ፧

• እቶም ንየሆዋ ንምግልጋል ዚመርጹ እንታይ በረኸት እዮም ዚረኽቡ፧

• ወፈያን ጥምቀትን እንታይ ትርጉም እዩ ዘለዎ፧