ነቲ ብ2014 ኣብ ሩዎ፡ ሰሜናዊ ፈረንሳ እተገብረ ዓለምለኻዊ ምርኢት ኪርእዩ ዝመጹ ብኣሽሓት ዚቝጸሩ በጻሕቲ፡ በቲ “መጽሓፍ ቅዱስ—ትማልን ሎምን ጽባሕን” ዚብል ፍረ ነገር ዝነበሮ ኽፍሊ ምርኢት ተመሲጦም እዮም።

ኣብ ቅድሚ እቲ ኽፍሊ ምርኢት፡ ብዛዕባ ጥንታዊ ኢደ ጽሑፋት መጽሓፍ ቅዱስ ዚገልጽ ቪድዮ ብስክሪን ተለቪዥን ይርአ ነበረ፣ እዚ ኸኣ ኣቓልቦ ብዙሓት በጻሕቲ ስሒቡ እዩ። በጻሕቲ ናብ ውሽጢ ምስ ኣተዉ ድማ፡ ብዛዕባ እቲ መጽሓፍ ቅዱስ ሒዝዎ ዘሎ ግብራዊ ምኽርታት፡ ታሪኻውን ስነ ፍልጠታውን ልክዕነቱ ኸምኡ ድማ ሰፊሕ ዝርጋሐኡ ኺፈልጡ ይኽእሉ ነበሩ።

እቲ ምርኢት፡ መጽሓፍ ቅዱስ ንዘመናት ዚኣክል ኪዕቀብን ሎሚ ብእተሓትመ ወይ ብኤለክትሮኒካዊ መገዲ ኣብ ኢድ ቢልዮናት ኣንበብቲ ኺበጽሕን ዝኸኣለ ብኸመይ ምዃኑ ዜርኢ እዩ ነይሩ። በጻሕቲ ሓሓደ ቕዳሕ እቲ ናይ የሆዋ መሰኻኽር ብልዕሊ 120 ቛንቋ ዘዳለውዎ ትርጉም መጽሓፍ ቅዱስ፡ ማለት ትርጉም ሓዳስ ዓለም ብናጻ ተዋሂቦም እዮም።

ብዙሓት በጻሕቲ ነቲ ናይ የሆዋ መሰኻኽር፡ ሰባት ንመጽሓፍ ቅዱስ ብቐሊሉ ኸም ዚረኽብዎ ንምግባር ዝወሰድዎ ተበግሶ፡ ሞሳኦም ገሊጾም እዮም። ብፍላይ ካብ ትሑት መነባብሮ ንዝመጹ መንእሰያት እትኣሊ ሓንቲ ሰበይቲ፡ ምስ ገሊኦም ኰተቴታት ኰይና ነቲ መርኣዪ ምስ ረኣየቶ ኸምዚ በለት፦ “መጽሓፍ ቅዱስ ሓደ ኽፋል ሓባራዊ ርስቲ እዩ። ህያው መጽሓፍ ከኣ እዩ። ንዕኡ ኣብ ዘንብበሉ ነፍሲ ወከፍ ኣጋጣሚ፡ ንጸገማተይ ዚኸውን መልሲ እረክብ እየ።”

ሓንቲ ጓል 60 ዓመት ሰበይቲ፡ ሓደ ቕዳሕ መጽሓፍ ቅዱስ ብናጻ ኽትወስድ ከም እትኽእል ምስ ፈለጠት ተገሪማ እያ። “ንዅልና ስለ ዜድልየና ዅላትና እንደገና ኸነንብቦ ይግብኣና እዩ” ድማ በለት።