Er i hii ve alaghga u tsua u eren nahan yô: U soo u tesen azende ou er u lu sha tseeneke wou yô. U fa wer u hemba fan kwagh a mbamaren ou shin u we mnenge ve ikyo ga.—Anzaakaa 14:18.

 Kwagh u una due ker yô: Alaghga a doo azende ou kpa kwagh ugen ngu u vea hen sha kwagh wou yô, ér we u ngu or u tsughun ior. Aluer mbamaren ou kpa u ngu tsughun ve yô, alaghga azende ou kpa u tsugh a. Aluer mbamaren ou va fa nahan yô, a vihi ve shi vea nenge je ér u tsugh ve, nahan adooga vea yange u ér u de kera duen zaan mape ga kuaa.—Anzaakaa 12:15.

 Er i hii ve alaghga u tsua u eren nahan yô: U hen sha kwagh ne yô, u va fa wer iniongo la zua sha mlu wou ga, shin mbagenev mba vea lu van iniongo la vea lu azende a dedoo ga. (1 Mbakorinte 15:33; Mbafilipi 4:8) Gayô adooga u soo u zan kpa u ngu a ishima i pinen mbamaren ou ian ga.

 Kwagh u una due ker yô: Aluer u za ga sha ci u u fa wer ka iniongo i dedoo ga yô, ishima a hemba taver we u nan azende ou imo sha mi. Kpa aluer u za ga sha ci u u ngu a ishima i za pinen mbamaren ou ga yô, u lu hen ya kpa ishima a doo u ker ga, a lu u er ka we tswen u lu ember ga nahan.

 Er i hii ve alaghga u tsua u eren nahan yô: U kav er mbamaren ou ve lu a tahav sha a we yô, shi u we mnenge ve ikyo. (Mbakolose 3:20) U soo mbamaren ou nahan u soo u taver ve ityough sha u karen ve ken ijime za eren kwagh sha ishima you ga. (Anzaakaa 10:1) Shi u lu a ian i pinen ve kwagh.

 Kwagh u una due ker yô: Mbamaren ou vea fa je ér ve doo u ishima shi u ne ve civir. Man aluer ve nenge ér kwagh u u sen ve ian sha mi la ka u injaa yô, vea lumun.

 Se fatyô u tesen ikyav sha kwagh ne sha u pase ityôkyaa i môm i ia na ve mbamaren vea fatyô u vendan la nahan: A hemba doon we u tungun iyol hen ifi ape ior mbakuran ve lu sha kpetar ve lu kuran mngerem mara yô. Sha ci u nyi? Sha ci u, shighe u ú lu shin mnger la, u fatyô u fan hanma kwagh u a lu zan hemen la, er mbakuran mba ve lu nengen mban nahan ga. Kpa mbakuran mbara vea hemba nengen a zayol u a lu shin mnger la ken ica a we. Mbamaren ou kpa, er ve hembe lun a mfe sha akaa ne yô, vea hemba nengen a zayol u we u nenge a min ga la. Er mbakuran mba hen kpemnger nahan, mbamaren ou kpa awashima ve ka u yangen we iember ga, kpa ka u wasen we u palegh mbamzeyol mba vea na u kera ember uma ga la.

 Nenge ityôkyaa igen: Hange mbamaren ou kpishi u kuran we. Dooshima ka a mgbegha ve u nan we ian shighe u i gbe u vea er nahan la, shi vendan shighe u i gbe u vea venda la. Shighe u u pin ve ian i eren kwagh yô, ka ve pine ayol a ve aluer vea fatyô u lumun, nahan hanma kwagh u a va dugh ker cii kpa vea nôngo a mi yô. Vea lumun, aluer ve fa wang ér kwagh a va zayol ga yô.

Kwagh u u fatyô u eren yô

 Eren kwagh sha mimi: Pine iyol you wer: ‘Er nan ve m soo u zan jimi? Kan kwagh u i lu za eren la jighilii a sarem shinii m soo di u eren kwagh u mbakov wam ve soo? Ka er or u nan doom ishima la nan lu zan ve mo kpa i sarem u zan yee?’ Yô, ôr mbamaren ou kwagh u mimi. Yange ve kpa ve lu iyev er we nahan, shi ve fa u tsembelee. Nahan a̱ shi nan kpa vea kav awashima wou la. A doo ve a ieren you i mimi la, shi kwaghfan ve la una wase u. (Anzaakaa 7:1, 2) Nahan kpa, aluer u ngu ôron mbamaren ou kwagh u mimi ga yô, vea pande u nan we jighjigh shi vea kera gba soon u nan we ian sha kwagh ga.

 Shighe: De gbe za hiin u pinen mbamaren ou kwagh shighe u ve za sember hiden tom shin ve lu nengen sha akaa agen ga. Za hen ve shighe u ve hembe lun a ian yô. Kpa de keghen wer shighe a va bee cii ve u za u za gbidye ve akpa ityô wer ve̱ na u ian ga. A doo mbamaren ou u nan we ian kpoo ga. Pine ve ian sha shighe sha er u na ve shighe u henen sha mi yô.

 Kwagh u u lu za ôron ve la: De er kwagh tsuku tsuku ga. Pase ve kwagh u u soo u eren la jighilii. Mbamaren ka vea pine u kwagh man wea kaa a ve wer “M fa ga” yô, i doo ve ga, hemban je yô shighe u ve pine u ér: “Ka an nana lu her?” shin “Or kaven ishigh nana lu here?” shin “Ka hanma shighe u hide?” yô.

 Ieren you: De nengen mbamaren ou wer ka mbaihyomov ou ga. Kpa nengen ve wer ka mba eren kwagh a we imôngo, sha ci u sha kpôô yô ka pe ve lu je la. Aluer u nenge mbamaren ou wer ka mba wasen we yô, u pande u hendan kwagh a ve shi vea hemban eren kwagh a we ken mzough.

 Tese mbamaren ou wer u via kuma u lumun kwagh u ve soo la sha icivir. Aluer u er nahan yô, ve kpa vea na u icivir. Shi kwagen vea hemba keren igbenda i lumun kwagh u ú pin ve ian sha mi la.