Shighe u u lu henen zwa ugen yô, ka i gba u u kôr iyol you tsaha shi u hide a iyol you ijime, ga a gba sha mi ga. Ka a inja u henen zwa ugene? Agumaior kpishi aa kaa ér, een! Ngeren ne una pase ityôkyaa i ka ve hen zwa ugen yô.

•  Ityôkyaa i henen zwa ugen yô ka nyi?

•  Ka mbamtaver mba nyi ve lu kere?

•  Ka mbamtsera mba nyi ve lu kere?

•  Kwagh u mbakwav wou ve ôron yô

 Ior kpishi ka ve hen zwa ugen sha ci u ka gbaa kwaghhenen ken makeranta ve. Mbagenev yô, ka awashima u ve lu a mi la ka a na ve tsua u henen ma zwa ye. Ikyav i tesen:

•   Gumkwase ugen ken tar u Australia, iti na ér Anna, yange kaa ér una hen zwa Latvia—zwa u ior mba ngô na. Anna kaa ér: “Tsombor wase ngu wan iyol i zan zende ken tar u Latvia, hen ya u mama wam, nahan m soo mer zum u se za nyôr ken tar la yô, me lamen a anmgbianev av ken zwa ve.”

•   Gumkwase ugen ken tar u Amerika, u a lu Orshiada u Yehova yô, iti na ér Gina, yange hen iliam i sha ave i tar u Amerika la, maa mough yem ken tar u Belize sha er una za er tom na u pasen kwagh ken tar la kpaa yô. Gina kaa ér: “Orakondoato yô, nana lu vea iorov kpuaa mba nana lamen a ve tseegh kpa a kuma nan. Ka mea kaa a or mer m hen iliam i sha ave i tar u Amerika sha u me tese ior Bibilo ken ijô ve yô, ve wuese iniôngon yam la kpishi!”

 U fa kpa? Bibilo tsengaôron ér a pase loho u dedoo u Tartor u Aôndo hen “hanma ikyurior man hanma nongo man hanma zwa man hanma nongoior.” (Mpase 14:6) Kwaghôron u profeti ne ngu kuren nyian nena? Nyian ne, agumaior kpishi a a lu Mbashiada mba Yehova yô, ka a hen zwa ugen, a hide a pasen ior mba lamen zwa la kwagh hen ityônya, gayô a mough a yem ken ityar i i lamen ijô shon la sha u za eren tom ve u pasen kwagh la.

 Zwa u henen ka kwagh u ican kpishi. Gumkwase ugen iti na ér Corrina, a kaa ér: “Yange m hen mer ka u henen asember di tsô, kpa m va kav er i gbe u me hen ieren i ityôô igen kua gbenda u ve henen kwagh la kpaa yô. Ka i gba u u hen zwa shighe gôgônan ve u fa u ye.”

 Shi ka i gba u u hide a iyol you ijime. Gumor ugen u a hen zwa Ishpania yô, iti na ér James, a kaa ér: “Ka i gba u u hen u sen shighe u u ôr kwagh ken zwa u u lu henen la shami ga yô, sha ci u ka u ôr akaa kpishi shami ga. Kpa ka gbenda u henen kwagh cica.”

 Jindikwagh: Aluer u wa ishima a akaa a van we a mgbejime, man kwagh u ashighe agen ka u ôr shami ga ve i vihi u la yô, a hemba wasen we u henen zwa ugen.

 Kwaghwan: Aluer u nenge wer u ngu fan zwa fele fele er mbagenev nahan ga kpa, iyol i de kpeen we ga. Bibilo kaa ér: “Hanma or nana̱ kar tom u nan iyol i nan, ka nahan man nana lu a ityôikaa i tan ihyagh ken iyol i nan tseegh, á kera lu sha kwagh u orgen ga ye.”—Mbagalatia 6:4.

 Ka wea hen zwa ugen yô, u zua a mbamtsera kpishi je. U tesen ikyav yô, gumkwase ugen iti na ér Olivia, a kaa ér: “Ka wea hen zwa ugen yô, u seer fan ior shi u zua a azende a he.”

 Gumkwase ugen iti na ér Mary, a hen zwa ugen, nahan a nenge ér un hemba gban kwagh. A kaa ér: “Ka i lum ican kpishi u kaan ihyagh sha ma kwagh u m lu eren yô, kpa er m lu henen zwa ugen ne, ka mea fa ishemberti i he je i sagher mo iyol. Kwagh la ka a na m nenge mer m hemba gban kwagh.”

 Gina, u se vande teren mkaanem nam la nenge ér un seer zuan a msaanyol ken tom na u pasen kwagh la sha u tesen ior Bibilo ken iliam i sha ave. A kaa ér: “Kwagh u hemban doon u m zough a mi yô, ka m nenge ior ve saan sha ishigh zum u m hii u lamen a ve ken zwa ve yô.”

 Jindikwagh: Ka wea henen zwa ugen yô, kwagh la a wase u u zuan a azende a he, shi u nenge wer u hemba gban kwagh, shi i hemba saan we iyol ken tom wou pasen kwagh. Ka gbenda u vesen u pasen loho u dedoo aren a “hanma ikyurior man hanma nongo man hanma nongoior man hanma zwa.”—Mpase 7:9.