“Shighe u yange m lu anyom 15 la atindi a mbamaren av luun mo a zayol ga, kpa er m lu anyom 19 hegen ne, ka i lum er ma ve seer nan mo ian i eren akaa am nahan.”—Sylvia.

 We kpa ka i lu u er Sylvia nahana? Aluer we kpa ka i lu u nahan yô, ngeren ne una wase u u lamen vea mbamaren ou sha kwagh ne.

•  Kwagh u i doo u u fa yô

•  Kwagh u u fatyô u eren yô

•  Kwagh u mbakwav wou ve ôron yô

 Cii man u lam a mbamaren ou sha kwagh u atindi a ve we u la yô, gbidye kwar sha akaa ne:

•  Aluer atindi nga ga yô, kwagh môm una za sha hwange ken uma ne ga. Nenge ase ikyav i kwagh ne sha pa u akaahendan ka a ngee sha mi kpishi yô. Aluer akav a tesen or kwagh u nana er shin usu u tesen or ér nana tile shin nana yem shin kwagh u tesen or ér gba u nana pande ayem ngu ga nahan u nenge wer a lu nena? Atindi a hen ya nga er a sha gbenda nahan, nga a wase sha er akaa aa za sha inja hen ya yô.

•  Atindi a mbamaren ou ve we u la tese ér ve wa u ikyo. Aluer tindi môm kpa ve wa u ga yô tese ér kwagh gba ve sha kwagh wou cuku kpaa ga. Jim je yô, we ú nenge ve wer ka mbamaren mba injaav jee?

 U FA KPA? Mbamaren kpa i wa ve atindi! Aluer taver we u lumun a kwagh ne yô, ôr Genese 2:24; Duteronomi 6:6, 7; Mbaefese 6:4 man 1 Timoteu 5:8.

 Kpa aluer u nenge wer atindi a mbamaren ou ve we u la ngee yum di ye?

 Cii ve u lam a mbamaren ou sha kwagh u atindi a ve we u la yô, hen sha kwagh ne. U kuran atindi a mbamaren ou ve we u la tsembelee kpa? Aluer u eren nahan ga yô, alaghga a lu shighe u i doo u u sôn ve wer ve oghom uwegh ne ga. Kpa u fatyô u nengen ngeren u a lu a itinekwagh ér, “Me Er Nan ve Mbamaren Av vea Nam Jighjigh?” la.

 Aluer u ngu kuran atindi a mbamaren ou ve we u la yô, wa iyol sha kwagh u u soo u za ôron ve la. Aluer u gbidye kwar sha kwagh u u soo u za lamen a ve sha mi la yô, u fatyô u fan aluer kwagh shon ngu a inja yô. U been yô, pine mbamaren ou ijiir kua shighe u ne cii ne tema ne lam kundu kundu yô. Nahan u teman vea mbamaren ou yô, umbur akaa a a dondo ne:

 Er kwagh sha civir. Bibilo kaa ér: “Kwaghôron u sha ipila yô, kenden a iyugh sha.” (Anzaakaa 15:1) Nahan umbur kwagh ne: Aluer u ngu sendegh kwagh a mbamaren ou shin kaan a ve wer mba eren kwagh sha mimi ga yô, kwagh la una va due ken ayôôso.

 “Er m lu seer nan mbamaren av icivir la, kape mo kpa ka ve seer nan mo icivir je la. Ka sea naan ayol a ase icivir yô, i hemba lun se zange u gban zwa môm sha kwagh.”—Bianca, 19.

 Kegh ato. Bibilo kaa a vese ér “Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron.” (Yakobu 1:19) Umbur wer u ngu lamen vea mbamaren ou nahan ka we tseegh i gbe u u lamen ga, gba u u keghen ato a ve kpaa.

 “Ka sea vesen yô, ashighe agen se tôô ser se hemba fan kwagh a mbamaren asev, kpa ka mimi ga cii. Gba u se lumun ser ve kôôm se shi se keghen ato a kwaghwan kua mkôôm ve.”—Devan, 20.

 Kav er i lu ve yô. Nôngo fa er aluer u ngu ormaren ve we kpa a lu u ken ishima yô. Dondo kwaghwan u Bibilo u a kaa ér ‘se de kera waan akaa a ase ikyo tseegh ga, kpa se wa akaa a mbagenev ikyo kpaa’ la. Nahan a gba u u wa kwagh u mbamaren ou kpa ikyo.—Mbafilipi 2:4.

 “Yange m tôô mer mbamaren av mba hendan a hendan a mo, ve ta ikyaa a mo ga. Kpa m va mase kaven er ve lu henen a hen u lun mbamaren mba dedoo di vough er mo kpa m lu henen u lun or u injaa nahan. Hanma kwagh u yange ve lu eren cii lu sha ci u m doo ve ishima.”—Joshua, 21.

 Due a igbenda i ia fatyô u wasen yô. Tôô ase wer u soo u zan iniongo, nahan gba u u naha mato a kuma ihwa jimin cii ve u za nyôr her ye, kpa mbamaren ou venda. Hen fa kwagh u a ne ve ve vende yô—ka iniongo la ve soo ér u de ze ga shinii, ka er i gbe u u naha mato a kuma ihwa jimin la ve soo ga?

•   Aluer ka mato u nahan a lu zayol ve yô, u kaa a ve wer u za vea orgen u nan fe mato u nahan tsembelee nahan vea lumunu?

•   Aluer ka iniongo la i lu zayol ve yô, u pase ve ior mba ve lu van kua organden u nana lu her u nengen sha ven yô, vea lumunu?

 Umbur u lamen sha icivir, shi wa ishima kegh ato a kwagh u mbamaren ou ve soo u ôron la. Tese ve sha iliam man sha ieren you wer u “civir teru man ngôu.” (Mbaefese 6:2, 3) Vea hide a lumun shin vea sôr akaa? Aluer ve gema shin vea gema ga kpa, gba u u er akaa a a dondo ne.

 Lumun a kwagh u mbamaren ou ve tsough la sha icivir. Ior kpishi ve fa er kwagh ne i lu kwagh u hange hange u una na mbamaren ou vea seer nan we ian ga. Aluer mbamaren ou lumun a kwagh u u soo la ga man u hii u sendegh kwagh a ve yô, kwagen a gba u shi u lam a ve yô, a hemba vihin. Kpa aluer u lumun a kwagh u ve tsough la yô, ka keng a hemba lun ve zange u oghom uwegh sha akaa agen.