Bibilo yange or u man msôrom akuma akuma, sha shighe u i doo u nana ma la ga. Kpa i venda ihyundugh ki msôrough.—Pasalmi 104:15; 1 Mbakorinte 6:10.

 Kpa aluer mba kighir we ér u ma msôrom sha shighe u tindi shin mbamaren ou ve ve lumun ér we u ma ga di ye?

•  Hen sha kwagh u u ma msôrom ve una er u la

•  Tsua kwagh u u er yô

•  Kwagh u mbakwav wou ve ôron yô

 Alaghga mbakwav wou mba nengen ér saa ne ma msôrom hen mtem ve mtem shon una doo ye. Kpa zum u u me msôrom u bee kera yô, ka nyi ia fatyô u eren we?

•  Ma a na u per tindi. Aluer u ngu hen ijiir i gomoti a we atindi sha kwagh u msôrom, man u za ma msôrom sha shighe u tindi a lumun ga yô, a ya u zwa-jirigh gayô a wa u ijir ér u er ifer, shin a ngohol we laasen u nahan mato, gayô a gba u u er tom u mbakwarev, shin a wuhe u ayange imôngo.

•  Ma a na iti you ia vihi. Msôrom ka ma na or nan er akaa a ma nan er sha gbaaôndo ga yô. Shighe u ma lu nzughur a we yô, u fatyô u ôron shin eren akaa a u va hide u vaa afanyô yô. (Anzaakaa 23:31-33) Sha ayange a ior ve hemban lamen sha Intanet shin hanseeti ne, ieren you ia na iti you ia vihi gbem sha won.

•  Ma a na u kera fatyô u palegh kwaghbo ga. Msôrom ma a na or a fatyô u kôron we gbidyen shin eren idya a we. Shi ma a na mbagenev vea fatyô u kighir we, nahan u seer peren atindi shin seer nyôron ken zayol.

•  Ma a ya tor ken a we. Akaa agen a i tôv sha kwagh u msôr yô tese ér aluer or hii u man msôrom iyev yô, ma a hemba yan tor ken a nan. Aluer u ngu man msôrom wer u hungur a zayol shin i de huan we ga shin ma kwagh de duen we ishima ga yô, tegh tegh tsô a va hingir ikye you, maa a taver we u den.

•  Ma a na u ku. Semberee ne, ken inyom igen la tseegh, mato yange a er aikyôr ken tar u Amerika a wua ior, i lu a kuma ihwa ga tsô shi ugen a er, kpa lu mbanahan mato a msôrom ken ityo na ve kwagh lu nahan ye. Hen shighe ugen la, ken atô u anyom ataan cii agumaior a hii anyom 21 hide ijime lu kpen ku sha akaahendan ken hanma inyom hemban iorov 1,500 sha ci u msôrom ma man. Aluer u ma msôrom ga, kpa u lumun wer orgen u nan me ma kpishi nana tôô u sha kwaghhendan yô, ka ityough you!

 Aluer u vande tsuan kwagh u u er sha kwagh u msôr tsuaa yô, u fatyô u palegh kwaghbo shin akaa a vihin tsung a u ma msôrom sha tindi ga ve aa er u la.

 Kwaghwan u Bibilo: “Orfankwagh ka nan nenge a kwaghbo, nan yer.” (Anzaakaa 22:3) Doo u se ma msôrom se mough se naha mato ga, shin se er ma kwagh u i gbe u saa se ver ishima tsembelee ve se er la ga.

 Tsua wer: ‘Aluer m soo u man msôrom kpa, saa shighe u me ma kpa a lu sha tindi shi ken iyol yam kpa kwagh u zam iyol ga la tseegh me ma ye.’

 Kwaghwan u Bibilo: “Ne mba ikpan i kwagh u ne ongo imo na la.” (Mbaromanu 6:16) Aluer u ngu man msôrom di tsô wer mbakwav wou kpa mba man yô, tese ér u de mbagenev mba kighir we. Aluer u ma msôrom wer i de duen we ishima a ma kwagh ga shin u hungur a ma zayol yô, u ngu henen u wan ishima a mbamzeyol ou ga.

 Tsua wer: ‘Me de mer mbakwav wam ve kighir mo me hingir or u man msôrom ga.’

 Kwaghwan u Bibilo: “De luun a mbamanmsôrom imôngo ga.” (Anzaakaa 23:20) Aluer u ngu vea mbaaboki mba dedoo ga yô, vea bunde awashima wou ne. Aluer u ngu lun vea ior mba ve me msôrom sha ibume yô, kwaghbo a kohol we.

 Tsua wer: ‘Me ya ijende a ior mba ve me msôrom sha ibume la ga.’