Ka Yehova Aôndo Uhembanagee la, a lu “Alefa man Omega” ye. Asember ne nga ken Bibilo ajiir atar.—Mpase 1:8; 21:6; 22:13. *

Alefa ka ishangebaacaa i hiihii, omega di ka i masetyô ken asangaabaacaa a ken zwa Grika, ú i nger vegher u Bibilo u i hembe yilan ér Ikuryan I He, i takerada u Mpase kpa u lu ker la. Er alefa a lu ishangebaacaa i hiihii, omega a lu i masetyô ken zwa Grika yô, i er tom a a u tesen ér ka Yehova tseegh a lu mhii man mkur ye. (Mpase 21:6) Yange lu Aôndo u Uhembanagee sha uicôronmbaashighev mba ken ijime la, shi una zahemen u lun Aôndo Uhembanagee zan zan gbem sha won. Ka un tseegh a lu “hii sha uicôronmbaashighev je zan zan gbem sha won” ye.—Pasalmi 90:2.

Bibilo er tom a ishember ne u ôron kwagh u Yehova man Wan na Yesu, kpa mkposo gema ngu. Nenge ase akav ahar ne.

• Yehova ôr ken Yesaia 44:6 ér: “Mo M ngu u hiihii, shi M ngu u masetyô kpaa; ma aôndo ugen ngu ga, saa Mo.” Heen ne Yehova pase wang er un lu Aôndo u mimi gbem sha won; dugh un kera yô, mô ugen a lu ga yô. (Duteronomi 4:35, 39) Sha nahan yô, ishember i “u hiihii man u masetyô” la, ngi inja i môm a “Alefa man Omega.”

• U seer yô, ishember i i ter ken Mpase 1:17, 18; 2:8 i “u hiihii [pro’tos la ka alefa ga] man u masetyô [e’skha·tos, la kpa ka omega ga].” Kwagh u avur shon shi a ôr la, tese ér or u i ôr kwagh na la yange kpe shi nder. Nahan yô, avur ne nga ôron ka kwagh u Aôndo ga, sha ci u mayange ngu a kpe ga. (Habaku 1:12) Kpa Yesu yô, yange kpe shi i nder un. (Aerenakaa 3:13-15) Sha nahan yô, lu or u hiihii u i nder un, i na un uma u kpen ga, u ken jijingi yem sha, ape a lu uma hegen shi una lu “uma gbem sha won” la. (Mpase 1:18; Mbakolose 1:18) Yange mba nderen Yesu yemen sha yô, hii shighe la je ka un a lu nderen uumace mbagenev cii ye. (Yohane 6:40, 44) Sha nahan yô, Yesu lu or u masetyô u Yehova nder un iyolna yô. (Aerenakaa 10:40) Nahan yô, aluer i yila Yesu ér “u Hiihii man u Masetyô” kpa ka sha inja je.

Ei. I pase or u nan lam ken Mpase 22:13 la jighilii ga, shi ior kposo kposo lam ken ityough kin. Profesôr William Barclay or kwagh u ityough ki Bibilo kin kaa ér: “ior lam ken ityough kin sha a dondo dondo ga; . . . nahan taver kpishi u fan or u nan lam ken ivur la jighilii.” (The Revelation of John, Tihi u sha 2, Revised Edition, peeji 223) Sha nahan yô, “Alefa man Omega” u ken Mpase 22:13 la, a fatyô u kaan ér ka Or shon môm u i ne nan ititom ne ijiir igen ken takerada u Mpase la—ka Yehova Aôndo je la.