Areki u ikyuryan yange lu icighan akwati u Mbaiserael mba tsuaa mbara er sha iniezwa i Aôndo, kua gbenda u yange tese ér ve er la yô. Yange i wa “Shiada” ker, ka Atindi a Pue a yange i nger sha ikpande i awen i ihiar la je la.—Ekesodu 25:8-10, 16; 31:18.

•   Gbenda u yange i er Areki la. Iniembe i Areki lu aseva ahar man tiôn (usentimita 111, shin, uinci 44), igbanger na lu ishiva i môm man tiôn (usentimita 67, shin, uinci 26), ityaven na kpaa ishiva i môm man tiôn (usentimita 67, shin, uinci 26). Yange i er un sha kon u saa, i cir un zenaria iyol, kimi kua ken won, shi i ker un gbiligh ku zenaria ningir tser. I er kuur u cirin un a mi sha zenaria u wang, lu a ucerubi sha mi uhar, mba i er sha zenaria yô. I var ucerubi mba shon sha akur a ahar a kuur la, u môm keen, u môm keen, ve zua ishiv ayol a ve, kpa ishigh ki hanma ve lu kenger sha kuur shon. Akper a ucerubi mbara naregh yisa sha kuur u Areki. Shi i ker ahye a zenaria anyiin i var a shin akpe a ambusu a na. Nahan i gba igbough sha kon u saa, i cir mbi zenaria iyol, i gema i shindi ken ahye la, sha u tôôn Areki a min.—Ekesodu 25:10-21; 37:6-9.

•   Ape yange i ver Areki yô. Sha hiihii la, yange i ver Areki ken Icighanjiir u Hemban Cii ken tabernakel, tenti u kohol her civir Aôndo, u i tôôn i zenden a mi, u yange i er shighe môm vea Areki la. Yange i ta ikyondo yisa Icighanjiir u Hemban Cii sha er upristi man ior mbagenev cii vea nenge kimi tsula ga yô. (Ekesodu 40:3, 21) Lu pristi u tamen tseegh nyôron ken Icighanjiir u Hemban Cii la, nengen a Areki ye. Yange a nyôr ker ken hanma inyom kwa môm, sha Iyange i Nan Iwom—iyange i nan nagh sha ci na iyol na man sha ci u asorabo a nongoior la cii. (Levitiku 16:2; Mbaheberu 9:7) Ken masejime yô, i va tôô Areki i yem i za ver ken Icighanjiir u Hemban Cii u ken tempel u Solomon la.—1 Utor 6:14, 19.

•   Ityôkyaa i yange i er Areki yô. Areki lu ijiir i koson uicighan mbaakaav mba vea umbur Mbaiserael ikyuryan, shin iceghzwa i Aôndo a er a ve sha Uwo u Senai la yô. Shi lu kwagh u hange hange u i eren tom a mi sha Iyange i Nan Iwom, shin naagh ku wamen (cirin asorabo) a pristi kua Mbaiserael cii yô.—Levitiku 16:3, 13-17.

•   Akaa a yange lu ken Areki yô. Lu ikpande i awen i yange i nger Atindi a Pue sha mi la i hii wan ken Areki ye. (Ekesodu 40:20) Ken masejime yô, i va wa ityegh ki sha zenaria ki ki lu a mana shimi yô, kua “gbough ku Aron ku ku kpar la” kimi. (Mbaheberu 9:4; Ekesodu 16:33, 34; Numeri 17:10) Ikyav tese ér yange shighe karen yô, i va dugh ityegh kira kua gbough ku Aron kura ker sha, sha ci u akaa ne yange lu ken Areki shighe u i va tôô un i za ver ken tempel la ga.—1 Utor 8:9.

•   Gbenda u yange i tôôn Areki la. Yange lu Mbalevi tseegh gba u vea tôôn Areki ye. Yange ve tôô sha akende a ve, sha igbough mbi i er sha kon u saa, i wa shin akpe a ambusu a na la. (Numeri 7:9; 1 Kroniku 15:15) Yange i tsuan igbough mbira sha Areki kera ga, nahan lu u Mbalevi vea cihi a bende iyol a Areki ga. (Ekesodu 25:12-16) Yange a tôô Areki a nguren yemen a mi yô, i cir un “ikyondo i yisan” i yange i ta sha u yisan Icighanjiir u Hemban Cii la.—Numeri 4:5, 6. *

•   Areki lu ikyav i tesen kwagh. Ape Areki yange una lu cii yô, i lu u tesen ér Aôndo ngu her. U tesen ikyav yô, ibeenegh ki gen yange ki va tile sha ijime i Areki ken Icighanjiir u Hemban Cii, shi ki gen ki va tile sha Tabernakel, nahan Mbaiserael ve nenge a ki hanma ijiir i ve lu hen afo a ve cii. Ibeenegh kin man ki sha Areki kira cii lu ikyav i tesen ér Yehova ngu a ve shi a lumun ve kpaa. (Levitiku 16:2; Numeri 10:33-36) Shi Bibilo ôr kwagh u ucerubi mba sha ijime i Areki la kaa ér Yehova yange “[tema] sha ucerubi.” (1 Samuel 4:4; Pasalmi 80:1) Sha nahan yô, ucerubi mbara lu “ikyav i ikyekye” i Yehova. (1 Kroniku 28:18) Er Areki lu ikyav i tesen akaa yô, Tor Davidi nger kwagh kaa ér Yehova “[tema] sha Shion,” zum u i yem a Areki i za ver ken Yerusalem (Shion) yô.—Pasalmi 9:11.

•   Ati a yange i yilan Areki yô. Bibilo yila icighan akwati la ati kposo kposo, ér “areki u shiada,” man “areki u ikyuryan,” man “areki u TER [Yehova],” kua “areki u agee Ou [Yehova].”—Numeri 7:89; Yosua 3:6, 13; 2 Kroniku 6:41.

   Yange i yilan kuur u cirin sha Areki ér “ijiir i nan iwom.” I zua a ishember i ken zwa Heberu i i gem nahan ne ken ishember igen i tesen ieren, inja na yô ér, “u cirin (isholibo).” (1 Kroniku 28:11) Iti ne tese kwagh u vesen u yange a er hen ijiir ne sha Iyange i nan Iwom, zum u pristi u tamen u Mbaiserael una mishi awambe a uzendenya mba i sôngo sha u nan naagh la sha Areki kua sha ishigh ki Areki shon yô. Akaa a pristi u tamen yange nan er ne yange a hingir iwom sha ci u Mbaiserael cii, shin a cir, asorabo aa “na iyol na man mba hen ya na kua mkohol u ior i Mbaiserael cii.”—Levitiku 16:14-17.

Areki u ikyuryan la ngu her zan zan nyianaa?

 Ikyav ngi i tesen ér ngu ga. Bibilo tese ér kwagh kera gba sha Areki ga sha ci u ikyuryan i Areki la i kar kera, hegen se mba ken “ikuryan i he,” i sha naagh ku Yesu kura. (Yeremia 31:31-33; Mbaheberu 8:13; 12:24) Bibilo yange tsengaôron shighe u Areki u ikyuryan una va lu ga kpa kwagh a kera gba ior mba Aôndo sha mi ga yô.—Yeremia 3:16.

 Shighe u i ver ikyuryan i he la, i bugh tempel u Aôndo Sha, nahan apostoli Yohane nenge a Areki u ikyuryan la Sha, ken mpase u sha mnenge. (Mpase 11:15, 19) Areki u Yohane nenge a mi ne lu Areki kpôô kpôô ga, kpa lu ikyav i tesen ér Aôndo ngu a ior nav shi a lumun a ikyuryan i he ne.

Areki yange lu kurayol shin kwagh u doon ikyôro?

 Ei. Yange lu u Mbaiserael vea lu a Areki di tsô maa ikyôr ia lagh ve ga. U tesen ikyav yô, yange Mbaiserael lu a Areki ken afo shighe u ve nôngo ityav a gar u Ai la, nahan kpa ityav mbira hemba ve, sha ci u Oriserael ugen hemba Yehova ato. (Yosua 7:1-6) Shighe karen yô, Mbafiliti hemba ve ityav, shin er yange ve za ityav mbira a Areki nahan kpaa. Yange ityav mbira hemba ve sha ci u ifer i upristi mba Mbaiserael, Hofeni man Pinehashi. (1 Samuel 2:12; 4:1-11) Yange Mbafiliti ngohol Areki ken uitya, kpa Aôndo er ve atsan sha kwagh u Areki la zan zan ve kar hiden a mi ken Iserael.—1 Samuel 5:11–6:5.