Een. Akaawan a Bibilo aa anyiin a i ter shin heen ne aa wase u u nôngon a zayol u inyar man injô i gban:

1.   Vihin inyaregh sha inja. “Mbamhen mba ortseenshima, ka sha u kwagh ma a ngee yô, kpa hanma or u nan torough kwagh yum yô, ka ken ibanave nan lu zan ye.” (Anzaakaa 21:5) De gbe torough wer u yam kwagh sha ci u mba teen un ken kasua yum ga. Nger inyaregh ki u soo u vihin la, shi vihi ki tseegh.

2.   De gbe gban injô dang ga. “Mbanyarev ka ve tema tor sha mbaatsanev, man or u yan injô yô, ka kpan u or u nan injô la.” (Anzaakaa 22:7) Aluer u vande ngun or a injô kera man u ngu fantyô u kimbin nan er yange u tôndo zwa la ga yô, hide lam vea nan, pase nan gbenda ugen u u nenge wer u kar ve u kimbi nan i la. Kimbi nan vough er yange ne tôndo zwa nahan. Dondo kwagh u Bibilo i we or u nan tende zwa u kimbin injô kpa nan va kanshio ve, injô i lu cirin nan la. Bibilo kaa ér: “Za za shar inya, zamber or u wan ndor a we la. De ne ashe ou mnyam ga, akurashee a ou kpaa a̱ de meer mnyam ga.” (Anzaakaa 6:1-5) Aluer u ver nan shighe ugen u kimbin nan injô la, man u va kanshio u kimbin nan sha shighe shon kpa, de gbe uwegh ga za hemen u zamber a nan her.

3.   Er kwagh a inyaregh er i doo u u er la. “Or u nan we bo yô, nan kumbur sha u hingir ornyar, nan kera fa ase er ibanave ia va tser nan ga.” (Anzaakaa 28:22) Iyuhwe man hua ka ve na se nyôr ken ibanave, shi ka ve na akaa a ken jijingi a kera gba se ishima ga.

4.   Kwagh a̱ kuman we. “Aluer sea lu a kwaghyan man akondo yô, i̱ kuma se.” (1 Timoteu 6:8) U or lun a inyaregh tseegh la tese ér nana lu saan saan shin nana zua a mkom ken uma ga. Ior mbagenev ken tar ne mba i hembe saan ve iyol cii la mba a inyaregh kpishi ga. Kwagh u ve lu a mi yô, mba a dooshima hen tsombor ve kua azende a ve, shi ve ya ikyaa kôôsôô vea Aôndo.—Anzaakaa 15:17; 1 Peteru 5:6, 7.