Aluer or ma msôrom akuma akuma yô, nan er kwaghbo ga. Bibilo kaa ér msôrom ka iyua i Aôndo a ne se sha u se ma i saan se iyol yô. (Pasalmi 104:14, 15; Orpasenkwagh 3:13; 9:7) Bibilo shi pase er msôrom ma been uzayol mba ken iyol kpaa yô.—1 Timoteu 5:23.

 Yesu yange maan wain shighe u lu shin tar la. (Mateu 26:29; Luka 7:34) Yange er ivande i kpilighyol hen iniongo i ivesegh igen, gema mngerem hingir wain u dedoo sha u wasen orkwasehe la.—Yohane 2:1-10.

Akaabo a msôrom ma man karen ikyaa inya ma ve a mi la

 Er Bibilo i ter akaa a dedoo sha kwagh u msôr nahan kpa, i̱ venda msôrom ma man karen ikyaa inya, shin ihundugh ki msôrough. Sha nahan yô, aluer Orkristu soo u man msôrom kpa, nana ma akuma akuma. (1 Timoteu 3:8; Titu 2:2, 3) Bibilo pase atôakyaa a a ne ve i doo u se palegh u man msôrom karen ikyaa inya yô.

•   Ka ma na or nan kera henen kwagh sha inja ga shi nan er kwagh u ma nan er ga yô. (Anzaakaa 23:29-35) Bibilo kaa ér “gema nen ayol a en na nen nagh ku uma a mi, icighannagh ku doon Aôndo, ka mciviraôndo wen u ken jijingi je la.” Or u hunden msôrom nana fatyô u eren kwagh ne ga.—Mbaromanu 12:1.

•   Or ka nana ma msôrom a kar ikyaa inya yô, nan kera tswer ieren i dang ga shi ‘ma kar a kwaghfan u nan kera.’—Hosea 4:11; Mbaefese 5:18.

•   Aluer or ngu man msôrom karen ikyaa inya yô, nana kungu ican shi ma a na a doo nan iyol ga kpishi je.—Anzaakaa 23:21, 31, 32.

•   Msôrom ma man kpishi kua ihyundugh ki msôrough cii ka akaa a doon Aôndo ishima ga.—Anzaakaa 23:20; Mbagalatia 5:19-21.

Or a ma msôrom nan ve a kar ikyaa inya?

 Aluer or ma msôrom man nan ngu eren kwagh sha gbenda u nana va vihi iyol shin nana na mbagenev iyolvihin yô, or la nan ma msôrom kar ikyaa inya. Bibilo kaa ér mba fe ér or hunde msôrom shighe u nan gbe ma la ga, kpa ka sha akaa a nan lu eren la, er u eren tum tu tum, shin zenden ze ze ze, shin zôhôn shin lamen bela be bela nahan. (Yobu 12:25; Pasalmi 107:27; Anzaakaa 23:29, 30, 33) Mba ve palegh u man msôrom karen ikyaa inya la je kpa ‘asema aa fatyô u yuhwan ve sha ihyundugh ki msôrough,’ nahan vea tagher a akaa a vihin tsung a a lu ker la.—Luka 21:34, 35.

Tswer u man msôrom

 Bibilo shi pase ashighe a i doo u Orkristu nana tswer msôrom kuaa yô:

•   Aluer ka u kwagh la una na mbagenev gbev mbu nôngon yô.—Mbaromanu 14:21.

•   Aluer tar u nan lu ker la wa tindi ér i de me msôrom ga yô.—Mbaromanu 13:1.

•   Aluer ka u nana fatyô u man msôrom akuma akuma ga yô. Mba ihyundugh ki msôrough ki ye tor ken a ve la, kua mbagenev mba ve me msôrom i karen ikyaa la cii, gba u vea nôngo kpoghuloo vea de ieren la.—Mateu 5:29, 30.