Ka Nyi I Lu Mve u Kristu?
Mlumun u Bibilo i ne yô
Avur a Bibilo kpishi ôr kwagh u shighe u Kristu una va ôr ior i tar ne ijir la. * Ikyav i tesen yô, Mateu 25:31-33 kaa ér:
‘Zum u Wan u or [Yesu Kristu] Una va sha iengem Na a mbatyomov mba Shaav cii a Na imôngo yô, zum la Una tema sha ikyônough Nagh ki torough ki engem la; á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan. Una ver iyôngo ken uwegh Nagh ku yanegh, kpa ivo yô, Una ver i ken uwegh Nagh ku imesegh.’
Shighe u ijirigh la ka shighe u ior vea tagher a “zegecan,” i i gbe je uumace ve lu a vande tagher a mi ga yô. Zegecan ne una za kuusu sha ityav mbi Armagedon. (Mateu 24:21; Mpase 16:16) Mbaihyomov mba Kristu, mba a yer ve ken injakwagh na ér ivo la “vea ya mtsaha u mtim u tsôron.” (2 Mbatesalonika 1:9; Mpase 19:11, 15) Kpa mba jighjigh mba i yer ve ér iyôngo la di vea zua a “uma u tsôron.”—Mateu 25:46.
Ka hanma shighe Kristu una va?
Yesu kaa ér: “Kwagh u iyange la man shighe la yô, ma or fa ga.” (Mateu 24:36, 42; 25:13) Nahan kpa, yange pase kwagh ugen u ior vea nenge a mi, u una lu “ikyav” i tesen ér mve na zurum yô.—Mateu 24:3, 7-14; Luka 21:10, 11.
Kristu una va ken iyol i jijingi shin a lu ken iyol i inyam man awambe?
Yesu yange nder shin ku ken iyol i ijingi. Nahan tese ér una va shin tar ne ken iyol i jijingi, a lu ken iyol i inyam man awambe ga. (1 Mbakorinte 15:45; 1 Peteru 3:18) Ka nahan ve Yesu yange ôr kwagh ne a mbaapostoli nav sha iyange i lu u kpernan a wua un la ye, ér: “Mase shin ciôn man tar ua kera nenge a Mo ga.”—Yohane 14:19.
Mbamtsum mba ior kpishi ve lu a mi sha kwagh u mve u Kristu yô
Mtsum: Kwagh u Bibilo i kaa ér ior vea nenge Yesu una lu “van sha abeen a sha kwavaôndo” la inja na yô ér, Yesu una va noon.—Mateu 24:30.
Mimi: Ashighe kpishi Bibilo ka ia ôr kwagh a ter ibeenegh shin abeen a sha kwavaôndo yô, i lu kwagh u ken myer, u ashe aa fatyô u nengen a mi ga yô. (Levitiku 16:2; Numeri 11:25; Duteronomi 33:26) Ikyav i tesen yô, Aôndo yange kaa a Mose ér: “M ngu van hen a we ken ibeenegh ki iligh.” (Ekesodu 19:9) Mose yange nenge a Aôndo sha ashe noon ga. Kristu kpa ‘mve na u sha abeen a sha kwaghaôndo’ la ngu tesen ér ior vea kav mve na la, shin er vea nenge a na sha ashe noon ga nahan kpaa.
Mtsum: Mkaanem ma i nger sha kwagh u mve u Kristu ken Mpase 1:7 ér “hanma ashe aa nenge a Na” la, kape a lu vough je la.
Mimi: Asember a ken zwa Grika a i gem ken Bibilo ér “ishe” man “nenge” la, ka a ter a ajiir agen ken Bibilo yô, i ôron i lu ma kwagh u or nan kav ér ngu zan hemen, kpa nan nenge a kwagh shon sha ashe noon ga yô. * (Mateu 13:15; Luka 19:42; Mbaromanu 15:21; Mbaefese 1:18) Bibilo kaa ér Yesu u yange i nder un shin ku la “tema ken iwanger i i gande u mgbôghom her yô. Ma or . . . á fatyô u nengen a Na kpaa ga.” (1 Timoteu 6:16) Sha nahan yô, kwagh u i kaa ér “hanma ashe aa nenge a Na” la, inja na yô ér, ior cii vea kav er i lu Yesu Aôndo a tsough ér a va ôr tar ne ijir yô.—Mateu 24:30.
^ Ikyum. 1 Ior kpishi ka vea ôron kwagh u mve u Kristu yô, ve kaa ér ka “mve na u sha kwa har.” Nahan kpa Bibilo ôr kwagh u mve u Kristu u sha kwa har ga.
^ Ikyum. 9 Nenge takerada u i yer ér The New Thayer’s Greek-English Lexicon of the New Testament (1981), peeji 451 man 470.
Kwagh Ugen u Alaghga Shi Una Doo U Yô
IYOUKURA
Kristu Ngu Hiden Van Ér Una Va Er Nyi?
Kristu ngu hiden van ér una va er nyi? Una hide ken iyol i nyi, man ka nyi una er zum u una hide laa?
IYOUKURA
