Er Nan Ve I Yer Yesu Ér Wan u Aôndo?
Mlumun u Bibilo i ne yô
Ashighe kpishi Bibilo ka i yila Yesu ér, “Wan u Aôndo.” (Yohane 1:49) Ishember i “Wan u Aôndo” la tese ér ka Aôndo a gbe akaa cii shin a lu Imbor i uma, shi a gbe Yesu kpaa ye. (Pasalmi 36:9; Mpase 4:11) Bibilo tese ér Aôndo yange mar wan er uumace ve maren ônov nahan ve hingir Ter ga.
Bibilo shi i yila mbatyomov kpaa ér “ônov mba Aôndo” u mimi. (Yobu 1:6) Heela tseegh ga, Bibilo kaa ér Adam, u lu orumace u hiihii la lu “wan u Aôndo.” (Luka 3:38) Nahan kpa, er lu Yesu Aôndo yange hii gban shi gba un sha uwegh nagh yô, Bibilo yila Yesu ér Waniunda u Aôndo.
Yesu yange vande lun sha cii ve i va mar un shin tar yee?
Een. Yesu yange vande lun ortyom sha cii ve i va mar un shin tar ye. Yesu iyolna yange kaa ér: “M due sha.”—Yohane 6:38; 8:23.
Aôndo yange gba Yesu cii ve mase gban akaa agen ye. Bibilo ôr kwagh u Yesu ér:
“Un . . . ka waniunda ken akaa a i gbe a cii.”—Mbakolose 1:15.
Un ka “mhii u igbetar i Aôndo.”—Mpase 3:14.
Yesu yange kure kwaghôron u profeti u sha kwagh u or u i tsenga ôron ér, “mdugh Na hii tsuaa je sha ayange a ngise ngise la.”—Mika 5:2; Mateu 2:4-6.
Ka nyi Yesu yange lu eren sha cii ve mase van shin tara?
Yange lu sha ian i vesen sha. Yesu yange ter kwagh u ian i yange lu sha mi la zum u er msen kaa ér: “Tere, verem sha ian i icivirigh . . . sha ian i icivirigh i yange m vande lun sha mi ikyua a we shighe u i lu a gba tar ga la.”—Yohane 17:5.
Yesu yange wase Ter na u gban akaa agen cii. Yesu yange er tom vea Aôndo imôngo, er “or u fan tom nahan.” (Anzaakaa 8:30) Bibilo kaa ér: “Ka sha ikyev na [i Yesu] i gbe akaa agen cii ye, a sha man a shin tar.”—Mbakolose 1:16.
Aôndo yange na Yesu tahav gba akaa agen cii. Akaa a Yesu gba la wa mbatyomov man tar wase ne cii ker. (Mpase 5:11) Tom u Aôndo er vea Yesu imôngo ne lu er tom u orkperankwagh man ormaankwagh ka ve er sha iyou imôngo la nahan. Orkperankwagh ka nan kpela pelan u iyou, nahan ormaankwagh di nan tôô pelan shon, nan mase maan iyou la.
Yange lu Imo i Aôndo. Shighe u Yesu lu sha cii ve mase van shin tar la, Bibilo yila un ér “Imo.” (Yohane 1:1) Kwagh ne tese ér yange Aôndo una soo u lamen a mbatyomov shin ôron ve kwagh yô, a tindi Yesu a za lam sha ci na.
Shi ikyav tese ér, yange Aôndo una soo u lamen a uumace kpa a tindi Yesu a va lam a ve sha ci na. Nahan a shi nan kpa, lu Yesu Aôndo yange a tindi un ér a za lam a Adam man Ifa shighe u ve lu ken sule u Eden la ye. (Genese 2:16, 17) Shi ikyav tese ér alaghga ortyom u lu hemen Mbaiserael shighe u ve lu zenden ken taaikyôngo la kpa lu Yesu. Shi yange gba u vea ungwan imo na kpaa.—Ekesodu 23:20-23. *
^ Ikyum. 12 Ka Yesu u a lu Imo la tseegh yange Aôndo a tindi ér a za lam a ior shin a ôr ve loho ga. Ikyav i tesen yô, yange tindi mbatyomov nav mbagen ér ve za pase Mbaiserael mba sha yange a tsuaa la atindi a na.—Aerenakaa 7:53; Mbagalatia 3:19; Mbaheberu 2:2, 3.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Yesu Ka Aôndo Uhembanagee Ciili?
Yesu yange ôr ér nyi sha ian i un lu sha mi hen Aôndo?
MBAMPIN MBA BIBILO I NE MLUMUN SHA MI LA
Iti i Aôndo Ér Yesuu?
Mayange Yesu kaa ér un ngu Aôndo Uhembanagee ga. Sha ci u nyi?
