Mbafantakerada mba a ityôkyaa jim i lumun ér Yesu yange lu. Takerada u i yer ér Encyclopædia Britannica, u i gber ken nyom i 2002 la, ôr kwagh u mbafantakerada mba sha derianyom u hihii man u sha uhar yange ve ôr sha kwagh u Yesu man Mbakristu mba tsuaa yô, kaa ér: “Akaa ne cii tese ér sha ayange a tsuaa la, mbahendan a kwaghaôndo u Mbakristu je kpa mayange ve tunan kwagh u uma u Yesu ga, zan zan va lu ken mbee u derianyom u 18 man sha derianyom u sha 19, kua ken mhii u derianyom u sha 20 la, i va hii u nyiman kwagh na a atôakyaa a kuman ken ato ga ye.”

 Ken nyom i 2006 la, takerada u i yer ér Jesus and Achaeology la kar ér: “Ma orfantakerada u civirigh môm kpa nana nyiman ér Oryuda u i yilan ér Yesu wan u Yosev la yange lu ga ze; kpa mbakpishiv vea kaa ér, hegen se fa akaa kpishi sha kwagh u Yesu man ityesen na.”

 Bibilo tese ér Yesu ka or kpôô kpôô. Shi i pase ati a uter nav mba tsev man mba hen tsombor na kpaa. (Mateu 1:1; 13:55) Shi i tese ati a utor mba yange ve hemen hen shighe u Yesu la. (Luka 3:1, 2) Akaa a yange i pase vighe vighe la wase mbatôvon sha akaa u fan er kwagh u Bibilo i er la a lu u vough yô.