Yesu Yange Lu Nena?

KUHWA

Yesu Yange Lu Nena?

Mlumun u Bibilo i ne yô

Or môm fa er Yesu lu jighilii ga, sha ci u Bibilo pase se mluashe na ga. Kwagh ne tese ér mluashe u Yesu ka kwagh u vesen u i gbe u saa se fa ga. Nahan kpa, Bibilo pande ôr se akaa kpuaa a a wase se u kaven mluashe u Yesu yô.

Mlu na: Yesu yange lu Oryuda, nahan a shi nan kpa, bee ngô na, eren kwagh er Mbayuda nahan. (Mbaheberu 7:14) Ikyav i môm tese ér mluyol na yange kaha kposo a u ior mbagen ga. Shighe ugen la, Yesu mough Galilia yem ken Yerusalem myer a u or fan un shio. (Yohane 7:10, 11) Shi alaghga yange una lu vea mbahenen nav je kpa, i fa mkposo na a ve ga. Shi umbur wer, yange ikpelaior i lun a ikyav mbi tswamev va u va kôron Yesu, kpa ve fa or u nan lu Yesu ga, lu Yuda Isekarioti tese ve ye.—Mateu 26:47-49.
Ilihen i ice na i sha ityou: Ikyav tese wang ér a shi nan kpa ice i Yesu yange i lihe ga, sha ci u Bibilo kaa ér, “nomsoor ka nana̱ ume ityough i lu nan kwagh u kunya.”—1 Mbakorinte 11:14.
Indier: Yesu yange lu a ice shin gbem. Yange dondo tindi u Mbayuda u kaa ér nomsombaiorov ve ‘de tende indier ve ken akpe ga’ la. (Levitiku 19:27; Mbagalatia 4:4) Shi Bibilo yange i tsenga ôron kwagh u indier i Yesu ken kwaghôron u profeti ugen u ôr kwagh u ican i una ya yô.—Yesaia 50:6.
Iyol na: Akav nga kpishi a a tese ér Yesu yange taver iyol yô. Yesu yange a zende ukilomita imôngo shighe u lu eren tom na u pasen kwagh la. (Mateu 9:35) Yange wanger tempel u Mbayuda kwa har shi daa utebul mba mbamusaninyaregh haa inya. Shi shighe ugen la, tume akpa zenda ilev mbi ior lu teen ken tempel yô. (Luka 19:45, 46; Yohane 2:14, 15) Takeda u McClintock and Strong’s Cyclopedia la kaa ér: “Ityakeda ivangeli i i ôr kwagh u Yesu la wase se u fan ér Yesu yange taver iyol kpishi.”—Tihi IV, peeji 884.
Ishigh nagh: Yesu yange eren a ior kundu kundu shi mhôônom ma kôr un a ve nahan ikyav tese ér a lu sha ishigh sar sar. (Mateu 11:28, 29) Hanma or yange nan va hen a cii yange a sur nan ishima shi a wase nan. (Luka 5:12, 13; 7:37, 38) Mbayev je kpa yange vea lu vea na yô, i doo ve.—Mateu 19:13-15; Marku 9:35-37.

Akaa a sha mi ga a ior ve ôr sha kwagh u mluashe u Yesu yô

Kwagh u sha mi ga: Ior mbagenev ka ve nyiman ér Yesu yange lu or u ken Afrika sha ci u takeda u Mpase tôô ice na kar sha ikyondo, shi tôô angahar a na kar sha “togula u mondon.”—Mpase 1:14, 15, The New Jerusalem Bible.

Kwagh u mimi: I ôr akaa ken Takeda u Mpase sha “akav.” (Mpase 1:1) I ôr kwagh u ice i Yesu man angahar a na sha ikyav u pasen kwagh u aeren a Yesu shighe u i nder un shin ku la, lu kwagh u mluashe na shighe u lu shin tar la ga. Kwagh u Mpase 1:14 a kaa ér, “ityough ki” Yesu “man ice na kungu er ka ikyondo i sha aive a pupuu nahan, man er senou nahan” la, lu kwagh u kala u ice i Yesu ivur la lu ôron ye; lu u tôôn ice na karen sha ma kwagh ugen kposo ga. Kwagh ne tese kwaghfan u Yesu sha ci u a tsa kpishi.—Mpase 3:14.

Ikpande-angahar i Yesu yange lu er “togula u wang u i we ken atse, a lu mondon nahan.” (Mpase 1:15) Shi ishigh nagh “lu er iyange ka ia nyande ve i lu nahan.” (Mpase 1:16) Er nongoior môm kpa kwavyolough ve u lun er akaa a i ter heen ne nahan ga yô, a shi nan kpa, mpase u sha mnenge ne lu kwagh u sha ikyav, u tesen er Yesu a lu “ken iwanger i or a fatyô u mgbôghom a i ga yô.”—1 Timoteu 6:16.

Kwagh u sha mi ga: Yesu yange lu a mpe iyol ga.

Kwagh u mimi: Yesu yange lu or u taver ishima. Ikyav i tesen yô, shighe u ikpelaior i lun a ikyav mbi tswamev va u va kôron un la, Yesu tile her shi kaa ér un ngun. (Yohane 18:4-8) Shi ikyav tese ér Yesu yange taver iyol, sha ci u eren tom kapinta, man ikyav mbi tomough nav lu mbi sha ave.”—Marku 6:3.

Kpa er nan ve yange gba u a wase Yesu u tôôn kon u yange i za mande un sha mi laa? Shi er nan ve yange vande kpen a mba i mande un a ve imôngo laa? (Luka 23:26; Yohane 19:31-33) Cii ve i wua Yesu yô, Yesu vôr gbeda gbeda. Yange mem ga tugh jimin, shi alaghga ishima kpa lu zan un iyol. (Luka 22:42-44) Hen tugh mbura Mbayuda nzughul a na kpishi, shi sev mbu aven yô, Mbaroma er un ican tsung. (Mateu 26:67, 68; Yohane 19:1-3) Alaghga lu akaa ne na ve Yesu kpe fele ye.

Kwagh u sha mi ga: Yesu yange a lu kunya kunya shi a lu ure.

Kwagh u mimi: Yesu yange lu a aeren a Ter na Yehova kpa a lu a mi la. Man Bibilo kaa ér Yehova ka “Aôndo u sar sar.” (1 Timoteu 1:11; Yohane 14:9) Jighilii je yô, Yesu yange tese mbagenev akaa a vea er ve a saan ve iyol yô. (Mateu 5:3-9; Luka 11:28) Akaa ne cii tese ér Yesu yange a lu sha ishigh sar sar.