Takeda ugen u i gber sha ci u kasev mba kôron mar yô, kaa ér: “A tsa sha won kpa, atumba a ken pam pam a i ne anikyundanev la aa lu er atumba a orumace ga.” Ityôkyaa i môm i i ne ve atumba a ngô a hembe doon sha ci u anikyundan na yô, iyol i ngô la ka i geman atumba la sha er aa fatyô u nan anikyundan la kwagh u kwagh a gbe un a mi jighilii yô.

 Nenge ase: Hanma kwa u ngô nan lu nan wan atumba yô, wan la ka nana waan zwa u man je atumba la a hii u geman zan zan nan kar tsuwan zwa sha. Shighe u wanikyundan nan hii u man atumba la ka a hemba ngeen a mshiam ma nan or taver iyol man ma nan agee shi sôron iyol ker kua mngerem, kpa ka nana maan zan zan yô, atumba shon a va hemba ngeen a ahôm, maa wanye la nan ide. Er wanikyundan la nan lu vesen la, atumba a ngô la ka a geman u zuan sha anyom a nan kua shighe u ve lu ker la.

 Atumba a ngô ka a hemba ngeen a mshiam ma ka ma wase or u yaven la tugh, atetan di a hemba ngeen a mshiam ma nan or lun per la. Mshiam man ka ma wase wanikyundan la u yaven shin lun per shi ma na yô, i hoghor iyol i nan a shighe u yaven man u nderen.

 Ka a maren wanye kera yô, atumba a ngô u nan a due a zar ugen u lun agbedang ken ayange a dondon la, ka i yila zar atumbagh la ken zwa Buter ér colostrum. Zar a atumbagh ne ngu ngôôr soughon ga, shi ka u lu a mshiam ma nan akaa a injaa ken iyol kpishi, sha nahan yô, ka ua lu anikyundan la shin uya kpuaa tseegh kpa u wase nan kpishi. Zar a atumbagh u agbedang ne ka u lu a akaa a nôngon num a iangev kpishi, nahan kwagh la a kura anikyundan u a lu a taver ga la. Shi ka u wase anikyudan la u zan akôngo shi sôron nan iyav shimi sha er mbua soughon kwaghyan tsembelee yô.

 Shi ityôkyaa ka i lu i ishima ia nyian ungô ér atumba a a va yina wan ve ga, aluer ka ahina je kpaa sha ci u sha gbaaôndo je atumba la ka a seer sha er wanikyundan la nana ma a yina nan ga yô.

 U Nenge Nena? U nenge wer atumba a ngô aa a lu a akaa ker kpishi la gba duen abu tsôô? Shin i gba a gbaa?