Mbainjinia mba ve varen umashin mba ka ve eren tom er ka orumace nahan la, mba varen akaa a wasen mbatwerev u paven ior shighe u i gbe u vea pav or man i lu hen ijiir i hagher kpishi yô, a u paven ian kehen shio. Mashin ugen u mbainjinia mban ve var u wasen u eren kwagh ne yô, ka ken uwegh ku ankwagh u shin mnger ugen u i yer ér Octopus, ku ku lu lebe lebe la ve nenge ve var ye.

 Nenge ase: Ankwagh u uma u shin mnger u i yer ér Octopus ne, ka a kôr kwagh sha ave na a anigheni a ka a fatyô u naregh shi a lu lebe lebe la a tile a mi, shi a kam kwagh shon. Ka a fatyô u eren kwagh ne ape ian i lu hogholoo kpaa. Shi una fatyô u goom a ave na la yemen ken hanma vegher u a soo cii. Heela tseegh ga, shi una fatyô u taver ave na ne agen aa tile dông shighe u a soo yô.

 Mbatôvon sha akaa na jighjigh ér, aluer i er uwegh ku kua fatyô u lun lebe lebe shi nalegh shi goom yemen hanma vegher nahan yô, ku a wase shighe u i lu paven or ape i hagher kpishi yô. A fatyô u eren tom a imba mashin la u paven or u ipaven i nan ma i lu i vesen i i hagher kpishi yô, sha gbenda u a kera lu ipaven i vesen i i cimin ga yô.

 Nenge ase tahav mbu ave a octopus

 I var mashin u a eren tom er ka uwegh ku octopus nahan la shi mba eren tom a mi u paven ior sha igbenda i a na shio yô, ma i lu ipaven i vesen i i hagher yô. Vegher u uwegh ku mashin ne ku ka ku lihe i kuma inchi 5 la, ku a fatyô u kôron ikyav mbi kimi kenden a mi sha a u vihin mbi shio; maa vegher ugen la di a gema a paven or shon. Ortwer ugen u i yer iti na ér Tommaso Ranzani, u a lu môm ken mba yange ve var mashin ne yô kaa ér: “Se na jighjigh ser, er se var mashin ne nahan, a za hemen u varen mbagen, shi a seer akaa sha mi sha er vea hemba eren tom doon cii yô.”

 We u nenge nena? Uwegh ku ankwagh u uma u shin mnger u i yer ér Octopus la yange ku gba duen abu tsôô? Shin i gba a gbaa?