ER I HII VE I LU HANGE HANGE YÔ: Gba u ior vea yila sha iti i Yehova keng ve vea war ye. (Ro 10:13, 14) Nahan cii kpa, ka hanmaor u nan lumun ér i hen Bibilo a nan la, nan soo u dondon atindi a Yehova ga. Se soo u eren tom a shighe wase sha inja ken kwaghpasen sha u wasen mba ve soo u geman uma ve sha mimi, eren ishima Yehova la. Aluer se hen Bibilo a or shighe gôgônan, kpa nan ngu zan ikyura tsembelee ga yô, doo u se er kwagh sha kwaghfan, se de kwagh u nan, se gema se er tom a shighe wase u wasen mba Yehova a lu urugh ve van a mi hen a na man nongo na la. (Yoh 6:44) Kpa aluer ken hemen or shon nan va gema inja shi nan tese ér nan ngu a “ishima i mimi i zuan a uma u tsôron” yô, a saan se iyol u hiden hiin Bibilo i henen a nan.—Aer 13:48, NW.

ER SE ER KWAGH NE YÔ:

• Wuese or u henen Bibilo a nan la er nan soo u zuan a mfe u vough la yô.—1Ti 2:4

• Pase var var er i lu hange hange u nana dondo kwagh u nan lu henen la yô.—Lu 6:46-49

• Time sha injakwagh i Yesu i ortanivor la vea nan sha kwaghfan, maa pine nan kwagh u alaghga a lu yangen nan u zan ikyura la.—Mt 13:18-23

• Pase nan sha kwaghfan er i hii ve u lu den kwaghhenen a nan yô

• Kaa a nan wer u va nengen a nan sha ashighe ashighe u taver nan ishima, shi aluer nan sôr akaa ken uma u nan yô, u hide u hii kwaghhenen a nan

NENGE VIDIO SHON, MAA NA MLUMUN SHA MBAMPIN MBA VE DONDO NE:

• Ka nyi u hen ken iliam la i i tese ér orhenen Bibilo la ngu zan ikyura ken jijingi ga?

• Orpasenkwagh la wase orhenen Bibilo la u nengen ér gba u una sôr akaa ken uma na nena?

• Orpasenkwagh la ôr kwagh u tesen ér a ver ishima u hiden hiin kwaghhenen vea orhenen Bibilo la ken hemen nena?