Yehova soo ér se civir un sha ci u un doo se ishima. (Mt 22:37, 38) Aluer Yehova doo mba se henen Bibilo a ve la ishima yô kwagh la una wase ve u geman uma ve shi tilen dông shighe u i lu tôvon ve a ican yô. (1Yh 5:3) Shi aluer Yehova doo ve ishima yô kwagh la una mgbegha ve u eren batisema.

Wase mba u henen Bibilo a ve la ve fa er ve doo Yehova ishima yô. Pine ve mbampin amba er, “Ka nyi kwagh ne a tese u sha kwagh u Yehova?” shin “Kwagh ne tese ér u doo Yehova ishima nena?” Tese ve ve kav er Yehova a lu wasen ve jighilii yô. (2Kr 16:9) Ôr ve er Yehova a ongo mbamsen ou yô, shi ôr ve wer ve ver ishima ve fa igbenda i Yehova a ungwa mbamsen vev jighilii yô. Yehova ka una doo mba se henen Bibilo a ve la ishima shi ve kpa vea fa er ve doo Yehova ishima shi vea soo u lun azende a na yô i saan se iyol kpishi.

NENGE VIDIO I WASE MBA U HENEN BIBILO A VE LA VE̱ YA IJENDE A YEHOVA LA, MAA NA MLUMUN SHA MBAMPIN MBA VE DONDO NE:

• Ka zayol u nyi Jade a tagher a mi?

• Neeta wase Jade nena?

• Jade nôngo a zayol la nena?