I pase inja i ijende ér ka “ior mba ve doo ayol a ve sha mimi shi ve lu kôôsôô yô.” Ikyav i tesen yô, Yonatan man Davidi yange ve hingir azende a kôôsôô shighe u Davidi wua Goliati la. (1Sa 18:1) Hanma ve yange nan lu a aeren a doon orgen. Nahan azende a kôôsôô ka a fa ayol a ve tsembelee. Man u fan or la ka i tôô shighe shi i gba u u nôngo kwagh kpoghuloo. Nahan kpa sha ajiir a sha Intanet yô ior ka ve hingir “azende” a u fan ayol a ve shio. Sha ci u sha ajiir a lamen a ior sha Intanet yô, ior ka ve yer mlu ve, ve gema ve er shin ve ôr akaa a aa na kwagh ve a doo mbagen yô. Sha nahan yô, hemba doon u se tsua mba vea lu azende ase sha Intanet la sha kwaghfan. Aluer u fa or ga man nan tindi u a loho ér u lu ijende i nan yô, de cian u vendan wer ishima a va vihi nan yum ga. Mbagen tsua u eren tom a ajiir a lamen a ior sha Intanet la ga, sha ci u akaabo a aa fatyô u due ker la. Nahan kpa, aluer u tsua u eren tom a ajiir a lamen a ior sha Intanet la yô, ka nyi i doo u u lu a mi ken ishima?

NENGE VIDIO I EREN AKAA SHA AJIIR A SHA INTANET A LAMEN SHI TINDIN IOR A ILYOHO HER LA SHA KWAGHFAN LA, MAA NA MLUMUN SHA MBAMPIN MAB VE DONDO NE:

• Ka nyi i doo u u hen sha mi cii ve u nger ma kwagh shin u ver ufoto sha Intanet?

• Er nan ve i doo u u tsua azende sha ajiir a lamen a ior sha Intanet la sha kwaghfan?

• Er nan ve i doo u u ver a ver shighe u lamen a ior sha Intanet?—Ef 5:15, 16