1 Mbakorinte 4:1-21
4 Doo u ma i nenge se ér se mba mbaeren tom mba ve lu sha ikyev i Kristu yô,* man mbanengen sha ya mba i we ve icighan kwaghmyer u Aôndo sha ikyev yô.
2 Sha nahan yô, i ver ishima ér mbanengen sha ya ve lu a mimi iyol.
3 Nahan mo yô, aluer nea tôv kwagh wam, shin ma atejir* u uumace tôv kwagh wam kpa, kam ityôkyaa cuku kpaa ga. Jighilii yô, mo iyol yam je kpa m tôvon kwagh wam ga.
4 Gadia mo iyol yam m fa ma kwaghbo u m er ga. Kpa ngula tese ér m ngu orperapera ga; un u a tôvon kwagh wam la ka Yehova.*
5 Sha nahan yô, er shighe a lu a kuma ga ne, de ôron nen or ijir ga, zan zan saa Ter una va. Una va due a akaamyer a ken ime la ken iwanger, shi una pase akaa a ior ve henen ken asema la, tsô hanma or Aôndo a wuese nan.
6 Nahan, anmgbianev, m tôô akaa ne m kar sha kwagh wam man u Apolo sha ci u iwasen yen, sha er ne hen tindi ne hen a vese yô, a kaa ér: “De eren nen kwagh i karen akaa a i nger la ken inya ga,” sha er ne kera lu mbamoron iyol, sangen a sange ior ga yô.
7 Ka nyi i ne ve u hen wer u hemba orgene? Jim je yô, ka nyi u lu a mi ve i ne u a na ga? Man aluer mimi je i na u a na yô, er nan u lu tan ihyagh inja er i na u a na ga nahana?
8 Ne zua a hanma kwagh u ne soo cii kera vee? Ne hingir yôughyôugh kera vee? A vese shio kpa ne hingir ator zee? Mimi je, sarem pe hegen ma ne lu ator, sha er se kpa se ya tor a ven imôngo yô.
9 Gadia kam er Aôndo ver se mba se lu mbaapostoli ne ér se̱ lu mba masen nyôron ken agirigi u anumbegh sha u ior cii ve nenge a vese, inja er i kure se ijir i kuugh nahan. Gadia tar cii, kua mbatyomov man ior, yar u kenger se.
10 Se mba abumeaior sha ci u Kristu, kpa ne mba mbafankwagh ken Kristu; se taver ga, kpa ne yô, ne taver; ior mba nan ne icivir, kpa se yô, mba nengen se ityôkyaa ga.
11 Zan zan hegen* kpa, se mba ijen shi imura ngi kôron se, se mba a akondo a injaa ga,* mba gbidyen se* shi se mba a ya ga,
12 shi se mba yan ican, eren tom sha ave a ase. Ior ka vea tuhwa se kpa, se sôn iveren sha ci ve, vea tôvon se a ican kpa, se wa ishima her;
13 ior ka vea lam sha a vese dang kpa, se gema se lam a ve sha imo i legh legh;* se hingir tar ne ihyôghonov, ijumbu i hanma kwagh cii, zan zan hegen.
14 M ngu ngeren akaa ne ka sha u heen ne ga, kpa ka sha u wan ne kwagh, er ne lu ônov av mba doon mo ishima yô.
15 Aluer nea lu a mbayesen ne* ken Kristu 10,000 kpa, ne mba a uter kpishi ga; gadia sha kwagh u Kristu Yesu yô, m hingir ter wen sha loho u dedoo u m pasen la.
16 Sha nahan yô, m ngu wan ne kwagh mer, hingir nen mbakaven mo.
17 Ka nahan m lu tindin Timoteu hen a ven ye; gadia un ka wan wam u doon mo ishima man u jighjigh ken Ter. Una umbur ne igbenda yam i eren Kristu Yesu tom, vough er m tesen hanma ijiir ken hanma tiônnongo kpaa nahan.
18 Mbagenev ken a ven hen ér m kera ngu van hen a ven ga, nahan mba moron iyol.
19 Kpa m ngu van hen a ven fefa, aluer ka ishima i Yehova* yô, nahan me va fa kwagh u mbamoron iyol mbara ve lu ôron la tseegh ga, a kua tahav vev kpaa.
20 Gadia ka sha kwaghôron i fe ér Tartor u Aôndo ngu hemen or ga, kpa ka sha tahav mbu Aôndo.
21 Ka nyi ne soo? M̱ va hen a ven a akpaa?* Shin m̱ va a dooshima man ishima i legh leghe?
Ngeren mba shin kpe
^ Shin “se mba mbayev mba Kristu.”
^ Shin “koti.”
^ Nenge Ngeren u Pasen Asember.
^ Zwa Grika, “hen ihwa ne.”
^ Zwa Grika, “se mba idyelegh.”
^ Shin “mba tan se ave ikyôr zenden a mi.”
^ Zwa Grika, “se zamber a zamber.”
^ Shin “atica a.”
^ Nenge Ngeren u Pasen Asember.
^ Shin “gbougho?”
