1 Mbatesalonika 1:1-10
1 Mo Paulu, m ngu vea Sivanu* man Timoteu, m ngu ngeren hen tiônnongo u Mbatesalonika, u a lu ken mzough vea Aôndo Ter man Ter Yesu Kristu la:
Aôndo a̱ tese ne erdoo u sha mhôôn shi a̱ na ne bem.
2 Ka se shi sughun Aôndo sha kwagh u hanma wen ken mbamsen asev,
3 gadia se mba umbur tom u ne lu eren sha mimi la hanma shighe cii, kua tom u ne lu eren sha dooshima la, man er ne lu wan ishima sha ci u ishimaverenkeghen i ne lu a mi sha kwagh u Ter wase Yesu Kristu, sha ishigh ki Aôndo Ter wase la.
4 Gadia se fa er Aôndo a tsough ne yô, ne anmgbianev mba doon un ishima,
5 sha ci u loho u dedoo u se pasen ne yange u ar a ven sha kwaghôron tseegh ga, kpa kua sha utaha man sha icighan jijingi man sha jighjigh u nan taveraa, vough er yange ne fa ambaaior a se lu hen atô wen sha ci u iwasen yen la nahan.
6 Nahan ne hingir mbakaven se man Ter kpaa, gadia ne ngohol loho ne sha ican tsung, kpa icighan jijingi na ne lu ember,
7 nahan ne hingir ikyav hen mbananjighjigh mba ken Masedonia man Akaya cii.
8 Jighilii yô, ka loho u Yehova* ú ne pase ken Masedonia man Akaya la tseegh i ongo ga, kpa i ungwa kwagh u jighjigh u ne ne Aôndo la hanma ijiir cii, nahan ityôkyaa kera ngi i se ôr kwagh ga.
9 Gadia ve ayol a ve ka ve zer ôron kwagh u yange se va hen ven sha kwa u hiihii la, man er yange ne de u civir ieev yenev, ne gema hen Aôndo sha u ne er Aôndo u uma man u mimi la tom,
10 man sha u ne kegh mve u Wan na u sha, u yange nder un shin ku la, ka Yesu u a lu yiman se sha u se war iyugh i i lu van la je la.
