Filemon 1:1-25
1 Mo Paulu, i wuhem ken purusu sha kwagh u Kristu Yesu, m ngu vea anmgbian wase Timoteu, se mba sughun we Filemon, we u u eren tom a vese imôngo, shi u doo se ishima la,
2 shi se mba sughun Apia, anmgbian wase u kwase, man Arekipu, u a lu orshoja a vese imôngo la, kua tiônnongo u a kohol hen ya wou la kpaa:
3 Aôndo Ter wase man Ter Yesu Kristu ve̱ tese ne erdoo u sha mhôôn shi ve̱ na ne bem.
4 Ka m shi sughun Aôndo sha kwagh wou ken mbamsen av,
5 gadia m ngu ungwan kwagh u jighjigh u nan wou man er Ter Yesu kua uicighanmbaiorov cii ve doo u ishima yô.
6 M ngu eren msen mer akaa a se ne jighjigh a mi la ma a wase u u fan hanma kwagh u dedoo u se zough a mi sha ikyev i Kristu cii.
7 Gadia, anmgbian, m ungwa kwagh u dooshima wou nahan saan mo iyol shi kundum iyol kpishi, sha ci u uicighanmbaiorov zua a ishimataver sha ikyev you.
8 Sha ityôkyaa ne yô, m ngu a ian i ôron kwagh a we gbar gbar ken Kristu er m soo la cii, mer er kwagh u vough ne,
9 nahan cii kpa, sha ci u dooshima yô, m ngu zamber a zamber a we, gadia u nenge er mo Paulu m lu organden, shi hegen i wuhem ken purusu sha kwagh u Kristu Yesu yô.
10 M ngu zamber a we sha ci u wan wam, Onesimu, u m va hingir ter na er m lu ken purusu* ne.
11 Ngise la lu u a iwasen ga, kpa hegen yô, ngu u a iwasen kua mo kpaa.
12 M ngu tindin un mer a̱ hide a̱ za kohol we, un u a doom ishima tsung ne.
13 Sarem u ma a lu heen vea mo ma a wasen mo, sha ityough ki ma i lu we ma u lu va wasen mo tom hen shighe u m lu ken purusu sha ci u loho u dedoo ne la.
14 Kpa m soo u eren kwagh ne a u we nan mo ian shio ga, sha er u tese erdoo wou la, a lu sha mkighir ga, kpa a lu sha ishima you je yô.
15 Alaghga tsô ka kwagh u a ne ve a undu u hen anshighe kpuaa* je ne, sha er una hide a lu vea we gbem yô;
16 una kera lu kpan ga, kpa una hemba kpan, una lu anmgbian u doon se ishima u sha iyol man u ken Ter, hemban je yô sha ci wam, kpa a hemba lun sha ci wou cii.
17 Nahan aluer u nenge wer m ngu ijende you* yô, ngohol un sar sar, er a lu mo kpa u er nahan.
18 Shi aluer a er u ma kwaghbo shin a ya u kwagh yô, mo me kimbi u.
19 Mo Paulu, m ngu ngeren we sha uwegh agh je: Me hide u a kwagh shon; man we je yô, u hemba ngun mo a injô cii, ka uma wou jim je.
20 Nahan yô, anmgbian, ma u nem iwasen sha kwagh ne sha ci u Ter; na ishima i gbam shimi sha ci u Kristu.
21 M ngu a vangertiôr mer u ungwam, nahan m ngu ngeren we, sha ci u m fa dedoo mer u er a hemba kwagh u m kaa ne je kpaa.
22 Kpa kwagh ugen yô, sôrom ijiir i tsan, gadia m ngu veren ishima mer, sha iwasen i mbamsen enev yô, me hide hen a ven.*
23 Epafera, u a lu ken purusu sha kwagh u Kristu Yesu er mo nahan la,* ngu sughun we,
24 shi Marku man Aristareku kua Dema man Luka, mba se eren tom imôngo ne kpa mba sughun we.
25 Ter Yesu Kristu a̱ za hemen u tesen ne erdoo na u sha mhôôn sha ieren yen i dedoo* la.
Ngeren mba shin kpe
^ Zwa Grika, “ken uikyangen.”
^ Zwa Grika, “ken ihwa i môm.”
^ Shin “or wou.”
^ Shin “a pasem me hide hen a ven.”
^ Zwa Grika, “u a lu orkwar vea mo la.”
^ Zwa Grika, “sha jijingi u ne tesen.”
