Mbaroma 11:1-36
11 Nahan m ngu pinen mer, Aôndo venda ior nav shinii? Mayange ga! Gadia mo kpa m ngu Oriserael, u ken ônov mba* Aberaham, m due ken ipyaven i Benyamin.
2 Aôndo venda ior nav mba yange hii fan la ga. Ne fa kwagh u ruamabera a ôr sha kwagh u Eliya, zum u a gba Iserael ijir hen Aôndo la gaa?
3 A kaa ér: “Yehova,* ve wua uprofeti ou, atse a ou a nan nagh sha mi la kpa ve hembe, ka mo tseegh m mase shin her ye, man hegen mba keren u wuan mo.”
4 Kpa Aôndo gema kaa a na ér nyi? A kaa ér: “M shi a ior her 7,000, mba ve gure Baal inya ga yô.”
5 Nahan kape sha shighe ne kpa asande a mba Aôndo a tsough ve sha erdoo na u sha mhôôn la kpa a shi her je la.
6 Nahan, aluer ka sha erdoo u sha mhôôn yô, kera ka sha ityom i eren ga; aluer ka nahan ga yô, erdoo u sha mhôôn la una kera lu erdoo u sha mhôôn ga.
7 Nahan shi se kaa ser nyi? Lu Iserael cica cii zua a kwagh u lu keren sha gbashima la ga, kpa lu mba i tsough ve la tseegh zua a mi ye. Mbagen cii asema a ve cighir,
8 vough er i nger nahan, ér: “Aôndo na ve jijingi u yaven mem mem,* man ashe a nengen a kwagh ga, kua ato a ungwan kwagh ga, zan zan nyian.”
9 Davidi kpa kaa ér: “Uiniongo* vev ve̱ hingir ve kwaghhônon man kwar, man kwagh u nan ve gbeev mbu nôngon kua mtsaha.
10 Ashe a ve a̱ wa ime sha er vea fatyô u nengen ga yô, shi na ve̱ ngughur igyundu gbem.”
11 Nahan, m ngu pinen mer, Ve nôngo gbeev ve gba ve saa heree? Mayange ga! Kpa gbeev vev mbura na yô, ior mba ken akuraior agen gema zua a myom, sha er ve di vea gba iyuhwe yô.
12 Nahan aluer gbeev vev mbura gema va tar a averen, shi iyenge ve i i pande la va ior mba ken akuraior a averen yô, shighe u iyenge ve ia iv la je yô, averen aa hemba ngeen cii!
13 Nahan m ngu lamen a ven, ne ior mba ken akuraior agen. Er m lu apostoli u i tindi hen akuraior yô, m ngu tesen er tom wam u lum kwagh u icivirigh yô,
14 sha u me nenge, aluer ka u me na ior av vea gba iyuhwe, nahan me yima mbagenev ken a ve yô.
15 Gadia er i vende ve man kwagh ne a bugh gbenda u himen tar a Aôndo yô, shighe u a va lumun ve la je yô, a lu nena? A kera lu inja er i nder ve shin ku ve hide mba uma nahan gaa?
16 Shi aluer anivur u ijenmwe u iyiagh ki i hii sundan,* u i ne nagh a mi la ka icighankwagh yô, ijenmwe la jimin cii kpa ka icighankwagh; shi aluer mise u kon ngu icighankwagh yô, agbaa a u kpa nga icighankwagh.
17 Nahan kpa, i asegh agbaa agen sha kon u olev kera, i va a we, we u u lu gbaa u kon u olev u ken toho ne, i va zor u hen atô u agen a a shi her la, ú hingir u zuan a mzeram ma ken mise u kon u olev la,
18 kpa de manger sha* agbaa la ga. Aluer u manger sha* a yô, umbur wer ka we u kôr mise la ga, kpa ka mise la u kôr u u til ye.
19 Alaghga u kaa wer: “Yange i asegh agbaa kera sha er a zorom sha u yô.”
20 Ka mimi! Yange i asegh ve kera sha ci u ve ban a jighjigh, kpa we yô, u tile ka sha jighjigh u nan. Nahan de moron iyol ga, kpa i cier we iyol.
21 Aluer Aôndo de agbaa a sha gbaaôndo la ga yô, we kpa una de u ga.
22 Nahan yô, hen sha kwagh u erdoo u Aôndo kua mtsaha na la. Mtsaha ngu sha ci u mba ve gbe la, kpa we yô, ka erdoo u Aôndo, aluer u za hemen u eren akaa a una tese u erdoo na yô; u er nahan ga yô, we kpa una tôndo u kera.
23 Mbara kpa aluer ve za hemen u banen a jighjigh ga yô, a hide a zor ve her, sha ci u Aôndo una fatyô u hiden zoron ve her.
24 Gadia aluer yange i tôndo u sha kon u olev u ken toho kera, i va zor u sha kon u olev u ken sule sha gbaaôndo ga yô, mban mba ve lu agbaa a sha gbaaôndo la je yô, a hide a ve a zor sha kon u olev u i tôndo ve sha mi la je ka u henen a hen ga!
25 Anmgbianev, m soo mer fa nen icighan kwaghmyer ne, sha er ne kera hingir mbafankwagh sha mnenge wen ga yô: Mbaiserael mbagenev cighir asema, shi vea lu nahan zan zan iyenge i ior mba ken akuraior mba i gbe u a va a ve la ia kar ivin,
26 man ka sha gbenda ne a yima Iserael cii ye. Ka vough er i nger nahan, ér: “Oryiman una due ken Shion una dugh iferkwagh ken Yakob kera.
27 Shi ka ikyuryan yam a ve je ne, zum u me tôô asorabo a ve kera yô.”
28 Ka mimi, sha gbaa u loho u dedoo la yô, mba mbahyomov sha ci u iwasen yen; kpa sha gbaa u Aôndo a lu tsuan ior la yô, ve doo un ishima ka sha ci u uter vev.
29 Gadia Aôndo una vaa afanyô sha uiyua mba a ne la ga, kua sha myer u a lu yilan ior la ga.
30 Er ngise ne lu mba hemban Aôndo ato, kpa hegen i zungu ne mhôônom sha ci u ihyembeato ve la nahan,
31 kape Mbayuda kpa ihyembeato ve la i ne i lu zungwen ne mhôônom hegen, sha u ve kpa a zungwe ve mhôônom hegen je la.
32 Gadia Aôndo wa ior cii ken mbahembanato, sha er una zungwe ve cii mhôônom yô.
33 Sha mimi yô, averen a Aôndo ngee, shi kwaghfan na man mfe na za shimi tsung! Ajiraôron a na gande u timen sha mi, igbenda na kpaa gande u tôvon fan!
34 Gadia “ka an nan fe ishima i Yehova,* shin ka an nan lu or u wan un kwagha?”
35 Shin “ka an nan hii nan un kwagh ve i gbe u una hide nan a mini?”
36 Gadia akaa cii due ka hen a na, shi ka un a ne a lu ye, man ka sha ci na kpaa. Icivir i̱ lu i na gbem sha won. Amen.
Ngeren mba shin kpe
^ Zwa Grika, “vor u.”
^ Nenge Ngeren u Pasen Asember.
^ Shin “na ve gba mnyam sha akaa a ken jijingi.”
^ Zwa Grika, “Utebul.”
^ Shin “iyiagh ki tsutswagh.”
^ Shin “de kaan ihyagh a.”
^ Shin “u kaa ihyagh a.”
^ Nenge Ngeren u Pasen Asember.
