Itinekwagh 16

Kwagh u Ú Tsough wer Ú Civir Aôndo La

Kanyi i gbe u ú er keng ve ú hingir huror u Aôndo? (1, 2)

Ka nena ú tsegha iyol you hen Aôndo? (1)

Ka hanma shighe i doo u ú er batisema? (2)

Ka nena ú zua a agee a kôron jighjigh u nan hen Aôndo hereghe? (3)

1. U hingir huror u Aôndo yô, saa ú zua a mfe u dedoo u mimi u Bibilo (1 Timoteu 2:3, 4), ú na jighjigh ken akaa a ú hen la (Mbaheberu 11:6), ú zungwe sha asorabo ou (Aerenakaa 17:30, 31), shi ú gema mlu u uma wou. (Aerenakaa 3:19) Nahan yô dooshima wou hen Aôndo a̱ mgbegha ú u tseghan iyol you hen a na. Ngun inja na yô we iyol you, ken msen u ken iuv ú kaa a na wer ú ngu nan un iyol you sha u ú er ishima na yô.—Mateu 16:24; 22:37.

2. Ú tseghan iyol you hen Aôndo kera yô, doo u a er ú batisema. (Mateu 28:19, 20) Batisema ka a na hanma or nan fa er ú tsegha iyol you hen Yehova. Nahan batisema ngu sha ci u mba ve vese i kom u vea tsua u eren Aôndo tom la tseegh. Zum u i er or batisema yô, i̱ mir iyol i nan cii shin mnger fese man i̱ dugh nan. *—Marku 1:9, 10; Aerenakaa 8:36.

3. Ú tseghan iyol you kera cii yô, Yehova una ver ishima er we u̱ za hemen u eren sha ityendezwa you la. (Pasalmi 50:14; Orpasenkwagh 5:4, 5) Diabolo una nôngo sha u yangen we u eren Yehova tom. (1 Peteru 5:8) Kpa kporom ikua hen Aôndo ken msen. (Mbafilipi 4:6, 7) Henen Mkaanem nav hanma sev. (Pasalmi 1:1-3) Var ken tiônnongo. (Mbaheberu 13:17) Sha u eren akaa ne cii yô, ú zua a agee a lun jighjigh hen Aôndo. Sha nahan yô ú fatyô u eren akaa a Aôndo a soo her a we la gbem sha won!

[Ngeren u shin kpe