U Zuan a Mkpeiyol ken Uma u ken Tsombor
Ityough 29
U Zuan a Mkpeiyol ken Uma u ken Tsombor
1. (a) Yange tsombor hii nena? (b) Kanyi yange Aôndo washima sha kwagh u tsomboro?
ZUM u yange Yehova Aôndo gba or u hiihii la vea kwase yô, a zua ve uhar cii sha er ve̱ seer tsombor yô. (Genese 2:21-24; Mateu 19:4-6) Yange i lu awashima u Aôndo sha u ve̱ seer sha ônov mba maren. Nahan, zum u mbayev mbara vea vese yô, ve kpaa vea er kasev sha u ve di kpa maan icombor ve yô. Yange i lu awashima u Aôndo u, ken hemen yô, icombor la ia samber á tser tar cii shi ia lu ken msaanyol kpaa. Shi ia gema tar cii ua hingir paradiso u doonashe.—Genese 1:28.
2, 3. (a) Ka sha ci u nyi a na Aôndo ibo sha mvihi u tsombor ga? (b) Kanyi i lu hange hange i eren sha u ember mlu u ken tsomboro?
2 Nahan cii kpaa, icombor hingir saren saren nyian, i i lu ken mzough la kpa ngi ken msaanyol ga. Alaghga orgenegh nana pine er: ‘Aluer ka Aôndo yange gba tsombor jim yô, kera ka mdoo ma se nenge a mi ye gaa?’ Nahan kpaa, á fatyô u waren aa Aôndo sha ciu mvihi u tsombor ga. Alaghga orvareniwa nana var kwagh shi nana na atindi sha er á yar tom a kwagh la yô. Nahan á ná orvareniwa la ibo sha ciu kwagh la kera er tom doo ga aluer or u yamen la kera dondo atindi la ga yum shinii? Mayange ga. Aluer yange a̱ va̱r kwagh la tsembelee je kpaa, una er tom a doo ga sha ci u i yar tom a mi sha inja ga yum. Kwagh u tsombor kpa kape a lu vough je la.
3 Yehova Aôndo na akaawan ken Bibilo sha kwagh u mlu u ken tsombor. Kpa aluer i venda akaawan ne yô, kanyi ia eree? Shin er mver u tsombor la lu vough nahan kpaa, ua fatyô u paven. Mba ken tsombor mbara vea kera saan ga. Sha vegher u genegh yô, aluer i dondo sha akaawan a ken Bibilo la vough yô, kwagh la una na tsombor ua lu sha inja, ken msaanyol kpaa. Nahan yô, ka hange hange, sha u se fa er yange Aôndo er alegh aa tsombor kposo kposo, kua ityom i yange wa ishima sha u ve̱ eren kpaa yô.
ER YANGE AÔNDO GBA OR MAN KWASE LA
4. (a) Kanyi mbamkposo ve lu hen atô u nomso man kaseva?
4 Hanmaor nana fatyô u nengen je er yange Yehova gba ior kwagh môm aa kasev ga. Ka mimi sha igbinda i genegh yô mba kwagh môm. Kpa mbamkposo mbá sha mluiyol ve kua sha mlu u mar la kpaa. Shi, mbamlu vev mba ken ishima mba kposo kposo. Hii nan mbamkposo ve lu? Yange Aôndo gba ve nahan sha u wasen ayol a ve sha igbinda kposo kposo. Yange Aôndo gbe or been kera yô, Aôndo kaa er: “Doo u or nana lu tswen ga; yô, Me er nan orwasen u lun er nan nahan.”—Genese 2:18.
5. (a) Yange i er kwase er á lu “orwasen” or nena? (b) Ka hanma ijiir yange i kange ivaa i hiihii laa? (c) Ka sha ci u nyi ivaa ia fatyô u lun kwagh u nan msaanyolo?
5 Kwagh u wasen ka kwagh u ka a zua shin á kôr vough sha kwagh u genegh, sha u masen ivin kwagh la vough yô. Yange Aôndo er kwase sha u a kuma sha or vough sha u wasen un sha er una yar tom sha akaawan a Aôndo lu̱ ná sha u ivin tar shi sôron u kpaa la. Nahan yange gbe kwase sha hwan u or yô, Aôndo maa zua ivaa i hiihii ken sule u Eden sha u ‘van a na hen or la.’ (Genese 2:22; 1 Mbakorinte 11:8, 9) Mver u ivaa ka kwagh u lun a msaanyol sha ci u yange i gba or vea kwase la a isharen i orgenegh nan lu a tahav u masen ivin i yô. Mbamkposo vev mbara iv vough hen ayol a ve. Zum u nom man kwase ve lu a mkav man iwuese hen ayol a ve shi ve zough sha u eren ityom ve vough yô, hanmô ve nana wa uwegh sha u maan ya u saaniyol.
TOM U NOM
6. (a) Ka an yange i ver er nena lu ityough ken tsomboro? (b) Ka sha ci u nyi i doo shi i lu vough u eren nahana?
6 Gba u ivaa shin tsombor ua lu a orhemen. Nahan yange i gba or nan hemba lun a mbamlu man agee a lun orhemen. Sha ityôikyaa ne yô Bibilo i kaa ere: “Gadia nom ka ityough ki kwase di er Kristu kpaa A lu ityough ki tiônnongo Na nahan.” (Mbaefese 5:23) Kape kwagh ngu a lu je la, sha ci u hen ape orhemen nan lu ga yô mzeiyol ngu a lu kua injughulkwagh. U tsombor u lu a ityough ga yô a lu inja er or ngu nôngon u nahan mato a kwagh u kôôm un shio nahan. Shi aluer gba u kwase una gba gesa a ityough kila yô, a lu vough er mato ngu a mbanahan un shimi uhar, hanmaor nan ver ishigh vegher u nan a kwaghkôôm kposo kposo nahan.
7. (a) Ka sha ci u nyi kasev mbagenev ve soo kwagh u nomsoor lun ityough la ga? (b) Hanmaor ngu a ityoughoo, ka sha ci u nyi mver u Aôndo a ver ityough la i lu sha kwaghfana?
7 Nahan cii kpaa, u nom a lu ityough ki tsombor la kasev kpishi soo kwagh la ga. Ityôkwagh jim yô noov kpishi ve dondo akaawan aa Aôndo a we sha kwagh u hemen la ga. Nahan cii kpaa, kwagh u i fe un wuee yô u ma nongoior u za sha inja yô saa orhemen nana lu u nan atindi shi u kaan imo i kulen hanmakwagh sha akaa a kwagh a gbe shami la. Ka kwagh ne Bibilo i kaa nahan ye er: “Ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo je.” (1 Mbakorinte 11:3) Ken mver u Aôndo yô, ka Aôndo tseegh orgenegh nan lu ityough sha a na ga ye. Hanmaor u genegh cii, wa Yesu Kristu kpa keregh, kua noov man kasev cii, gba u vea ngohol ityesen man u lumun a kwaghôron u mbagenev.
8. (a) Sha u lun ityough la ka ikyav i ana i doo u noov vea dondo ii? (b) Kanyi ityesen noov vea hen ken ikyav laa?
8 Inja na yô u noov ve̱ er tom ve vough yô, ka keng saa ior vea kav e̱r Kristu a lu ityough sha a ve yô. Shi, ka keng saa vea dondo ikyav na la sha u hemen kasev vev vough er á eren a tiônnongo u mbadondon un nahan. Yange Kristu eren a mbadondon un shin tar nena? Hanma shighe yô yange i lu sha gbenda u doon a ikyo i wan kpaa. Yange lu or u nyoon ishima shin u wan-ishima ga yum kpaa ga, shin zum u yange vea kera kav ityesen na fese ga je kpaa. (Marku 9:33-37; 10:35-45; Luka 22:24-27; Yohane 13:4-15) Je yô, á ná uma na sha ci ve a ishima i môm. (1 Yohane 3:16) Nahan nom u a lu Orkristu yô a time tsembelee sha ikyav i Kristu la, shi a nôngo sha agee a na cii u dondon shami sha ieren na a tsombor na. A lu nahan yô, una kera lu ityough ki tsombor ki lun a inja i nom-or, shin wan iyol i ki iko tseegh shi wan mbagenev ikyo ga la kpaa ga.
9. (a) Kanyi kasev kpishi ve gbe ahon shami yumu? (b) Sha u tesen hemen sha kwaghfan yô kanyi i gbe u noov vea lu a mi ken ishima ve?
9 Nahan cii kpaa, sha vegher u genegh yô, noov shi ve nenge sha kwagh ne: Kwase wou gbe ahon er we u eren kwagh er u ngu ityough ki tsombor ga yum shinii? Shi ngu a kaa er we u hemen ken ya sha u eren mhen sha ityom i eren ga, shin u ne imo i kulen ikyaa shighe u kwagh a gbe la ga yum shinii? Kpa ka kwagh u Aôndo a kaa er, we nom, u̱ er je la. Shi ka a inja u ngohol mbamhen shi eren kwagh sha asaren a mbagenev kpaa ken tsombor shi tesen ikyo i wan sha mbamhen mbara ken hemen wou la. Er we u lu nom yô, u hemba ngun a tom u taver cii ken tsombor. Kpa aluer u nôngo sha gbashima u eren u yô, kwase wou kpaa á sar un u nan we iwasen shi wan we inyatine kpaa.—Anzaakaa 13:10; 15:22.
U IVIN TOM U KWASE
10. (a) Bibilo i wa kasev kwagh er ve̱ eren nena? (b) Zum u kasev ka vea yar tom sha kwaghwan u Bibilo ga la kanyi ka i ere?
10 Er Bibilo i kaa nahan, yange i er kwase er á lu orwasen nom na. (Genese 2:18) U eren shami vough yô, Bibilo i wa kwagh er: “Kasev, ungwan nen imo i noov enev.” (Mbaefese 5:22) Kpa ahendan kua gesa u tan a nomso ka kwaghmyer nyian ga. Kpa zum u kasev ka vea norom, vea nôngon u karen lun ityough yô, aeren a ve ka a kegh iyol u van a mzeiyol. Sha kwagh ne yô, noov kpishi ka ve kaa er: ‘Aluer kwase soo u hemen yô, i de un a za hemen.’
11. (a) Kwase nana wase nom sha u hemen nena? (b) Aluer kwase yar tom u Aôndo a we nan la nahan, kanyi kwagh ia sar nom la u erene?
11 Nahan cii kpaa, alaghga u ngu nengen wer u ngohol hemen la sha mkighir, sha er nomugh la a kera soo u hemen ga yô. Kpa u fatyô u wasen un sha er á er ityom na i orhemen ken tsombor ga zee? U tesen wer u nengen ken a na sha hemen na la kpa? U pin un mnenge na sha kwagh kua ityesen na kpa? U palegh u lahan kwagh eren na kpa? Aluer u ngu eren tom taveraa sha u ivin tom u Aôndo a weu sha ikyev ken tsombor wou yô, nomugh kpaa una er di u na nahan vough.—Mbakolose 3:18, 19.
12. Kanyi i tese er kasev kpaa vea fatyô u pasen mbamhen vev, aluer mba kposo a mba nom je kpaa?
12 Kpa ka u kaan er gba u kwase nana kera ôr mnenge u nan aluer mba kposo a mba nom u nan ga ze. Alaghga mhen u nan la una lu u vough, nahan tsombor ua zua a mtsera aluer nom u nan la ver ato yô. I tese ikyav sha Sara kwase u Aberaham la sha ci u kasev ken Kristu sha m-ongo u ungwan nom na la. (1 Peteru 3:1, 5, 6) Nahan kpaa yange na mhen na sha kwagh u yange lu zan iyol ken ya ve yô, man zum u Aberaham lumun a na ga yô Aôndo kaa a na er: “Ungwa imo na.” (Genese 21:9-12) Nahan kpaa aluer nom nan kaa imo i kulen ikyaa sha kwagh yô, kwase nana lumun a kwagh la aluer ka u kwagh la una na nan u peren tindi u Aôndo ga yô.—Aerenakaa 5:29.
13. Kanyi kwase u injaa nana erene, nahan mlu u tsombor u nan una lu nena?
13 Sha u eren tom u nan tsembelee yô, akaa nga kpishi a kwase nana fatyô u yaren tom shami ken tsombor yô. Ikav i tesen yô, nana fatyô u yôron iwer tsema tsema, shi esen ya tsembelee shi wan uwegh sha u tesen mbayev kpaa. Shi Bibilo i wa kasev mbayaav kwagh sha er “noov vev ve̱ doo ve asema kua shi ônov vev kpaa, ve̱ lu tsev tsev, ve̱ lu wang, ve̱ sôron uya vev, ve̱ eren dedoo, ve̱ ungwan imo i noov vev, sha u i de lamen sha kwaghôron u Aôndo dang ga yô.” (Titu 2:4, 5) Kwase kua ngô u nan er ityom ne vough yô nana zua aa dooshima man icivir kpishi hen tsombor u nan la.—Anzaakaa 31:10, 11, 26-28.
IAN I MBAYEV KEN TSOMBOR
14. (a) Ian i vough i mbayev ken tsombor kanyi? (b) Kanyi kwagh mbayev vea fatyô u henen ken ikyav i Yesu laa?
14 Yange Yehova wa or u hiihii la kwagh er: “Mar nen kpishi seer nen ngeen.” (Genese 1:28) Een, yange Aôndo kaa a ve er ve̱ mar ônov. Ônov mbara lu u ve̱ lu iveren hen tsombor. (Upasalmi 127:3-5) Er ve dugh sha tindi man iniezwa i mbamaren vev yô, Bibilo i kar ian i wan a lu shami la a ian i kpan. (Anzaakaa 1:8; 6:20-23; Mbagalatia 4:1) Yesu je kpaa yange za hemen u ungwan mbamaren nav shighe u lu wanye la. (Luka 2:51) Inja na yô yange ungwan imo ve, eren kwagh sha ityesen ve kpaa. Aluer mbayev cii vea eren nahan yô, á wase u van a mssaniyol ken tsombor.
15. Ka sha ci u nyi hanma shighe mbayev ka ve naan mbamaren vev ishima i vihini?
15 Kpa, sha u lun iveren hen tsombor la yô, hanma shighe mbayev ka ve naan mbamaren vev ishimavihin hen ayange ne. Sha ci u nyi? Ka sha ci u mbayev, kua mbamaren kpaa, ve kera yar tom sha akaawan a Bibilo la ken uuma vev sha mlu u ken ya ga. Atindi shon man aerenakaa aa Aôndo la yô kanyi? Yô se time sha a genegh kpeghee sha upeeji mba ken hemen mban. Er se lu timen shami la, nenge aluer wea lumun wer, u yaren tom sha á la ú fatyô u wasen u van a msaanyol ken tsombor wou ga yô.
Soo Shi Civir Kwase Wou
16. Kanyi atindi i we noov u erene, man a yar tom aa atindi ne tsembelee nena?
16 Aa kwaghfan u Aôndo yô, Bibilo i kaa er: “Noov kpaa, kasev vev ve̱ doo ve ishima keng er ayol a ve nahan la.” (Mbaefese 5:28-30) Kwa kimbir kimbir je, akaa a a vandeeren tese er u i saan kasev iyol yô saa vea fa er i soo ve. Inja na yô nom nana ver ishima sha kwase u nan dedoo, u lun a nan leghlegh, shi kaven mlu u nan man u dughun nan akperan ken ishima kera. Gba u nom a ‘waan nan iko,’ er Bibilo i kaa nahan. Nom una er a nan nahan sha u wan kwagh u nan ikyo ken akaa a nan eren cii. Aluer ka nahan yô, kwase la una civir nan.—1 Peteru 3:7.
Wa Nomugh Ikyo
17. I wa kasev tindi er ve er nyi, man vea er kwagh shami nena?
17 Man sha vegher u ukase di ye? Bibilo i pase er, “Kwase kpaa, a̱ cia nom u nan.” (Mbaefese 5:33) Ityôkwagh i vesen i noov ve vende kasev vev yô ka er ve vende u yaren tom sha kwaghwan ne yô. Kwase nana tese icivir sha u lumun a ikyaan i nom u nan sha akaa, kua u lun ken mzough a nan sha u kulen mbamgbe sha ci u tsombor cii. Sha u yaren tom sha ian i Bibilo i ver nan sha u nana lu ‘orwasen u lun er nan’ nahan la hen nom u nan yô, nana na á kera taver ga sha u nom u nan la soon nan.—Genese 2:18.
Lu Nen Jighjigh Hen Ayol A En
18. Ka sha ci u nyi i doo u nom man kwase ve̱a tese jighjigh hen ayolave?
18 Bibilo i kaa er: “Noov man kasev ve lu jighjigh hen ayol a ve.” I kaa a nom er: “Ember kwase wou u sha uye la. . . . Inja na nan man u gbe ken imeen i kwase ugeneghe, wan wama, man u kuv kwase u u fe nan ga yôô?” (Mbaheberu 13:4, Today’s English Version; Anzaakaa 5:18-20, ) Een, idya i eren ka tindi u peren sha ishigh ki Aôndo; ka i va a mzeiyol ken ivese. Or u timen sha kwagh u ivesegh nger er: “Ior kpishi hen er idya i eren i wasen mdoo u ivesegh,” kpa shi a kaa er ieren la ka i za i kule ken “mbamzeiyol kpishi.”—Anzaakaa 6:27-29, 32.
Ker Kwagh U Doon Orgenegh Kpaa
19. Nom man kwase vea zua a msaanyol u vesen sha u yaven la nena?
19 Msaaniyol ve zum u orgenegh nan soo u yaven a u genegh sha isharen i nan la kpee yum ga. Kpa mba zough a mi sha u keren u eren kwagh u doon orgenegh la kpaa. Bibilo i kaa er: “Nom la nana̱ er kwase kwagh u i lu kpee u eren a nan la, kwase la di kpaa nana̱ er a nom u nan nahan vough.” (1 Mbakorinte 7:3) Kwagh u i har shami yô ka u eren, u nan. Or u nan la kpaa, una zua a msaanyol. Ka vough er yange Yesu Kristu kaa nahan la er: “U nan a na kwagh hembe saan iyol a u ngohol a ngohol kwagh.”—Aerenakaa 20:35.
Na Iyolyou Hen Mbayev Ou
20. Ka sha ci u nyi i lu kwagh u injaa u or á eren akaa imôngo aa ônov mba naneva?
20 Wanye u kuman er anyom anigheni nahan yange kaa er: “Terem eren tom hanma shighe cii. Lun hen ya ga. Ngu a nam inyaregh kpishi kua akaa a numben a mi kpaa kpishi, kpa ka i tarver mo u nengen a na. A doom ishima man msoo mer ma a er tom hanma shighe ga sha er me hemban nengen a na yô.” Uma u hen ya doo je zua ga zum u mbamaren ka vea dondo sha tindi u Bibilo sha u tesen mbayev vev ‘zum u ve tem hen ya ve man zum u ve lu zan sha gbenda man zum u ve yav inya man zum u ve mough sha kpaa yô’! U nan iyolyou hen mbayev ou, shi vihin shighe a ve sha inja la, una va a msaanyol ken tsombor a bunde ga.—Duteronomi 11:19; Anzaakaa 22:6.
Na Tsaha U Ú Kom Vough Yô
21. Bibilo i kaa er nyi sha kwagh u nan mbayev tsaha laa?
21 Ter wase u sha la ver mbamaren ikyav i dedoo sha u nan ior nav kwaghôron u kôôm ve, shin tsaha. Mbayev kuma tsaha. (Mbaheberu 12:6; Anzaakaa 29:15) U kaven kwagh ne yô, Bibilo i wa kwagh er: “Ne uter kpaa, . . . yese nen ve [ka ônov enev je la] sha mkôôm man kwaghwan u Ter.” Sha u nan tsaha la, shin aluer gba u á ta nan sambe shin a yange nan akaa a eren kpaa, ka ikyav i tesen er mbamaren soo mbayev vev. Bibilo i kaa er: “Kpa u wan u nan a doo nan ishima yô, ka nan tsaha un sha gbashima.”—Mbaefese 6:4; Anzaakaa 13:24; 23:13, 14.
Ikyaior—Venda Nen Igbinda I Taregh
22. Kanyi tom ikyaior ve lu a mini, man kanyi i lu ken u eren tom shono?
22 Tar ngu keren sha u meen ikyaior sha er ve̱ per atindi a Aôndo yô. Shi, er Bibilo i pase nahan, “lanegh kange wanye ken ishima.” (Anzaakaa 22:15) Nahan hingir ityav sha u nôngon u eren kwagh u vough. Kpa shi Bibilo i kaa er: “Ne ônov, ungwan nen imo i mbamaren enev [ken Ter]. Gadia ka nahan je i lu vough ye.” Kwagh la una va aa injar kpishi je. Nahan, ne mbayev, lu nen mbafankwagh. Wa nen kwaghwan ne ikyo: “Umbur [Orgbanakaa] u A gbe u la sha ayange a iyev ou.” Venda imeen i mcimbim mbi gban man tsô la, kua msôron ma man ganden ikyaa inya, ijimba i eren man u eren akaa a genegh a a hendan a atindi a Aôndo la.—Mbaefese 6:1-4; Orpasenkwagh 12:1; Anzaakaa 1:10-19.
Hen Nen Bibilo Imôngo
23. Aluer icombor ngi henen Bibilo imôngo nahan kanyi mbamtsera vea zua a mini?
23 Aluer or môm ken tsombor nan ngu henen shi yaren tom sha atesen a Bibilo yô, a wase u van a msaanyol ken tsombor. Kpa aluer gema ka ve cii—nom, kwase kua mbayev yô—a lu tsombor u lun a iveren kpishi je! Mlu u gbar gbar, mzough u kangenaan, shi ian i lamen ia lu, gadia hanmô u ken tsombor náná lu nôngon sha u wasen mbagenev sha er ve̱ civir Yehova Aôndo yô. Nahan na i hingir ieren i ken tsombor u henen Bibilo imôngo!—Duteronomi 6:4-9; Yohane 17:3.
U SÔRON MBAMZEIYOL KEN TSOMBOR TSEMBELEE
24. Ka sha ci u nyi i doo u nom man kwase ve̱a deen ayolave a mbamtsum veve?
24 Ken icombor i i lu saan saan je kpaa, mbamzeiyol mba lun sha ashighe ashighe. Ka sha ci u se cii se mba waeng ga shi se mba eren akaabo kpaa. “Gadia se cii se mba nenge gbev sha akaa kpishi,” kape Bibilo i kaa la. (Yakobu 3:2) Nahan mba ve zough ivaa la ve̱ de keren mlu u vough la hen ayol a ve ga. Kwagh u a lu yô, hanmô ve nana̱ deen u genegh la a mbamtsum mba nan. Nahan, mô ve môm nana̱ de veren ishima sha ivese i lun a msaanyol u waeng la ga, gadia kwagh ne ka kwagh u ior mba lun waeng ga vea fatyô u eren un ga yô.
25. A sôr mbamzeiyol ken ivese sha dooshima nena?
25 Ka kpee je, nom vea kwase vea soo u yaren tom imôngo sha u palegh kwagh u vihin orgengh ishima. Nahan aluer ve nôngo taveraa je kpaa, ashighe a genegh vea er akaa a vinhin orgenegh ishima. Nahan á sôr mbamzeiyol mbara, nena? Bibilo i wa kwagh er: “Dooshima cirin asorabo kpishi.” (1 Peteru 4:8) Inja na yô aluer mba a dooshima yô vea zer umbur mbamtsum mba orgenegh nan vande eren la ga. Sha mimi yô, dooshima kaan er, ‘Een, yange u tsume. Mo kpaa ka m tsume ashighe a genegh. Nahan m hungur a mba ou mbara, we kpaa hungur a mba av nahan.’—Anzaakaa 10:12; 19:11.
26. Shighe u kwagh a ne ican la, kanyi ia wase u sôron kwagh shono?
26 Zum u nom-a-kwase vea kegh iyol u lumun mbamtsum vev shi nôngon sha u sôron kpaa yô, anyimanakaa kpishi kua asema a vihin a a pande. Ve̱ hemba haren ishima sha u sôron mbamzeiyol, i de lun u tesen hembafan ga. Aluer or wou er shami ga je kpaa, kundu ishima sôr mzeiyol la ken gbenda u bem. Aluer u er shami ga yô, zamber i deu a kwaghbo wou. De timbir ga; er kwagh shami fese. “Iyange i de been ne a ishima i vihin her ga.”—Mbaefese 4:26.
27. Ka hanma kwaghwan ken Bibilo una wase nom vea kwase sha u sôron mbamzeiyol veve?
27 U hemban je yô aluer u vande eren nom shin kwase kera yô, gba kpee u dondon tindi u “hanma or nana̱ de kera waan akaa a nan iyol i nan iko tseegh ga, kpa nana̱ wa akaa a mbagenev iko kpaa” la. (Mbafilipi 2:4) Gba u ú wa tindi u Bibilo ikyo: “Nahan yô, haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan er uicuwan mba Aôndo mba ve lu uicighanmbaiorov mba doon ishima nahan. Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la.”—Mbakolose 3:12-14.
28. (a) Ivaasaghen ka gbenda u sôron mbamzeiyol ken ivese? (b) Bibilo i kaa er kanyi tseegh i lu ityôikyaa i saghen ivaa shi zuan i geneghe?
28 Nyian mba eren ivaa kpishi na ian er kwaghwan u ken Mkaanem ma Aôndo a wase ve u sôron mbamzeiyol vev ga, nahan ka ve kegh iyol u saghen a sagh ivaa. Aôndo kaa er ka ivaa i saghen la i lu gbenda u sôron mbamzeiyol yee? Ei, a kaa nahan ga. (Malaki 2:15, 16) A wa ishima er ivaa i lu kwagh u gbekeke. (Mbaromanu 7:2) Ka sha ityôkwagh i môm tseegh Bibilo i lumun er á fatyô u saghen ivaa shi zuan a orgenegh ye, ityôkwagh shon yô ka idya (Grika, porneia, ka ijimba i eren hôngorôô je la). Aluer mô ve nan er ijimba yô, mase shin ishima i u a lu iyolishô la u saghen ivaa la shin u gban den tsô.—Mateu 5:32.
29. (a) Aluer môm ken a ven lumun u dondon we ken mcivir u Mbakristu ga nahan, u er nena? (b) Kanyi kwagh ia due shamini?
29 Kpa aluer un u u kange ivaa a na la venda u henen Mkaanem ma Aôndo vea we, shi hendan a we sha tom wou u Orkristu la ye? Bibilo i wa kwagh er we u lu vea na shi we u de kera nengen wer ka ivaa i paven la ia sôr mbamzeiyol enev ga. Yar tom sha afatyô wou cii sha u sôron mtem hen ya wou sha u eren kwagh sha imo i Bibilo sha ieren you la. Ken hemen yô, sha inja you i dedoo i Orkristu la, ú fatyô u ulugh nomugh shin kwase wou la. (1 Mbakorinte 7:10-16; 1 Peteru 3:1, 2) A lu iveren i kiriki ga aluer ishimawan you i sha dooshima la injar due shami sha gbenda ne yô!
30. Ka sha ci u nyi i lu a inja u mbamaren ve̱a ver mbayev vev ikyav i nengen kereghe?
30 Nyian mbamzeiyol kpishi ken tsombor ka i lu sha kwagh u mbayev. Aluer kape i lu ken tsombor wou la nahan u er nena? Hiihii yô, er ne lu mbamaren yô vande tesen nen ikyav i dedoo. Sha ci u mbayev mba hembe dondon kwagh u ne eren la a kwagh u ne kaan la. Nahan aluer aeren a en nga lun kposo a mkaanem enem yô, mbakiriki vea nenge fese je. Nahan, aluer nea soo ner mbayev enev ve̱ lu a uma u dedoo, u Mbakristu yô, saa ne vande tesen ikyav keng.—Mbaromanu 2:21, 22.
31. (a) Kanyi ityôkwagh i genegh i vesen i lu i mbayev vea waan kwaghwan u mbamaren vev ikyo? (b) U tese wanakiriki wou mfe u wan tindi u Aôndo ikyo sha kwagh u jimbagh nena?
31 Shi henen kwagh a mbayev ou. U kaan a mbayev mbakiriki wer, ‘Msoo mer de eren nen ijimba ga, sha ci u ka kwaghbo’ la, tseegh kuma ga. Doo u kaan a ve er ka Orgbanakaa, Yehova Aôndo, a kaa er anzaakaa er ijimba i eren nahan ka kwaghbo ye. (Mbaefese 5:3-5; 1 Mbatesalonika 4:3-7) Shi heen tseegh kpa kuma ga. Gba u á wase mbayev ve̱ kav er i doo u wan ikyo sha atindi a Aôndo yô, man sha er a wase ve kpaa yô. Ikyav i tesen, u fatyô u pasen wanye wou gbenda u cieryol sha er ka i hii man i jile wan ken uya sha mzough u mnyandem ma nom a iji ken iyav mbu kwase yô, shi u pine nan wer: ‘U hen wer Un u a er kwaghkpilighyol sha kwagh u mar ne a hembafan e̱r uumace vea er a tahav mbu Aôndo a ne ve sha kwagh u mar la ga zee?’ (Upasalmi 139:13-17) Ga yô shi u pine un wer: ‘U hen wer Orgbanakaa u Vesen u á gbe se la una na tindi u yangen se u ember uma shinii? A hemba saan se iyol ga zee, aluer se wa ikyo sha atindi a na yô?’
32. (a) Aluer mhen u wan wou kera zua sha u Aôndo la ga nahan u er nena? (b) U wase wan wou u nengen a kwaghfan sha kwagh u Bibilo i kaa nena?
32 Mbampin mbara vea na wanye wou nana hii u henen sha tindi u Aôndo sha er se yar tom a igbila yase yô. Wuese un sha kwaghôron na. Aluer kera ka er i sar u la ga kpaa, de nyoon ishima a na ga. Nôngo u kaven wer mbakwav mba wan wou ve kuwa ve kar ihyongo sha atesen a Bibilo a perapera la, nahan nôngo u tesen un e̱r aeren a jimbagh a mbakwav na mbara i lu aeren a sha kwaghfan ga yô. Shi u fatyô u tesen wanye wou akav sha er aeren a jimbagh la a ve aa umaramôndo yô, kua angev mbu sha mnyande shin mbamzeiyol mbagenev kpaa. Sha gbenda ne yô a wase un u nengen a mdoom man mkôôm sha kwagh u Bibilo i kaa yô.
33. Ka sha ci u nyi ishimaverenkeghen i ken Bibilo sha kwagh u lun uma gbem sha won ken Paradiso shin tar la ia wase se u lun ken mkpeiyol a tsombor wase?
33 Kwagh u hemban cii yô ishimaverenkeghen i Bibilo i ne sha kwagh u va lun uma gbem sha won ken Paradiso shin tar la ia wase se u sôron uma wase ken tsombor. Sha ci u nyi? Sha ci u aluer mimi je sar se u lun uma ken msertar u he u Aôndo la yô, ka u se nôngo taveraa hegen u lun a imba uma i se ver ishima u va lun a mi keela la. Inja na yô ka u se dondo uiniezwa man mtese u Yehova Aôndo. Ken masejime yô, Aôndo una cir se idyer i msaanyol sha uma u tsôron kua iember wuee zan zan gbem sha won.—Anzaakaa 3:11-18.
[Mbampin Mba Ngeren u Henen]
(b) Ka sha ci u nyi yange Aôndo gba mbamkposo mbashonovo?
