FA WER Yehova una sue u, aluer u hide hen na yô. Una wase u u been a ishimanyian man ishimavihin, shi u zua a bemshima u imoshima i wang ka i va a mi la. Nahan ishima ia mgbegha u u hide u civir Yehova vea mba ve civir un la imôngo. Kwagh wou maa una lu vough er u Mbakristu mbagenev sha ayange a mba apostoli la nahan. Peteru yange nger kwagh ve kaa ér: “Ngise ne tsumen er iyôngo nahan kpa hegen yô, ne hide ken Orkuranilev man Orkuran u uuma enev.”—1 Peteru 2:25.

U hiden hen Yehova la ka kwagh u hemban doon cii u i doo u ú er yô. Sha ci u nyi? Ityôkyaa yô, u na a saan Yehova iyol. (Anzaakaa 27:11) Er u fe nahan, Yehova kpa kwagh doon un shin vihin un, nahan ieren yase ia na a saan un iyol shin ishima ia vihi un. Nahan kpa, Yehova kighir se ér se soo un shin se civir un ga. (Duteronomi 30:19, 20) Orgen u timen sha akaa a ken Bibilo kaa ér: “Or a fatyô u fan kwagh u a lu u ken ishima ga, saa u pase nan.” Aluer se mba civir Yehova sha ci u a doo se ishima tsung yô, se pase un ishima yase. Ka sea er nahan yô, se na un iyua i injaa kpishi, ka mtil sha mimi wase je la, nahan se na i saan un iyol tsung je. Jighilii yô, kwagh môm u kuman sha msaanyol u ka se zua a mi sha u civir Yehova a ishima yase cii la kpa ngu ga.—Aerenakaa 20:35; Mpase 4:11.

Shi kwagh ugen yô, zum u u hidi u hii u eren akaa ken mcivir u Yehova yô, a gba u a kure mgbe wou u ken jijingi la. (Mateu 5:3) Sha nyi gbenda? Ior tar sha won cii, ka ve pine ér, ‘Er nan ve se lu uma sha tara?’ Ka i sar ve u zuan a iwanger sha akaa a a tsum ve sha kwagh u awashima u uma la. Sar uumace u fan kwagh ne sha ci u Yehova yange gba se a isharen ne. A gba se ér se civir un nahan i saan se iyol. Kwagh môm u una na se msaanyol a hemba u se fan ser se mba civir Yehova sha ci u a doo se ishima kpa ngu ga.—Pasalmi 63:1-5.

Fa wer Yehova soo ér we u hide hen a na. U er nan ve u fa wer ka mimi? Fa wer i er msen kpoghuloo ve i nger antakerada ne ye. Shi alaghga lu ortamen gayô or u civir Yehova ugen yange nan va tese u antakerada ne ye. Maa kwagh la mgbegha u u ôron u shi eren sha kwagh u i nger ker la. Akaa ne cii ka ikyav i tesen ér Yehova hungur a we ga. Kpa ngu urugh we kure kure van a mi ken ikyum na.—Yohane 6:44.

Er se fe ser Yehova hungur a mbacivir un mba ve tsum mbara ga yô, kwagh ne sur se ishima kpishi. Anmgbian u kwase ugen, Donna kpa yange wuese imbakwagh ne. A kaa ér: “Yange m hii u hiden ijime kure kure maa m va undu mimi, kpa hanma shighe yô, m shi henen sha kwagh u i nger ken Pasalmi 139:23, 24 la. I kaa her ér: ‘Tôv kwagh wam, Aôndo, fa ishima yam, karem, fa mbamhen av, nenge, shin ma gbenda u ifer a lu ken a mo yô. Hemen mo sha gbenda u tsôron.’ Yange m fa er m lu kwagh u tar ne ga yô. Ma shighe môm kpa mlu wam zua sha u ior i tar ne ga, shi m fa je mer ka ken nongo u Yehova i gbe u me lu ye. Nahan m hii u nengen mer Yehova gbihim ga; ka mo i mase shin u me nôngo me hide hen a na ye. Saan mo iyol kpishi er m hidi hen a na yô!”

Se mba eren msen sha gbashima ser we kpa ma u hidi, sha er shi u za hemen u lun ken ‘iember i Yehova’ yô. (Nehemia 8:10) Aluer u hide hen Yehova yô, mayange u vaa afanyô ga.