1, 2. Lu zegetom u nyi Yesu tsengapasene, man ka mpin u hange hange u nyi a dugh sha kwagh ne?

ASHIGHE kpishi mbahemenev ka ve er uityendezwa, kpa ve kera kure ve ga. Mba ve lu a mbaawashima mba dedoo je kpa, ashighe agen ka ve fatyô u kuren uityendezwa vev ga. Kpa kwagh er doo yô, Yesu Kristu, u a lu Tor u Tartor u Mesiya la, ngu kposo, sha ci u kur uityendezwa nav hanma shighe cii.

² Yange hingir Tor ken inyom i 1914 yô, a kegh iyol u kuren kwaghaôron u profeti u yange ôr anyom 1,900 ken ijime la. Er zurum u Yesu una kpe la, a tsengaôron ér: “Loho u Dedoo u Tartor ne yô, á ôr u á tser tar.” (Mat. 24:14) Mkur u kwaghaôron la una lu ikyav igen i tesen ér Yesu tema tor sha Tartor. Nahan kpa, mpin u vesen u a gem u a lu yô, ka un ne: Tor la una ver ikyum i mbapasenkwagh mba vea lumun u nan ayol a ve u eren tom u pasen kwagh la ken ayange a masejime a ior ve hembe wan ayol a ve ikyo tseegh, shi dooshima a lu ga shi kwagh a gbe ior u civir Aôndo ga ne nena? (Mat. 24:12; 2 Tim. 3:1-5) Doo u se fa kwagh ne sha ci u mlumun u i ne sha mpin ne la bende a Mbakristu mba mimi cii.

3. Lu vangertiôr u nyi Yesu tese, man yange zua a vangertiôr la hana?

³ Hide shi nenge sha mkaanem ma Yesu tsengaôron mara. Mkaanem ma ma kaa ér ‘á ôr u’ la, ma tese ér lu a vangertiôr kpa? Ma tese yum! Yesu lu a vangertiôr ér una lu a ior mba vea na ayol a ve u eren tom ne ken ayange a masejime ne yô. Yange zua a imba vangertiôr la hana? A zua a mi hen Ter na. (Yoh. 12:45; 14:9) Shighe u Yesu lu a va shin tar ga la, a nenge er Yehova lu a vangertiôr ér mbacivir Un vea na ayol a ve u eren un tom yô. De se nenge er Yehova yange tese vangertiôr la yô.

4. Lu tom u nyi Yehova lôhô Mbaiserael ér ve̱ ere, man yange ve er nena?

⁴ Umbur kwagh u yange er shighe u Yehova kaa a Mose ér a er tabernakel shin tenti u una lu ijiir i Mbaiserael vea kohol vea mcivir Aôndo her la. Yehova yange kaa a Mose ér a lôhô ior cii ve va sue tom ne. Mose kaa a ve ér: “Hanma or u i doo nan u nan [nagh] yô, nana̱ va a mi, ka nagh ku á na TER” yô. Nahan ior er nena? “Hanma sev” yô, ior “zer van a nagh sha  ishima i dedoo.” Yange ve va a iniav zan zan gande “i yange ior u van a mi”! (Eks. 35:5; 36:3, 6) Mbaiserael yange ve er kwagh vough er Yehova lu a vangertiôr ér vea er nahan.

5, 6. Pasalmi 110:1-3 pase ér ka ieren i nyi nahan Yehova man Yesu yange ve ver ishima ér mbacivir Aôndo mba sha ashighe a masejime ne vea lu a mini?

⁵ Yehova yange ver ishima ér mbacivir un vea na ayol a ve ken ayange a masejime ne je he? Een! Yehova ngise mgbegha Davidi nger kwagh sha kwagh u shighe u Mesiya una va hii u hemen la, anyom kar hemba 1,000 cii ve, i va mar Yesu shin tar ye. (Ôr Pasalmi 110:1-3.) Lu u Yesu, Tor u he ne una lu a mbaihyomov mba vea hendan a na yô. Nahan kpa, una lu a ikyum i mbawasen un tom. A kighir ve a kighir ér ve er Tor la tom ga. Mbayevikyaior mba ve lu hen atô ve la je kpa, vea na ayol a ve kpishi je yô, vea ngee er avure a nga a gba kpishi sha use la nahan. *

⁶ Yesu yange fa er kwaghôron u profeti u ken Pasalmi 110 la a lu ôron i lu kwagh na yô. (Mat. 22:42-45) Sha nahan yô, lu a ityôkyaa i lun a vangertiôr ér una lu a mbawasen un tom sha mimi, mba vea na ayol a ve u pasen loho u dedoo sha tar cii yô. Yiase tese ér nyi sha kwagh ne? Tor la kôrcio u veren ikyum i mbapasenkwagh, mba ve ne ayol a ve u eren tom u pasen kwagh ken ayange a masejime ne kpa?

7. Yange mba veren Yesu Tor yô, a er nyi sha u wan mbadondon un agoyol sha ci u tom u ve lu a mi u eren laa?

⁷ Yange mba veren Yesu Tor sha yô, ica gba ga maa, hii tom u wan mbadondon un agoyol sha ci u zegetom u ve lu a mi u eren la. Er se vande nengen ken Ityough ki sha uhar kira nahan, hii ken inyom i 1914 zan zan ken mhii u inyom i 1919 la i va sôr tempel shi i wanger un. (Mal. 3:1-4) Maa ken inyom i 1919 la, a tsua wanakiriki u jighjigh la a ver sha u a hemen mbadondon un yô. (Mat. 24:45) Hii hen shighe la je, wanakiriki la za hemen u nan kwaghyan u ken jijingi sha igbenda  kposo kposo, er akaaôron a sha mbamkohol mba vesen kua ityakerada man icer nahan, sha u umbur Mbakristu cii tom u hanmô ve nan lu a mi u pasen kwagh la.

8-10. Mbamkohol mba vesen yange ve taver ior asema u eren tom u pasen kwagh la nena? Tese ikyav. (Shi nenge ngeren u kiriki u a lu a itinekwagh ér “ Mbamkohol mba Ngise Ve Taver Ior Asema u Pasen Kwagh La.”)

⁸ Akaaôron a sha mbamkohol mbavesen. Ityav mbi Tar Cii mbi Hiihii mbira yange mbi been yô, sar Mbahenen Bibilo tsung u fan kwagh u i gbe u vea er la, nahan ve kumba hen ijiir i í yer ér Cedar Point, hen kpentar u Ohio, ken tar u Amerika la, ken uwer u Setemba 1 zan zan 8, inyom i 1919 la, ve er mkohol u vesen u hiihii. Sha iyange i sha uhar la, Anmgbian Rutherford na kwaghôron, a ôr kwagh a mba ve va mkohol ne jighilii, a kaa ér: “Tom u Orkristu nan lu a mi u eren shin tar yô . . . ka u pasen loho u tartor u Ter.”

⁹ Sha iyange i sha utar la, mkohol ne kume pir shighe u Anmgbian Rutherford na kwaghôron u lu a itinekwagh ér “Address to Co-laborers” (“Loho sha ci u Akar a Tom”), u yange i gber ken Iyoukura sha itinekwagh i “Announcing the Kingdom” (U Yôôn Tartor) la. A kaa ér: “Orkristu ka nana tema ving, nana gbidyen kwar yô, nan pine iyol i nan ér, Er nan ve m lu shin tara? Man doo u nana na mlumun ér, Ter tindim shin tar ne sha u m va pase tar loho u sha kwagh u himen ior a Aôndo la, nahan m ngu a tom man ian i civirigh i yôôn loho la.”

¹⁰ Anmgbian Rutherford yange yôô ken kwaghôron na u doon tsung la ér a hii u gberen magazin u he u a lu eren tom a mi u wasen ior u kaven er i lu Tartor u Aôndo tseegh ua yima uumace yô. A yilan magazin ne ér The Golden Age (u i yer hegen ér Awake! la). Maa a pine mba ve lu ungwan kwaghôron shon la ér, ka iorov ume ve soo ér vea er tom u nan ior magazin ne? Ripoti i yange i nger sha kwagh u mkohol u vesen la pase ér: “Ior yange ve lumun u eren tom ne gidighaa. Iorov 6,000 mba ve lu hen mkohol ne cii mough tile sha, u tesen ér ve lumun u eren kwagh ne.” * Kwagh ne tese wang ér Tor la lu a ior mba ve kegh iyol u nan ayol a ve u eren tom u yôôn kwagh u Tartor na yô!

11, 12. Ka nyi yange i pase ken Iyoukura ken inyom i 1920 la sha kwagh u shighe u gba u a er tom u Yesu tsengaôron laa?

¹¹ Ityakerada i i gber yô. Magazin u Iyoukura la yange za hemen u pasen mluainja u tom u pasen loho u dedoo u Tartor, u Yesu yange tsengaôron la wang. De ase se tese ikyav sha akaa agen a yange za hemen ken mhii u kwavanyom u 1920 la yô.

¹² Ka loho u nyi lu u a pase sha u kuren kwagh u i er ken Mateu 24:14 laa? Lu u a er tom shon hanma shighe? Iyoukura i Julai 1, 1920, yange i pase loho shon ken ngeren u lu a itinekwagh ér “Gospel of the Kingdom” (Ivangeli i sha Kwagh u Tartor) la, kaa ér: “Loho u dedoo u i er kwagh u ú ken ivur ne la, ka u sha kwagh u mkur u tar ne man kwagh u mver u tartor u Mesiya.” Ngeren la pase shighe u a pase loho ne la, ér: “Gba u a hii u pasen loho ne sha shighe u [Ityav mbi Tar Cii mbi  Hiihii] mbira zan zan a za kure sha shighe u ‘zegecan’ la.” Sha nahan yô, ngeren la kaa ér: “Ka hegen i lu shighe u . . . a pase Mbakristu Mbaaiev loho u dedoo ne ye.”

13. Iyoukura i ken inyom i 1921 la yange taver Mbakristu mba i shighe ve mkurem mbara ishima ér ve lu a ieren i nan ayol a ve u eren tom u pasen kwagh la nena?

¹³ Lu u a kighir ior mba Aôndo ve, vea er tom shon u Yesu yange tsengaôron ne yee? Ei! Ngeren u ken Iyoukura i Maaci 15, 1921 u lu a itinekwagh ér, “Be of Good Courage” (“Taver Nen Ishima”) la, yange taver Mbakristu mba i shigh ve mkurem la ishima ér ve lu a ieren i nan ayol a ve la. Yange i taver hanmô ve ishima ér nana pine iyol i nan ér: “M nenge mer u eren tom u pasen kwagh la ka kwagh u civirigh kpishi, shi ka tom u i gbe u me er kpa?” Ngeren la shi kaa ér: “Se nenge ser aluer u tôô wer tom la [ka ian i civirigh je i ne u yô], ú lu er Yeremia u yange mkaanem ma Ter ‘hingir un ken ishima er usu u hian’ ve, de u ôron kwagh ga la nahan.” (Yer. 20:9) Ishimataver i doon tsung ne yange i tese ér Yehova man Yesu mba a vangertiôr ken mba ve lu eren tom u Tartor sha mimi la.

14, 15. Ken inyom i 1922 la, Iyoukura kaa a Mbakristu mba i shigh ve mkurem la ér ve̱ pase ior kwagh sha nyi gbenda?

¹⁴ Mbakristu mba mimi vea er nena ve loho u Tartor ne ua ar a ioro? Yange i gber ngeren ugen tiônôô ken Iyoukura i Agusutu 15, 1922 la, lu a itinekwagh ér: “Service Essential” (Tomshiren u Hange Hange). Ngeren ne yange taver Mbakristu mba i shigh ve mkurem mbara ishima ér ve “er tom u zenden nan ior ityakerada i i lu gberen sha u samber a loho ne la, shi ve lamen a ve sha uya vev, ve pasen ve ér tartor u sha mgbôghom.”

¹⁵ Ikyav tese wang ér hii ken inyom i 1919 la zan zan, Kristu za hemen u eren tom a wanakiriki u jighjigh man u fan kwagh u pasen Mbakristu var var ér, tom man ian i civirigh i ve lu a mi shin tar ne yô, ka u yôôn loho u Tartor la. Nahan kpa, Mbahenen Bibilo mba tsuaa mbara ve er nena shighe u i taver ve ishima ér ve er tom u yôôn kwagh u Tartor laa?

16. Mbagenev ken mba yange i haa ve ishangen ve hingir mbatamen la ve nenge kwagh u i kaa ér ior cii ve pasen kwagh la nena?

¹⁶ Ken kwavanyom u 1920 man 1930 la, mbagenev lumun a kwagh u i kaa ér gba u Mbakristu mba i shigh ve mkurem cii vea pasen kwagh la ga. Iyoukura i Novemba 1, 1927, i pase kwagh u yange lu zan hemen hen shighe la nahan ér: “Mbagenev mba ken côôci [tiônnongo] nyian mba ve lu sha iantom i ortamen . . . mba ve vende u taver anmgbianev vev ishima u pasen kwagh, shi ve ayol a ve kpa ve vende u pasen kwagh yô. . . . Ve venda u duen zan sha uya uya za pasen ior loho u Aôndo man kwagh u Tor na kua Tartor na shia shia.” Ngeren la yange kaa jighilii ér: “Shighe kuma hegen u mbajighjigh vea fa ambaaior la, shi vea palegh ve, shi a pase ve ve fa ér, mayange sé kera lumun u veren ambaaior la sha tom u mbatamen ga.” *

17, 18. Ior kpishi ken atôônanongo yange ve nenge kwagh u mbahemenev mba shin itine kaa ér i er la nena, man ken anyom 100 a karen ne, ior umiliôn imôngo nenge kwaghwan shon nena?

¹⁷ Yange kwagh er doo yô, ior kpishi ken atôônanongo lumun a kwagh u mbahemenev mba shin itine ôr la saan saan. Yange ve nenge ér tom u pasen loho u Tartor la ka ian i civirigh.  Iyoukura i Maaci 15, 1926, di kaa nahan ér: “Mbajighjigh vea na ayol a ve, . . . sha u za pasen ior loho la.” Mbajighjigh mban lu kuren kwaghôron u profeti u a lu ken Pasalmi 110:3 la, nahan ve tese ér ve na ayol a ve u suen Tor Mesiya.

¹⁸ Ken anyom deri môm a a kar ne, ior umiliôn umiliôn na ayol a ve u eren tom u yôôn kwagh u Tartor ne. Ken mtom kpuaa ma ma dondo ne, se lu tôvon fan er ve pasen kwagh la; inja na yô, ka igbenda i ve pasen kwagh a mi la, man akaa a ve er tom u pasen kwagh a mi la, kua kwagh u a dugh ker kpaa la. Nahan kpa, se hii tôvon fan er i hii ve ior umiliôn umiliôn ve ne ayol a ve u eren tom u pasen kwagh u Tartor ne, shin er ve lu ken tar u ior ve hembe wan ayol a ve ikyo tseegh nahan kpaa. Er se lu tôvon sha kwagh ne la, doo u se pine ayol a ase ser, ‘Er nan jim m pasen mbagenev loho u dedoo?’

19. Gba u se ungwa kwagh u Yesu a we ér “vande keren nen Tartor” la sha ci u nyi?

¹⁹ Yesu yange wa mbadondon un kwagh ér ve ‘vande keren Tartor’ la. (Mat. 6:33) Er nan ve se dondon kwaghwan laa? Ityôkyaa jighilii yô, ka sha ci u se kav mluainja u Tartor la; gadia ka u u lu kwagh u vesen ken awashima u Aôndo la ye. Er se vande henen ken ityough ki ki kar la nahan, icighan jijingi pase akaa a mimi a doon tsung a sha kwagh u Tartor la kure kure. Akaa a mimi a injaa a sha kwagh u Tartor la nga a bende a ishima yase yô, kwagh la a mgbegha se u vanden keren Tartor shon.

20. Ikyav i Yesu yange tese sha kwagh u injaa u i yer un la tese gbenda u mbadondon un vea ungwa kwagh u a we ér i vande keren Tartor la nena?

²⁰ Yesu yange fa gbenda u mbadondon un vea ungwa kwagh u a wa ve ér ve vande keren Tartor la. Nenge ase injakwagh i a ôr, i kwagh u injaa u i yer un la. (Ôr Mateu 13:44.) Er orsule u i er kwagh na ken injakwagh la lu eren tom na, er eren ayange ayange la yô, a za zua a kwagh u injaa u i yer un la, shi fese je kav er a lu a inja kpishi yô. Tsô a er nena? “Sha iember i nan la nan gema nan za tee akaa a nan lu a mi la cii, nan za yam sule la.” Ka nyi se fatyô u henen ken kwagh ne? Ka sea zua a mimi u sha kwagh u Tartor la shi sea kav mluainja na yô, se de ser nyityôkwagh igen cii i kar se sha er se vande keren u shin se ver u hiihii ken uma wase yô. Man ka se er kwagh ne saan saan. *

21, 22. Ior mba ve suen Tartor sha mimi la ka ve tese ér mba vanden keren Tartor nena? Tese ikyav.

²¹ Ior mba ve lu suen Tartor sha mimi la, mba tesen kwagh ne sha aeren a ve, ka sha ikpazwa ve kaan ér mba vanden keren Tartor ga. Ka ve na uma ve kua agee a ve man mfe ve, man akaa a ve shin inyaregh vev sha u eren tom u pasen kwagh u Tartor la. Mbagenev de akaa a vesen agen kar ve, sha er vea er tom u pasen kwagh hanma shighe la yô. Mba ve ne ayol a ve u pasen kwagh nahan la cii, ve nenge er Yehova a veren mba ve keren Tartor na hiihii la doo doo yô. Nenge ase ikyav ken kwagh u yange er ne.

²² Anmgbian Avery Bristow vea kwase na Lovenia ve hii u  eren tom u colporteur (shin tom pania) ken tar u Amerika ken mbee u kwavanyom u 1920 la. Shighe kar yô, Lovenia kaa ér: “Mo vea Avery se zua a msaanyol ken tom pania u se er anyom imôngo hegen ne. Ashighe kpishi yange se fa ape se zua a inyaregh ki haan peturuu shin za yamen kwaghyan ga. Nahan cii kpa, hanma shighe yô, Yehova nengen sha a vese. Nahan se mem tom pania mayange ga. Se luun a akaa a kwagh a gbe se a mi sha mimi la hanma shighe.” Lovenia umbur kwagen u ve lu pasen kwagh hen gar u Pensacola, ken kpentar u Florida ve, ve lu a inyaregh kua akaayan kpuaa tseegh la. A kaa ér, yange ve mba va nyer hen anyou ve u tsan ker u ve kpelan ve zenden a mi la yô, ve nenge a akpa a vesen her ahar, iv a akaayan ker poo, kua washika, i nger ker ér: “Ka tiônnongo u Pensacola a ne ikyav mbin sha u tesen ne dooshima ye.” Lovenia hide gbidye kwar sha anyom kpishi a un er tom u pasen kwagh hanma shighe la, nahan a kaa ér: “Shighe môm kpa Yehova ngu a kende se ga. Er se suur sha Yehova yô, mayange se mba a va ahenge ga.”

23. U nenge mimi u zough a mi sha kwagh u Tartor la nena, man ka nyi u kange ishima wer u ere?

²³ Hanmô wase nan pasen kwagh er tahav mbu nan mbu kom la. Mbamlu asev mba kposo kposo. Nahan kpa, se cii se mba a ian i civirigh i pasen loho u dedoo ne sha afatyô wase cii. (Kol. 3:23) Er akaa a mimi a injaa a kwagh u Tartor a se zough a mi ne a gbe se kwagh kpishi yô, ka se kegh iyol u den ser akaa agen cii a kar se, sha er se er tom u Tartor ne er se fetyô la cii yô. Kape u kange ishima u eren la ga he?

24. Ka kwagh ugen u hemban cii u nyi Tartor la u er ken ayange a masejime nee?

²⁴ Ken anyom deri a a kar ne, Tor la ngu kuren kwaghôron na u profeti u i nger ken Mateu 24:14 la. Shi ngu kighir a kighir ior ve, ve lu eren kwagh ne ga. Er mbadondon un mbara ve dugh ken tar u ior ve hembe wan ayol a ve ikyo tseegh la kera yô, ve na ayol a ve u pasen kwagh. Tom u pasen loho u dedoo u ve lu eren sha tar cii la, ka kwagh ugen u a lu ikyav i tesen ér Yesu ngu hemen sha ken Tartor la yô. Shi ka môm ken akaa a vesen a Tartor la u lu eren ken ayange a masejime ne yô.