“Mvese ken gar u kiriki ken imbusutarimese,” ka pe Dauda kaa ken Sierra Leone la. “Shighe genegh ngu zum u mlu wanye la, ayôôsu a inyaagh gba hen atô u tsombor wam a tsombor u genegh. Ve cii ve lu kperan ijiir la. Sha u sôron azaiyol la yô, i yila orakombu heregh. A na orgenegh jingi, shi cir un ikyondu i pupuu iyol. Shighe Kpuee yô or u ken ikyondu la gba gbidyen ikyarikyase shi lu haan iusa iyol. Er lu nengen ken jingi heregh la, á genger imo er: ‘M nenge a orbeen iyol ngu van!’ Á wuha iyol sha akondu a pupuu. Á tav shi a bee iyol kpishi, a mende ivu, shi ngu zenden ngughur ngu ngughur nahan.’

“Lu pasen mlu u Tertamen!’ Á hingir zemba ze zemba shi a ngor imo a kaa er: ‘Áluer wea na kwagh u mlu ôron we ne jighjigh ga yô va nenge iyol you!’ Nahan kpaa, mô wase môm nan cihi er nahan ga! Tsô orakombu la ta un apever iyol sha icimbim mbi ahuuv mbi a nungwa sha mnger, shin ijôndough ki a lu a mi la.

“Er lu lamen sha zwa u or u ken jingi la yô, ‘Tertamen’ la kaa er ijiir la ka i tsombor wase. Yange kaa a ngôm u tamen la er a eren tom hen ijiir la a mciem iyol shio. Nahan tsombor u genegh la lumun a ijirôron la. Tsô ayôôsu la bee.”

 Anzaakaa la nahan ban ga shin Ityôtar i Afrika ne. Heen kpaa, vough er avegher a tar a genegh kpaa nahan, ior umilien je gande u ôron ve na jighjigh er mbakpenev ka ve kar ve yem ken tar uu azôv hen ape vea faityô u nengen shin tesen tahav sha uuma mbaiorov sha tar yô. Imba jighjigh ne ka mimi kpa? Mbakpenev jim mba lu umaa? Aluer ka nahan ga yô, ka unô ve kaan er ve mba ujijingi mba mbakpenev? U fan uikyar mba vough sha mbampin mban ka kwagh u injaa kpishi. Ka ityôkwagh i uma-man-ku jim.