YESU yange tsengaôron je ér mbadondon un vea sunda iyiav kpishi ken ayange a masejime ne. (Mat. 9:37; 24:14) Nenge ase er mkaanem man ma kur sha mi vough hen ningirtar u Transcarpathia, ken tar u Ukraine sha gbenda u kpilighyol yô. Atôônanongo nga 50 hen ugeri mba ve lu hen ijiir ne utar la. Mbapasenkwagh hemba 5,400. * Or môm ken atô u hanma iorov unyiin mba hen ijiir ne ka i lu Orshiada u Yehova!

Kwaghpasen ka a lu hen ijiir ne nena? Anmgbian ugen hen ijiir ne iti na ér Vasile, a kaa ér: “Ior mba heen ka ve na Bibilo icivir kpishi, shi ka ve soo u eren kwagh sha mimi shi ve soo kwagh u tsombor, shi ka ve nongo ér vea wase ayol ave kpaa.” A za hemen a kaa ér: “Ka hanma kwagh u se ne jighjigh a mi cii ve lumun a mi ga. Kpa ka wea tese ve kwagh ken Bibilo yô, ve kegh ato zulee.”

Er se fe nahan, anmgbianev ka vea lu hen ijiir i mbapasenkwagh ve ngee nahan yô, ve lu di a mbamtaver mbagen. U tesen ikyav yô, tiônnongo ugen hen ijiir ne ngu a mbapasenkwagh 134, kpa gema ka uya 50 tseegh ve lu hen haregh na u pasen kwagh ye! Mbapasenkwagh vea er nena a imba kwagh nee?

Anmgbianev mba nomso man mbakasev kpishi ka ve nôngo kwagh kpoghuloo ve za pase kwagh sha ajiir a kwagh a hembe gban sha mbapasenkwagh yô. Anmgbian ugen u a lu anyom 90 i yer iti na ér Ionash yô, kaa ér: “Aluer i gba kwar u uya mba hen haregh ne sha mbapasenkwagh yô, hanma orpasenkwagh nana zua a uya uhar tseegh. Ka m pase kwagh hen ijiir yase ne, semberee u i kera fe doon mo iyol ga ne. Shi yange m yem kwaghpasen hen ijiir igen m za pase kwagh ken zwa u ior i tar u Hungary. Ka ijiir i tiônnongo a pasen kwagh her ga yô, i gba ica kuma ukilomita 160 nahan.” Gba u mbapasenkwagh vea tange iyol ga keng sha er vea za wase sha ajiir agen yô. Ionash kaa ér, “Yange m nder ahwa 4 sha use, m za nyôr girgidogo, m za pase kwagh zan zan ahwa 6 aikighe, shighe u igirgi i hiden la. Yange m er nahan kwa har shin kwa tar ken kasua.” A nenge ér iniôngon na la saa un ishe? A kaa ér: “Kwaghpasen ne yange a nam msaanyol kpishi, shi doom kpishi er yange m wase tsombor ugen hingir u fan mimi ne nahan.”

Nahan kpa ka hanma or ken atôônanongo a hen ijiir ne nan fetyô u zan sha ajiir a icaa za pasen kwagh ga. Kpa mbapasenkwagh cii kua mbabeenyol je kpaa ka ve nôngo sha er vea pase kwagh hen haregh u tiônnongo ve kpoghuloo a tser yô. Kwagh ne na yô, ken inyom i 2017 la, iyenge i mbazan Ku Umbur u Yesu hen ugeri mba utar mban hemba iyenge i mbapasenkwagh nôngo u kuman kwa har, shin kuma tiôn u iyenge i ior mba hen ijiir la jimin cii. Mimi yô, hanma ijiir i se lu cii kpa, se fatyô u “eren . . . tom u Ter ngegh je.”—1 Kor. 15:58.