Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mlumun sha mbampin mban yô:

Ka akaa anyiin a nyi se er ve se seer fan u wan icama?

Se fatyô u tilen sha inja sha u kôron takerada wase u atsam kenden sha. Se ôô tsembelee. Ka sea bugh zwa wase tsembelee shighe u se lu gberen icam yô, se wa icam gbungur gbungur.—w17.11, peeji 5.

Ka nyi i gbe u se umbur sha kwagh u ajiir a yange i ver agar a waren ker a ken Iserael la kua igbenda i zan ker laa?

Yange i ver agar a waren ker ataratar ken tar la shi i sôr igbenda i zan ker tsembelee. Yange i lu u or a yevese gbem shin nana nyoon iyol kpishi cii ve nana za nyôr ker ga.—w17.11, peeji 14.

Er nan iyua i naagh ku ipaan i Aôndo a ne se sha ikyev i Yesu la i lu iyua i hemban cii i i ne se?

Naagh kura kure isharen yase i lun uma gbem sha won kua mgbe wase u i sar se u ma i paa se sha ikyev i isholibo man ku la. Yehova yange na se iyua ne shighe u se lu mbaasorabo her la je, sha ci u se ônov mba Adam se doo un ishima.—wp17. 6, peeji 6-7.

Pasalmi 118:22 tsengapasen kwagh u mnder u Yesu shin ku nena?

Yange i venda Yesu ér ngu Mesiya ga shi i wua un. Nahan lu u saa a nder un shin ku ve una hingir ‘iwen i sha zongo’ ye.—w17.12, peeji 9-10.

Yange gba u Mesiya una va ken tsombor u or u nan lu waniunda yô tseeghlee?

Ashighe agen, ior mba Yesu va ken tsombor ve la lu mba ve lu ônov mbaiundav yô. Kpa lu hanma shighe ga. Davidi yange lu wan u Yese u iunda ga; nahan kpa, Mesiya va ken tsombor na.—w17.12, peeji 14-15.

Ka akaawan a sha kwagh u tweregh a nyi a lu ken Bibilo?

Tindi yange tese ér aluer iangev mbi gen kôr or yô, i za ver nan tswen hen ijiir igen. Yange or a bende a ikyom i orkpen yô, i gba u nana ôô iyol sha mnger. Tindi shi yange kaa ér aluer or za akôngo yô, nana time inya, a cir akôngo la. Yange gba u a tsôngon mbayev sha iyange i sha anigheni, man kwagh ne lu kwagh u dedoo kpishi sha ci u shighe la i lu u awambe aa fatyô u tôndon.—wp18.1, peeji 7.

Er nan i doo u Orkristu nana soo iyol i nan akuma akuma tseeghele?

I kaa a vese ér gba u or u nan we ndor a vese nana doo se ishima er iyol yase nahan. (Mar. 12:31) Noov di gba u “kasev vev [vea] doo ve ishima keng er ayol a ve nahan.” (Ef. 5:28) Nahan kpa aluer se wa ikyo ga yô, se hingir u soon iyol yase karen ikyaa inya.—w18.01, peeji 23.

Ka nyi akaa nahan se er ve se fatyô u seer vesen ken jijingii?

Gba u se henen Mkaanem ma Aôndo shi se gbidyen kwar sha mi shi se dondon kwagh u se hen la. Shi doo u se de ser icighan jijingi a hemen se, shi se ngohol iwasen i mbagenev ve ne se la shi se tesen iwuese kpaa.—w18.02, peeji 26.

Er nan ve i gbe u se ver ishima ser mbacivir akaa a sha kwavaôndo man mbatsengan pasen akaa ve pase se akaa a ken hemen ga?

Atôakyaa nga kpishi je, kpa ityôkyaa i tamen yô, Bibilo yange ambaakaa la.—wp18.2, peeji 4-5.

Zum u or lehe se iwer hen ya u nan man se lumun u zan yô, doo u se er nena?

Aluer se lumun u zan iwer i or lehe se yô, doo u se nôngo se kure iceghzwa yase la. (Ps. 15:4) Doo u se gba bunden i tsô ga. Ityôkyaa yô, or u nan lehe se la nan er tom kpoghuloo, nan yôr sha ci wase.—w18.03, peeji 18.

Ka nyi mbatamen man udiakon vea fatyô u henen hen Timoteu?

Yange kwagh u ior gba Timoteu ishima sha mimi shi tom u Yehova lu un kwagh u hiihii ken uma. Yange er icighantom u Ter sha gbashima shi eren sha kwagh u hen la. Timoteu shi yange za hemen u tsaase iyol na shi de ér jijingi u Yehova a hemen un. Mbatamen man mbagenev cii vea fatyô u dondon ikyav i Timoteu la.—w18.04, peeji 13-14.