Rehobiam lu wan u Solomon. Solomon yange hemen tar u Iserael anyom 40. (1 Utor 11:42) Solomon kpe anyom kar hegen er 3000 nahan. Yange kpen yô, Rehobiam mough za ken Shekem sha u i za shie un mkurem una hingir tor yô. (2 Kron. 10:1) U hen wer yange a cier un iyol u hingir tor sha ityough ki Solomon, u hemba kwaghfan laa? Lu u ica a gba tsô mngerem a uma a due sha ko. A gba u Rehobiam una tese aluer ngu a mfe kuma u sôron mbamzeyol mba vesen shin ngu a mi ga kpaa.

Rehobiam kpa yange una lan hang u lu ken ikyurior i Iserael hen shighe la ga. Shighe kar yô, ior mough ken Iserael cii va hen Rehobiam, ve va ôr un kwagh u ve soo yô. Ve kaa a na ér: “Teru lu wa se ikav mbi yuhwan; yô, shi pande se tom u ican u teru man ikav nav mbi yuhwan mbi a wa se ne, nahan yô, sé rumun we.”—2 Kron. 10:3, 4.

Alaghga Rehobiam nenge ér kwagh kohol un a kohol je! Aluer un lumun u panden ior ikyav yô, a gba u un man tsombor na kua mba ken ya na cii vea kera lu a uyôughyôugh mbagen ga. Nahan kpa shi aluer un venda yô, ior vea hendan a na. Nahan una er nena? Yange hii za kohol mbatamen mba ngise ve wasen Solomon mhen la ér ve wase un. Mbatamen mbara kaa a na ér a ungwa kwagh u ior ve ôr la. Nahan kpa shi a za kohol agumaior aa lu mbakov na la ér ve wa un kwagh. Maa a dondo kwaghwan ve la, a er a ior dang. A kaa a ior ér: “Terem lu wan ne ikav mbi yuhwan, mo me seer ne mbi; terem tsaha ne sha akpa, mo me gema me tsaha ne sha kwagil.”—2 Kron. 10:6-14.

Ka nyi se fatyô u henen ken kwagh ne? Kwagh ne tese se wang ér, doo u keghen ato ungwan kwaghwan u Mbakristu mba kaven ishigh mba ve vie ken jijingi la. Er ka ve lu a mfe kpishi yô, alaghga vea ta ashe vea nenge a kwagh u una va due ken ma kwagh u se soo u tsuan yô, nahan vea wa se kwagh u una wase se yô.—Yobu 12:12.

Er ikwe pue pav yem hingir kwagh ve yô, Rehobiam wa shoja nav agoyol u za tan ityav sha ve. Kpa Yehova tindi profeti Shemaia za yange ve. A kaa ér: “De kende nen ga, de za nenge nen ityav a anmgbianev enev, Mbaiserael ga; hanma or nana̱ hide hen ya u nan; gadia kwagh ne ka her a Mo a dugh ye.”—1 Utor 12:21-24. *

Ma or a de za nenge ityav gaa? We kpa nenge ase er kwagh ne yange una za Rehobiam iyol yô! Ior vea nenge tor u ta kume ér una tsaha ior nav “sha kwagil,” nahan kpa ica gba ga je tsô hemba un u yangen ior mba ve mough u hendan a na la nena? (Nenge 2 Kroniku 13:7.) Kpa tor kua ikyumutya na “ungwa imo i TER, ve kôr gbenda ave, ve hide sha imo i TER.”

Kwagh ne tese se nyi? A tese se ér doo u ungwan imo i Aôndo aluer ka u kwagh shon una na mbagenev vea naha se tar je kpaa. Or ka nana ungwa imo i Aôndo yô, kwagh la a na Aôndo a lumun nan shi nan zua a iveren kpaa.—Dut. 28:2.

Rehobiam yange ungwa imo i Aôndo nahan kwagh shon za a na nena? Yange ungwa imo i Aôndo kera za hemen a awashima na u za nôngon ityav a tartor u he la ga, kpa a na ishima na sha u maan agar a ken Yuda man Benyamin, ape lu tor her la. A taver agar ne agen “kpishi” je. (2 Kron. 11:5-12) Kpa kwagh u hemban yô, lu kuran atindi a Yehova hen shighe la. Er tartor u ikwe pue i Iserael igen i Yerobiam lu hemen la nyôr akombo a civir nahan kpa, ior kpishi ken ikwe la va ‘taver Rehobiam ishima.’ Ve moughon ve vaan ken Yerusalem sha ci u ve ta ikyaa a mcivir u mimi. (2 Kron. 11:16, 17) Nahan er Rehobiam ungwa imo i Yehova yô, kwagh la na mtemtor na taver.

Mtemtor u Rehobiam va taver dông yô, a er kwagh u or hen ér una er ga yô. A de u kuran atindi a Yehova, a yem civir akombo! Lu nyi i na ve er nahana? Lu ngô na u lu wankwase ken Mbaamon la nyôr a na ker yee? (1 Utor 14:21) Se fa jighilii ga, kwagh u se fe yô, tar u cii dondo un ken akombo a civir. Nahan Yehova de Shishaki Tor u Igipiti ngohol agar a Yuda kpishi, shin er Rehobiam vande taver a nahan kpaa!—1 Utor 14:22-24; 2 Kron. 12:1-4.

Ashe yange nyian shighe u Shishaki va a shoja na u va tan ityav sha Yerusalem, ape Rehobiam lu la. Maa profeti Shemaia va ôr Rehobiam vea atiator na kwaghôron u Aôndo ér: “Ne ne tam kera, ka nahan man Mo kpaa Me na ne sha ikev i Shishaki ye.” Tsô Rehobiam er nena sha loho u i va kaa un, i pase un mtsaha u lu van ve inya laa? Ve er kwagh doo kpen kpen. Bibilo kaa ér: “Atiator a Iserael kua tor kpaa ve hide ayol a ve ijime, ve kaa er: TER ka u perapera je.” Nahan Yehova yima Rehobiam man Yerusalem, i kera tim ve ga.—2 Kron. 12:5-7, 12.

Rehobiam za hemen u hemen tartor u vegher u ken imbusutariyan ne her. Cii man ku na yô, a na mbayev nav uiyua kpishi, man ikyav tese ér a er kwagh nahan sha er ve de va hendan a anngô ve Abiya u lu u una va kar a tema tor sha ityough nagh la ga yô. (2 Kron. 11:21-23) Rehobiam er kwagh sha ikyaa ne sha kwaghfan. Sha hiihii la lu a imba kwaghfan ne ga.

Er Rehobiam pande er akaa a dedoo nahan kpa, Aôndo lumun un ga. Bibilo ôr kwagh u mtemtor na jimin cii ér: “A er ifer.” Hii nan ve i ôr nahana? Ityôkyaa yô, “a ver ishima u keren TER ga.”—2 Kron. 12:14.

Doo u se hen kwagh ken kwagh ne: Rehobiam yange a ungwa imo i Aôndo ashighe agen. Shi yange pande er akaa a dedoo sha ci u ikyurior i Yehova. Kpa kera ya ikyar kangenaa a Yehova shin sar un tsung u eren ishima na ga. Kwagh ne na yô, a hingir u eren kwaghbo shi civir akombo. Alaghga u pine wer: ‘Shighe u Rehobiam ungwa tsaha u Aôndo la, yange er kwagh ne sha ci u gema ishima sha mimi shin sar un u eren ishima i Aôndo ga, lu mbagenev na ve er kwagh nahan yee?’ (2 Kron. 11:3, 4; 12:6) Shighe kar yô, orti hide yem eren asorabo. Nenge ase er Rehobiam lu inja kposo a Davidi u lu tertamen na la sha wono! Ka mimi Davidi yange er  asorabo, kpa ken uma na cii Yehova kua mcivir u mimi doo un ishima, shi yange gema ishima sha asorabo a a er la sha mimi.—1 Utor 14:8; Ps. 51:1, 17; 63:1.

Se fatyô u henen kwagh ken ikyav i Rehobiam la. Gba u se koson tsombor wase shi se eren tom u Yehova kpoghuloo. Kpa ngula tseegh kuma ga. U Yehova a lumun se yô, saa se civir un sha gbenda u a doo un a vese yô, shi se ya ikyar a na kangenaa.

Saa Yehova una doo se ishima tsung ve se fatyô u eren kwagh ne ye. Er ka i gba u saa se waan ikyon ve usu ua za hemen u yeghen nahan, gba u se henen Mkaanem ma Aôndo hanma shighe shi se henen sha kwagh u se ôr la zulee shi se eren msen ve Aôndo una za hemen u doon se ishima ye. (Ps. 1:2; Rom. 12:12) Nahan dooshima la una na yô hanma kwagh u se soo u eren cii, se nôngon ser a lu sha ishima i Yehova vough. Shi dooshima la una wase se u geman ishima sha mimi shighe u se er isholibo kpaa. Se tile dông ken mcivir u mimi, se kera lu er Rehobiam nahan ga.—Yuda 20, 21.