1-2. Er nan ishima yange i za Yesu iyolo?

SHA iyange i masetyô i Yesu lu uma shin tar la, ishima za un iyol kpen kpen. Lu u ica a gba ga tsô aferaior aa wua un, man a lu ku u nyoon tsung. Kpa ka ku u yange gba u Yesu una kpe la tseegh yange u lu zan un iyol ga. Ter na yange doo un ishima kpishi shi soo u eren kwagh u doon Ter na. Yesu yange fa je ér aluer un tile sha mimi, un hemba imeen i lu u una tagher a mi ne yô, kwagh la una seer u kenden a iti i Yehova sha. Ior kpa yange ve doo Yesu ishima, shi fa je ér saa una er tom na shin tar a kure vough ve se lu a ishimaverenkeghen i va lun uma gbem sha won ye.

² Er akaa lu zan Yesu iyol kpishi nahan kpa, yange za hemen u lun a bem her. A kaa a mbaapostoli nav ér: “M ngu nan ne bem Wam.” (Yoh. 14:27) Yange lu a “bem u Aôndo,” man or ka nan zua a mlu u kundu kundu ne sha u yan ikyar i dedoo vea Yehova. Ka bem ne yange na ishima gba Yesu shimi ye.—Fil. 4:6, 7.

3. Ka nyi se time sha mi ken ngeren nee?

³ Or môm wase kpa nana tsa a tagher a akaa a nyian ishima er Yesu nahan ga, kpa mba ve dondon Yesu cii vea tagher a akaa a karen jighjigh ve. (Mat. 16:24, 25; Yoh. 15:20) Shi ashighe agen se kpa ishima ia za se iyol er Yesu nahan. Se er nan ve ishimanyian la ia kar a hoghom ken a vese sha er ia bee a bem wase u ken ishima la ga? De se time sha akaa atar a Yesu yange er shighe u lu eren tom na shin tar la, shi se nenge er se  fatyô u dondon ikyav na la shighe u se tagher a akaa a karen jighjigh wase yô.

4. Ka akav a nyi nahan a tese ér Yesu yange er msen acin imôngo sha iyange na i masetyô shin tar la u zuan sha kwagh u 1 Mbatesalonika 5:17 a er laa?

⁴ Ôr 1 Mbatesalonika 5:17. Sha iyange i Yesu mase lun uma shin tar la cii, yange gba uwegh u eren msen ga. Shighe u Yesu tese mbahenen nav er vea umbur ku na la, a er msen sha bredi man sha wain. (1 Kor. 11:23-25) Cii man ve mough hen ijiir i ve ya Paseka la yô, a er msen vea mbahenen nav. (Yoh. 17:1-26) Shighe u va nyôr sha Uwo u Olev vea mbahenen nav la kpa, a er msen acin imôngo. (Mat. 26:36-39, 42, 44) Shi mkaanem ma masetyô ma Yesu ôr cii ve kpe la kpa yange ôr ma sha inja i msen. (Luka 23:46) Yesu yange er msen, nahan a wa Yehova ken hanma kwagh u vesen u er sha iyange la cii.

5. Er nan ve mbaapostoli yange ve kera taver ishima ga?

⁵ Ityôkyaa i môm i Yesu kôrcio u wan ishima a imeen yô, lu sha ci u a suur sha Ter na sha u eren msen. Kpa mbaapostoli yô, yange ve taver ishima sha msen u eren hen tugh mbura ga. Sha nahan yô, ve kera taver ishima shighe u ve tagher a ikyaren la ga. (Mat. 26:40, 41, 43, 45, 56) Aluer se tagher a imeen yô, saa se dondo ikyav i Yesu la sha u ‘eren msen hanma shighe’ ve se tile sha mimi ye. Ka nyi se fatyô u eren msen sônon?

6. Jighjigh u nan una wase se u lun a bem nena?

⁶ Se fatyô u eren msen ser Yehova a “seer se jighjigh.” (Luka 17:5; Yoh. 14:1) Gba u se lu a jighjigh u nan sha ci u mbadondon Yesu cii Satan una kar jighjigh ve. (Luka 22:31) Aluer se mba tagher a mbamtaver kposo kposo kpa  jighjigh una wase se u lun a bem her nena? Aluer se er hanma kwagh u se fetyô cii u nôngon a ma imeen yô, jighjigh u se lu a mi la una mgbegha se u geman hanma kwagh wan Yehova sha ikyev. Se zua a bem ken ishima sha ci u se na jighjigh ser una nenge sha kwagh shon sha gbenda u hemban doon cii.—1 Pet. 5:6, 7.

7. Ka nyi u hen ken mkaanem ma Robert laa?

⁷ Msen ka a wase se u lun a bem ken ishima, aluer se tagher a mbamtaver nan nan kpaa. Nenge ase ikyav i ortamen u civir Yehova sha mimi u a hembe anyom 80 hegen ne, mba yer un ér Robert. A kaa ér: “Kwaghwan u ken Mbafilipi 4:6, 7 la wasem u wan ishima a mbamtaver kpishi ken uma wam. Yange m tagher a ican i inyar. Shi m kera lu ortamen ga shighe kar.” Ka nyi yange i wase Robert u lun a bem ken ishima? A kaa ér: “Ishima ka ia hiin u nyian mo je m er msen. M na jighjigh mer ka mea seer eren msen fele fele shi mea eren un a ishima i môm yô, m seer lun a bem.”

8. Er i pase ken Yohane 8:29 nahan, ka nyi igen yange i na ve Yesu lu a bem ken ishima?

⁸ Ôr Yohane 8:29. Shighe u i lu tôvon Yesu a ican kpa a lu a bem ken ishima, sha ci u a fa je ér un na saan Ter na iyol. Yange za hemen u ungwan imo i Ter na sha shighe u taver je kpaa. Ter na doo un ishima, shi uma na cii na sha u civir Yehova. Cii man Yesu va shin tar yô, yange lu vea Aôndo er “or u fan tom” nahan. (Anz. 8:30) Shighe u lu shin tar la kpa tesen mbagen kwagh u Ter na sha gbashima. (Mat. 6:9; Yoh. 5:17) Tom ne yange u na Yesu iember kpishi.—Yoh. 4:34-36.

9. Aluer se mba eren tom u kwaghpasen kpoghuloo yô, kwagh la una wase se u lun a bem ken ishima nena?

 ⁹ Se fatyô u dondon ikyav i Yesu sha u ungwan imo i Yehova shi ‘eren tom u Ter ngegh sha hanma shighe cii.’ (1 Kor. 15:58) Ka sea “wa iyol” sha tom u kwaghpasen shin sea eren u kpoghuloo yô, sea lu a mbamzeyol kpa se kera nenge ser kwagh hemba se a hemba je ga. (Aer. 18:5) U tesen ikyav yô, ior mba ka se zua a ve ken kwaghpasen la ashighe kpishi ka ve lu a mbamzeyol mba vihin hemban mba asev. Kpa ka vea hen u soon Yehova shi dondon kwaghwan na yô, uma ve a hemba doon shi i hemba saan ve iyol kpaa. Hanma kwa u se nenge kwagh a er nahan yô, ka se seer lun a vangertiôr ser Yehova una nenge sha a vese. Man vangertiôr ne ka a wase se u lun a bem ken ishima. Anmgbian u kwase ugen u ken uma na cii yange saan un iyol ga shi a nenge ér un gba kwagh ga yô, yange va nenge a mimi u kwagh ne. A kaa ér: “Ka mea uve ityough ken kwaghpasen yô, ishima i gbam shimi shi i hemba saan mo iyol. M nenge mer kwagh ngu a lu nahan sha ci u ka mea due kwaghpasen yô, i lum er m hemba ngun ikyua a Yehova nahan.”

10. Ka nyi u hen ken mkaanem ma Brenda laa?

¹⁰ Shi nenge ase ikyav i anmgbian u kwase ugen u i yer un ér Brenda yô. Un vea wan na u kwase cii ve gba angev mbu vihin tsung. Brenda fetyô u zenden ga, ka a tema shin ikyekye i tuur a tuur, shi ngu a vôr kpishi. Ka a pase kwagh sha uya uya shighe u a fetyô yô, kpa hembe pasen kwagh sha u ngeren uwashika. A kaa ér: “Yange m hunden ishima mer angev av ka mbu a fatyô u sôron ken tar ne ga yô, hemba lun mo zange u veren ishima sha tom wam u pasen kwagh. Ka mea pasen kwagh yô, m kera henen sha ishimanyian yam ga. Ka m hemba veren ishima sha u wasen ior mba m zough a ve hen haregh u tiônnongo wase a pasen kwagh la. Shi kwaghpasen ka a umbur mo kwagh u ishimaverenkeghen i m lu a mi la.”

11-13. (a) Mbaapostoli kua ior mbagen yange ve tese ér mba azende a Yesu a mimi nena? (b) Azende a Yesu yange wase un nena?

¹¹ Shighe u Yesu lu pasen kwagh la cii, mbaapostoli nav mba jighjigh mbara tese ér mba azende a na jim. Yange ve lu azende a Bibilo i er kwagh u a ér: “Huror ngu u a hembe varen a anmgbian yô” la. (Anz. 18:24) Azende ne yange gba Yesu kwagh. Shighe u Yesu lu eren tom u kwaghpasen la, anmgbian na u sha ngô môm kpa nan na un jighjigh ga. (Yoh. 7:3-5) Kwa ugen la je yô, ior mba hen tsombor na hen ér a hii ihundugh. (Mar. 3:21) Kpa mbaapostoli mba Yesu mba jighjigh mbara yô, a ôr kwagh ve hen tugh mbu kpernan i wua un la ér: “Ka ne je ne taver ishima ne lu a Mo ken ameen a i lu meen Mo la cii ye.”—Luka 22:28.

¹² Ashighe agen mbaapostoli yange ve er kwagh sha ishima i Yesu ga, kpa Yesu veren ishima sha mbamyen vev ga shi nenge er ve na un jighjigh yô. (Mat. 26:40; Mar. 10:13, 14; Yoh. 6:66-69) Hen tugh mbu masetyô mbu Yesu lu vea ve cii ve i va mase wuan un la, a kaa a ior mba jighjigh mban ér: “M yila ne Mer, akar, gadia akaa a M ongo hen Terem cii, M ôr ne a.” (Yoh. 15:15) Akperan nga ga, azende a Yesu ne lu kwagh u taver un ishima kpen kpen. Iwasen i yange ve na un ken tom na la yange i na un iember kpishi.—Luka 10:17, 21.

¹³ Dugh mbaapostoli sha yô, Yesu shi lu a azende agen, nomso man kasev, mba ve wasen un ken tom u pasen kwagh la kua sha igbenda igen i injaa yô. Mbagen yange ve  lôhô un hen ya ve sha er una lu a ijiir i yan kwagh yô. (Luka 10:38-42; Yoh. 12:1, 2) Mbagen ve zenden vea na shi ve panden akaa ve, ve wasen un a mi. (Luka 8:3) Yesu yange lu a azende a dedoo sha ci u un iyol na kpa lu ijende i dedoo. Yange a er akaa a dedoo sha ci ve shi veren ishima ér ve er kwagh u a gande ve agee ga. Yesu lu or u vough, kpa a wuese iwasen i azende na aa lu uumace mba yinan ne naan un la. Man ka keng yange ve wase un u lun a bem ken ishima.

14-15. Se kôr azende a dedoo nena, man azende ne aa wase se nena?

¹⁴ Azende a dedoo aa wase se u civir Yehova sha mimi. Man gbenda u hemban doon u zuan a azende a dedoo yô, ka u lun ijende i dedoo. (Mat. 7:12) U tesen ikyav yô, Bibilo taver se ishima ér se eren tom a shighe wase man agee ase u wasen mbagen, hemban je yô, “mba ve lu a kwagh ga la.” (Ef. 4:28, NW ) U fatyô u henen sha kwagh u or u ken tiônnongo wou u u wase nan kpa? U fatyô u wasen or u nan fetyô u duen hen ya zan mape ga, sha u za yamen nan ankaam ken kasua? U fatyô u yôron iwer sha ci u ma tsombor u u lu a kwagh ave ga yôô? Aluer u fa u eren tom a jw.org^® kua JW Library^® app yô, u fatyô u wasen mbagen ken tiônnongo wou sha er ve kpa vea fa u eren tom a mi yôô? Aluer se uve ityough u wasen mbagen yô, ka keng a hemba saan se iyol.—Aer. 20:35.

¹⁵ Azende ase aa sue se shighe u se tagher a mbamtaver yô, nahan kwagh la una wase se u lun a bem u ken ishima. Elihu yange kegh ato a Yobu shighe u lu ôron mbamzeyol nav yô, se kpa kape azende ase ka a wase se sha u wan  ishima keghen ato a vese zum u se lu pasen ve zayol wase je la. (Yobu 32:4) Se ver ishima ser azende ase a tsua kwagh sha ci wase ga, kpa aluer se kegh ato zum u ve we se kwagh ken Bibilo yô, a tese ér se mba a kwaghfan. (Anz. 15:22) Tor Davidi kpa yange hide a iyol ijime ngohol iwasen hen azende a na; nahan se kpa mayange ityough ki de kehen se u ngohol iwasen i azende ase a ne se shighe u kwagh a gbe se a iwasen la ga. (2 Sam. 17:27-29) Sha mimi yô, azende a dedoo angara nahan ka iyua i Yehova.—Yak. 1:17.

16. Mbafilipi 4:6, 7 tese ér ka sha nyi gbenda tseegh se zua beme? Ta iwanger.

¹⁶ Ôr Mbafilipi 4:6, 7. Er nan Yehova a kaa a vese ér se fatyô u zuan a bem u un ne la “ken Kristu Yesu”? Ka sha ci u saa se kav tom u Yesu a lu eren u kuren awashima u Aôndo la shi se lu a jighjigh u nan ve se zua a bem u tsôron ken asema ase ye. Ikyav i tesen yô, ka nagh ku ipaan ku Yesu kura ku ne i den se a asorabo ase cii ye. (1 Yoh. 2:12) Ka sea hen sha kwagh la yô, i pever se iyol kpen kpen! Er Yesu a lu Tor u Tartor u Aôndo yô, una bee a hanma ican i Satan man tar na u ne se lu yan la cii. (Yes. 65:17; 1 Yoh. 3:8; Mpa. 21:3, 4) Kwagh la na se ishimaverenkeghen i doon kpen kpen! Shi er Yesu a ne se tom u u lu zange u eren ga nahan kpa, ngu a vese, ngu suen se ken ayange a masejime a tar ne. (Mat. 28:19, 20) Kwagh la taver se ishima kpishi! Mpeveryol kua ishimaverenkeghen man ishimataver ka akaa agen a ka a wase se u lun a bem u ken ishima yô.

17. (a) Orkristu nana er nan ve nana za hemen u lun a bem ken ishima? (b) Er i tende zwa ken Yohane 16:33 nahan, ka nyi se kôrcio u erene?

¹⁷ Nahan u er nena ve zum u u tagher a mbamzeyol mba vesen je kpa u za hemen u lun a bem ken ishima? U fatyô u eren kwagh ne sha u eren akaa a Yesu kpa er la. Hiihii yô, er msen shi mayange de gbe uwegh u eren msen ga. Sha uhar yô, ungwan imo i Yehova shi pasen kwagh sha gbashima, aluer taver u eren nahan je kpaa. Man sha utar yô, ker iwasen hen azende ou shighe u u tagher a mbamtaver yô. Aluer u er nahan yô, bem u Aôndo una kura ishima you man mbamhen ou. Shi u hemba hanma mtaver u u tagher a mi cii, er Yesu nahan.—Ôr Yohane 16:33.