1. Ka nyi mbacivir Aôndo cii ka ve soo u erene, man ka sha ci u nyi? (Nenge foto u sha igbende.)

YESU KRISTU yange kaa a mbadondon un ér: “Za nen, za gema nen akuraior cii a̱ hingir mbahenen.” (Mat. 28:19) Mbacivir Aôndo sha mimi cii soo u henen fan er vea “er tom” u Aôndo u i ne ve la vea kure u “doo doo” yô. (2 Tim. 4:5) Tom ne hemba kan u hange hange, shi hemba kan u injaa kpaa. Ka tom u i gbe u se hemba eren u torough torough a ityom igen i se eren ken uma wase cii yô. Nahan cii kpa, alaghga ashighe agen a taver se u tôôn shighe kpishi eren tom ne er se soo la.

2. Er se lu eren Aôndo tom ne, ka mbamtaver mba nyi ka se tagher a mi?

² Akaa a hange hange agen kpa nga a ka i gba u se tôô shighe man agee ase se er yô. Alaghga se mba eren tom u uke sha er se nengen sha iyol yase kua tsombor wase yô, man alaghga ka u tôô se shighe kpishi. Shi alaghga se mba a ityom igen hen tsombor i se lu nôngon a mi yô, gayô ka kwaghnyoon shin se ure shin iyolbeen nyôr a vese nahan iyol ka i shi nyoon se. Kpa se er nan ve se nôngo a mbamtaver mban shi se kôrcio u eren tom wase kuren doo doo?

3. Mkaanem ma Yesu ma ken Mateu 13:23 la wase se u kuren ikyaa ér nyi?

³ Nahan kpa aluer mlu wase na se mba fantyô u eren Yehova tom a shighe wase er se soo la ga kpa, iyol i de kpen se ga. Yesu yange fa er se cii se fatyô u umen atam a Tartor kwagh môm ga yô. (Ôr Mateu 13:23.) Hanma kwagh u se eren ken tom u Yehova cii ngu a gba un kwagh kpishi. Er se lu eren a ishima yase cii je, ka cii la. (Heb. 6:10-12) Nahan kpa, alaghga se nenge mlu wase yô, se mba sha ian i se fatyô u seer eren un tom yô. Ken ngeren ne, se lu timen sha kwagh u se er ve, se ver tom u se lu eren Aôndo la hiihii ken uma wase shi se eren kwagh ken uma akuma akuma kua er se seer fan u pasen kwagh shi tesen ior yô.  Kpa hiihii yô, inja i u eren tom wase kuren doo doo la ér nyi?

4. Inja i u eren tom wase kuren doo doo la ér nyi?

⁴ Se gba kaan tsô ser, u eren tom wase kuren doo doo la, ka u eren tom u pasen kwagh shi tesen ior la sha afatyô wase cii. Kpa kwagh la hemba di shighe u se tôôn u za pasen kwagh la. Ka awashima wase u eren Yehova tom la a veren ishima sha mi ye. Er Yehova kua mbawanndor a vese ve doo se ishima yô, ka se eren Aôndo tom a ishima yase cii. * (Mar. 12:30, 31; Kol. 3:23) U civir Aôndo a ishima yase cii la, inja na yô, ka u nan iyol yase shin uma wase cii; eren Aôndo tom a agee ase kua tahav asev er se fetyô la cii.

5-6. Tese ikyav er or u nan lu a shighe kpishi ga kpa nana fatyô u veren tom u Aôndo hiihii ken uma u nan yô.

⁵ Tôô ase wer gumor ugen soo jita i kuhwan kpishi. Ka i doo un u kuhwan ityogholough hanma shighe cii. Kwagh er doo yô maa a zua a tom u kuhwan jita sha wikeende hen ijiir i teen kwaghman. Kpa inyaregh ki i kimbin un la ki kuma ki una nengen sha iyol na ga, nahan ka a teen kwagh hen shôôpu igen Hiitom zan zan Tomataan. Er a hembe lun hen shôôpu la nahan kpa, ishima na cii ngi i lu sha kwagh u ityogholough mbi kuhwan. Sar un u seer fan ityogholough mbi kuhwan sha er una hingir orkuhwan kwagh kpôô kpôô yô. Nahan hanma shighe u ka una zua a ian i kuhwan ityogholough yô, i doo un, aluer ian la vese ga je kpaa.

⁶ Kape we kpa alaghga u fatyô u eren tom u pasen kwagh hanma shighe er u soo la ga je la. Kpa gema ka kwagh u a doo u ishima u eren je la. Ka u nôngon wer u seer fan igbenda i u pase ior loho u dedoo ve a kôr ve ken ishima yô. Er u ngee a akaa a eren yô, alaghga u lu henen er u er ve u ver tom u pasen kwagh la hiihii ken uma wou yô.

7-8. Se er nan ve se lu a ieren i Yesu lu a mi sha tom u Aôndo laa?

⁷ Yesu ver se ikyav i dedoo sha gbenda u yange eren tom u Aôndo la. Ken uma na cii yange  a hemba veren ishima na sha u ôron ior kwagh u Tartor u Aôndo. (Yoh. 4:34, 35) Yange zende umai uderi imôngo sha er una nôngo a pase ior kpishi kwagh yô. Shi yange a nôngo ér una lam a ior sha hanma ian, ape a zough a ve cii kua ken uya vev. Uma u Yesu cii yange har sha u eren tom u Aôndo.

⁸ Se fatyô u dondon ikyav i Kristu la sha u keren aan a se ôr ior kwagh u loho u dedoo ne sha hanma shighe kua ijiir i se zough a ve man sha afatyô wase cii. Ka se kegh iyol u den ser akaa agen a a doo se la a kar se sha er se er tom u pasen ivangeli ne yô. (Mar. 6:31-34; 1 Pet. 2:21) Mbagen ken tiônnongo mba eren tom u ikpur pania, mbagen di ka pania u keke, mbagen yô, ka ishuen pania. Mbagen hen ijô igen shin ve yem sha ajiir agen ape kwagh a hembe gban sha mbapasenkwagh yô. Nahan kpa, kohol cii yô, ka mba ve eren tom u pasen kwagh sha aan a tom ne ga la ve eren ci u vesen u tom u pasen ivangeli la ye. Ka ve er tom ne sha afatyô ve cii. Nahan sea eren tom ne kpishi shin sea eren u kpuaa kpuaa kpa, mayange Yehova veren ishima ér se er kwagh u se kanshio ga. A soo er se cii i saan se iyol ken tom u se lu eren u pasen “loho u dedoo u iengem u Aôndo u sar sar” la.—1 Tim. 1:11, NW; Dut. 30:11.

9. (a) Er gba u Paulu una eren tom u zuan a inyaregh nahan kpa, yange ver tom u pasen kwagh hiihii nena? (b) Aerenakaa 28:16, 30, 31 tese ér Paulu yange nengen tom u Aôndo u lu eren la nena?

⁹ Apostoli Paulu yange ver tom u pasen kwagh hiihii ken uma na, nahan a ver se ikyav i dedoo i se fatyô u dondon yô. Shighe u lu ken Korinte zum u za zende na u mishen u sha uhar la, inyaregh za bee un nahan a hide a tsa ker shighe kar, lu eren tenti. Nahan kpa Paulu gema tom u eren tenti la hingir un tom u hemban cii ga. Yange lu eren tomaveegh la sha u nengen sha iyol na ken tom na, sha er una pase Mbakorinte loho u dedoo “gbilin” yô. (2 Kor. 11:7) Er gba u Paulu una eren tom sha er una zuan a ishange kobo nahan kpa, yange za hemen u veren tom u lu eren Aôndo la hiihii ken uma na, nahan hanma iyange i memen yô, a za pase ior kwagh. Akaa nga va we lun guda yô, Paulu maa hemba nan ishima sha tom u pasen kwagh. A “wa ityough tesen mkaanem ma Aôndo kpoghuloo, lu pasen Mbayuda kwagh, tesen er Yesu a lu Kristu yô.” (Aer. 18:3-5, NW; 2 Kor. 11:9) Shighe kar yô, i va tswer Paulu zende gba u una due hen ya na ape lu ken Roma la una za mape ga anyom ahar jimin. Nahan kpa, Paulu a pase hanma or u nan ve u va nengen a na cii loho u dedoo shi lu ngeren uwashika. (Ôr Aerenakaa 28:16, 30, 31.) Mayange Paulu de ér kwagh môm a dan un u eren tom na u pasen kwagh la ga. A nger ér: “Er se lu mbaeren tom ne . . . yô, se mba gbe uwer ga.” (2 Kor. 4:1, NW) Nahan aluer gba u se tôôn shighe kpishi u eren tom u nengen sha iyol yase kpa, se fatyô u veren tom u Tartor la hiihii ken uma wase, er Paulu nahan.

10-11. Aluer kwaghnyoon na ka u se fatyô u eren tom u pasen kwagh er ma se er la ga kpa, se kôrcio u eren tom wase kuren doo doo nena?

¹⁰ Aluer se mba kera fantyô u pasen kwagh sha uya uya ga sha ci u iyolbeen shin kwaghnyoon kpa, se fatyô u pasen kwagh sha igbenda igen. Mbapasen ivangeli mba sha ayange a mbaapostoli la yange ve pase ior kwagh hanma ijiir i ve zough a ve cii. Yange ve ôr ior kwagh u mimi ne sha hanma ian i ve zough a mi cii; sha uya uya man ken igbar kua shighe u ian i dugh kpaa, hanma ijiir i ve “kohol” ior cii. (Aer. 17:17; 20:20) Aluer ka u se kera fatyô u zenden kpishi ga kpa, se fatyô u teman ape ior ve banen ga yô, nahan pasen mbakarengbenda kwagh. Gayô se fatyô pasen ior kwagh shighe u ian i dugh yô, shin ngeren ve washika shin pasen or kwagh sha telefon. Mbapasenkwagh kpishi mba ve kera fetyô u pasen kwagh sha  uya uya ga la vea fatyô u zuan a msaanyol kpishi sha u pasen kwagh sha igbenda igen ne.

¹¹ Aluer kwaghnyoon na u kera fetyô u pasen kwagh er u soo la ga kpa, u fatyô u eren tom wou kuren doo doo. Shi nenge ase ikyav i apostoli Paulu ne. Yange kaa ér: “M ngu a agee a eren akaa cii je ken Un u A taver mo ne.” (Fil. 4:13) Shighe u Paulu za zende na u mishen ugen ve za gba angev la, kwagh gba un sha imba agee la. Yange kaa a Mbagalatia ér: “Lu sha ci u angev mbu ken iyol man m ôr ne Loho u Dedoo sha hiihii ye.” (Gal. 4:13) We kpa, alaghga kwaghnyoon wou la una gema a bugh aan a pasen mbagenev loho u dedoo, er mbatwerev kua mbagen mba ve wasen u nengen sha we la nahan. Ior mban kpishi ka ve yar tom shighe u mbapasenkwagh ve ze u pasen kwagh sha uya vev yô.

12. Inja i u veren ishe you “dedoo” shin jighilii la ér nyi?

¹² Yesu yange kaa ér: “Imenger i iyolough ka ishe; nahan aluer ishe you ia lu dedoo [shin jighilii] yô, iyol you cii kpaa ia iv a iwanger.” (Mat. 6:22) Yange ôr nahan ver ishigh er nyi? Yesu lu kaan ér gba u se eren akaa ken uma wase akuma akuma shin se ver ishima sha u kuren ma awashima shin eren kwagh, lumun ser kwagh ugen môm a dan se shin a yange se ga. Yesu iyol na yange ver ikyav i dedoo sha gbaa ne sha u nan uma na cii sha tom u lu eren la, shi tese mbadondon un kpaa ér ve na ishima ve cii sha u civir Yehova shi eren tom u Tartor na. Ka se dondo ikyav i Yesu la sha u nan uma wase cii u eren Aôndo tom, sha u ‘vanden keren Tartor u Aôndo man perapera Na.’—Mat. 6:33.

13. Ka nyi ia wase se ve se hemba veren ishima yase sha tom u Aôndo?

 ¹³ Gbenda môm u se fatyô u veren ishima yase sha tom wase u pasen kwagh yô, ka u panden akaa agen ken uma wase sha er se hemba zuan a shighe u seer wasen mbagen u va fan Yehova shi soon un yô. * Ikyav i tesen yô, se fatyô u panden shighe wase u tom sha er se seer zuan a ian i duen kwaghpasen ken atô u kasua? Se fatyô u panden akaa agen a se eren sha u zuan a msaanyol a nga a ya se shighe kpishi laa?

14. Orgen vea kwase na yange ve er nena sha er vea seer nan ishima ve kua shighe ve sha tom u pasen kwagha?

¹⁴ Ka kwagh u yange ortamen ugen u i yer iti na ér Elias yô, vea kwase na ve er je la. Elias kaa ér: “Yange se lu a gba eren pania hen shighe la ga, kpa se nenge ser gba u se hii u tôôn angahar. Maa se hii u nôngon kure kure seer shighe wase u pasen kwagh. Ikyav i tesen yô, yange se pande inyaregh ki vihin shi se pande ahumbe a man sha igbenda kpishi, shi se lam a ior mba ve tôô se tom la ser ve sôr tom wase sha er se seer zuan a shighe u pasen kwagh yô. Kwagh la na yô, se zua a shighe u duen kwaghpasen aikighe shi seer henen Bibilo a ior shi duen kwaghpasen ken atô u kasua je kpaa kwa har hanma uwer. Yange saan se iyol kpen kpen!”

15-16. Er 1 Timoteu 4:13, 15 a tese nahan, se er nan ve se seer fan kwaghpasene? (Nenge ngeren u kiriki u a lu a itinekwagh ér “ Akaa a a Wasem u Eren Tom Wam Kuren Doo Doo Yô” la kpaa.)

¹⁵ Gbenda ugen u se fatyô u eren tom wase kuren u doo doo yô, ka sha u seer nyôôso igbenda yase i pasen kwagh. Ityom igen i ior ve eren yô, ka i tsaase ve hanma shighe shi i tesen ve akaa sha er vea seer lun a mfe shi vea hemba  fan u eren u tsema tsema yô. Kape mba pasen kwagh u Tartor kpa kwagh ve a lu je la. Gba u se za hemen u henen igbenda i se seer fan u pasen kwagh tsema tsema yô.—Anz. 1:5; ôr 1 Timoteu 4:13, 15.

¹⁶ Kpa se er nan ve se seer zan ikyura ken tom wase? Ka sha u dondon kwaghwan u se zough a mi hanma kasua ken Mkombo u Uma Wase man Tom Wase la. Ka se zua a ityesen i injaa ken mkombo ne i ia wase se, se hemba fan igbenda i eren tom wase u kwaghpasen yô. Ikyav i tesen yô, shighe u orhemen mkombo a lu wan mba ve er asaimenti kwagh yô, se fatyô u henen kwagh ken kwaghwan la u una wase se u seer fan u eren tom wase yô. Se duen kwaghpasen kwagen yô, maa se dondo mbamhen mbara zum u se lu pasen or loho u dedoo yô. Se fatyô u pinen iwasen hen ortamen u a hemen annongo wase u duen kwaghpasen la, shin duen kwaghpasen vea na, gayô ma orpasenkwagh ugen u nan fe kwaghpasen tsema tsema yô, shin pania gayô vea ortamen u sôron atôônanongo. Se nguren fan u eren tom a hanma ikyagh ki tomough ken Akaa a Se Eren Tom a Mi u Tesen Ior Bibilo Yô la tsema tsema yô, tom wase u pasen kwagh man u tesen la ua hemba maan se iyol.

17. Aluer u er tom wou u kure doo doo yô, ka nyi u zua a mi?

¹⁷ Yehova na se icivir kpen kpen; a de se ér se lu “mbashirentom a” Na imôngo. (1 Kor. 3:9) Aluer u “fa akaa a a hembe lun a inja” la shi u ver ishima you cii sha tom u Aôndo yô, u “civir . . . TER a iember.” (Fil. 1:10; Ps. 100:2) Er u lu or u shiren Aôndo tom yô, u fatyô u lun a vangertiôr wer una na u agee a eren tom wou aluer u tagher a mbamtaver nan je kpaa. (2 Kor. 4:1, 7; 6:4) Aluer mlu wou na u ian i u fatyô u eren tom ne kpishi shin eren u kpuaa tseegh kpa, u fatyô u lun a “ityôkyaa i tan ihyagh” shin ember aluer u er u sha afatyô wou cii yô. (Gal. 6:4) Aluer u ngu eren tom wou wer u kure u doo doo yô, u tese wer Yehova man mbawanndor a we doo u ishima. “Aluer ú er nahan yô, ú yima iyol you kua shi mba ve lu ungwan we la kpaa.”—1 Tim. 4:16.