Ikyav tese ér lu nahan ga cii. Diabolo yange kaa a Ifa ér aluer a ya kon u Aôndo wa tindi ér ve de ye ga la yô, una lu inja er a kpe kpa kwagh ugen ken a na u a fatyô u nengen a mi sha ashe ga yô una due a za lu ijiir igen ga (kwagh u ior kpishi nyian ka ve senge ér ka jijingi u ka or a kpe ve a due ken a nan a yem la). Satan yange nyôr ken iyô kaa a Ifa ér aluer a ya atam a kon la kpa ‘una kpe je ga.’ Satan lu kaan jighilii ér, Ifa una za hemen u lun uma, ember uma sha tar a u lun sha ikyev i Aôndo shio.—Gen. 2:17; 3:3-5.

Aluer ka ken sule u Eden ityesen i i samber nyian ér or ka nana kpe kpa kwagh ugen a due ken a nan a za hemen u lun her la yange i hii ga yô, ka hanma shie ityesen ne yange i hii? Se fatyô u fan jighilii ga. Kpa kwagh u se fe yô, yange i bee a hanma ityesen i aiegh cii kera sha shie u Mngerem ma Deemee ma sha ayange a Noa la. Er lu Noa vea tsombor na tseegh war Mngerem ma Deemee mara man ve cii ve civir Aôndo sha mimi yô, ma or lu u samber a atesen a aiegh ga.

Sha nahan yô, ka keng ityesen i i samber nyian wuee ér or ka nana kpe yô, jijingi u nan a due a za hemen u lun uma her la hii shie u Mngerem ma Deemee va kar kera la. Shie u Aôndo nzughul ior zwa nahan ior sambe “sha tar cii wue wue” la, yange ve hii u samber a ityesen ne je ka u henen a hen ga. (Gen. 11:8, 9) Aluer ka hanma shie je yange kwagh u ityesen ne hii kpa, se fa dedoo ser ka Satan Diabolo u a lu “ter u mbaerenaie” la hii kwagh ne ye. Shi yange doo un kpishi u nengen er ityesen ne lu samber wuee yô.—Yoh. 8:44.