WE U nenge iyol you yô, u ngu or u lun a ishughun shin wuese kwagh kpa? Mpin ne ka mpin u i gbe u hanma wase nana hen sha mi yô. Bibilo yange i tsenga ôron ér ior kpishi sha ayange a ase ne vea lu ior mba “wuese kwagh ga.” (2 Tim. 3:2) Alaghga we je kpa u tagher a ior mbagen mba ve nengen ér gba u a eren ve hanma kwagh shin a naan ve a na akaa inja er or ngu ve a injô yô. Ka i lu inja er ve nenge ér ityôkyaa ngi i vea wuese kwagh u or er a ve shin nan ne ve la ga nahan. We kpa alaghga ka saan we iyol u lun imôngo a ambaaior la ga.

Nahan kpa mbacivir Yehova yô, A kaa a ve ér: “Tesen nen ner ne mba a ishughun.” Gba u se ‘sughun Aôndo sha hanma kwagh cii.’ (Kol. 3:15; 1 Tes. 5:18) Jighilii yô, aluer se mba a ieren i wuese kwagh shin nan ishughun yô, se iyol yase je kpa a kpe se iyol. Atôakyaa nga a i ne ve kwagh a lu nahan yô.

Ityôkyaa i injaa i i doo u se lu a ieren i wuese kwagh shin nan ishughun yô, ka sha ci u kwagh ne ka a wase se u nengen iyol yase sha gbenda u dedoo. Or ka nana sugh or yô, i saan nan iyol di vough er or u i sugh nan la kpa ka i doo nan nahan. Er nan ve ishughun ka i na i saan se kua mbagen iyolo? Nenge ase ikyav ne: Ka wea nenge wer mbagen kegh iyol u eren kwagh sha ci wou yô, u fa je wer ve nenge ér u kuma kwagh la. Ve wa u ikyo. Ka wea nenge er ve we u ikyo nahan yô, i saan we iyol. Man ka keng Rutu kpa kape yange a lu un je la. Boashi er Rutu iyua mgbeghaa. Yange a saan Rutu iyol u nengen ér or wa un ikyo je ka kwagh u henen a hen ga.—Rutu 2:10-13.

Or u i hembe doon u se naan nan iwuese shin ishughun yô, ka Aôndo. Ka keng we kpa ashie agen ka u tema u hen sha uiyua mba sha iyol man mba ken jijingi mba a ne se shi a lu nan se her la. (Dut. 8:17, 18; Aer. 14:17) Kpa ishima i de za gberen we a gber sha akaa ne tseegh ga; tôô shie gbidye kwar sha averen a Yehova a ne u kua ior ou la. Aluer u gbidye kwar sha akaa a Orgbanakaa ne a er la yô, u seer wuese un shi u seer nengen er u doo un ishima shi a we u ikyo yô.—1 Yoh. 4:9.

Kpa er kwagh i hemba di u henen sha akaa a dedoo a Yehova a er a we kua averen a a ne u la; wuese Yehova shi na un ishughun sha akaa a dedoo ne. (Ps. 100:4, 5) Ior mbagen kaa ér “ka wea wuese ior shin wea naan ve ishughun yô, i seer saan we iyol.”

Ityôkyaa igen i i ne ve i doo u se wuese kwagh shin se luun a ishughun yô, ka sha ci u kwagh ne ka a taver ikyar i se ye vea mbagen la. Hanma wase cii ka a wuese nan yô, i doo nan. Ka wea sugh or shin wea wuese nan sha ma kwagh u dedoo u nan er yô, kwagh la a na ne seer lun kôôsôô. (Rom. 16:3, 4) Heela tseegh ga, ior mba ve wuese kwagh mba hembe wasen mbagen. Or ka nana er erdoo a ve yô, kwagh la hungur ve ga, shi kwagh shon ngu a mgbegha ve u eren a mbagen kpaa dedoo. Sha mimi yô, ka sea wasen mbagenev yô i saan se iyol. Ka i lu di vough er Yesu yange kaa nahan, ér: “Or u nan ne kwagh la ka i hemba saan nan iyol a or u nan ngohol la.”—Aer. 20:35.

Orgen u yange lu môm ken mbavesen mba ve lu nengen sha kwaghtôvon u sha kwagh u lun a ishughun ken Yunivasiti i California, i yer iti na ér Robert Emmons yô, kaa ér: “Aluer se soo u lun ior mba wuese kwagh shin mba lun a ishughun yô, doo u se fa ser, se kpa kwagh gbe se a mbagen. Ashie agen ka se na ve kwagh, shi ashie agen di ve kpa ve na se kwagh.” Jim je yô, ka er ior mbagen ve eren akaa kpishi sha ci wase ve se lu uma shi i saan se iyol ye. Ikyav i tesen yô, alaghga mba ne se kwaghyan gayô mba eren se twer. (1 Kor. 12:21) Or  u lun a ishughun ka nan wuese akaa a mbagen ve eren a nan la. Nahan, we ka ikye you u wuese mbagen sha akaa a ve eren sha ci wou la kpa?

Ityôkyaa igen i i ne ve i gbe u u lu a ieren i wuese kwagh shin lun a ishughun yô, kwagh la ngu a wase u u hemban veren ishima sha akaa a doon a u zough a mi ken uma la. U kera shin henen sha akaa a bo shin akaa a vihin a a er u la ga. Se fatyô u kaan ser mhen shin ishima you i eren tom er lalia shin kwagh u kasen zar kwagh nahan. Ka wea lu or u wuese kwagh yô, u hemban veren ishima sha akaa a dedoo a akaa a vihin. Ka u hemban nengen a akaa a doon la, nahan u kera shi veren ishima sha mbamzeyol ga, shi u hemba lun or u wuese kwagh cii. Ka wea hemban nengen a akaa a u lu a iwuese sha mi yô, kwagh la a wase u u eren kwagh u apostoli Paulu yange ôr ne, ér: “Ember nen ken Ter hanma shighe cii.”—Fil. 4:4.

Ka wea lu or u wuese kwagh yô, kwagh la a wase u u de u henen sha akaa a vihin. Ka wea luun a ishughun shin wea wuese kwagh yô, ka i taver u lun a iyuhwe ken ishima shin uren shin wan kwagh ishima a or hen shie shon môm. Ior mba wuese kwagh mba lun ior mba zendan uyôughyôughmbaakaav ga. Kwagh u ve lu a mi la ngu a kuma ve shi ve lu a iwuese kpaa, kwagh gbe ve u keren ér vea seer lun a akaa ga.—Fil. 4:12.

Er u lu Orkristu yô, u lan er Satan una soo ér i lu u ga. Una soo ér mbamtaver mba u lu tagher a mi ken ayange a masejime ne la ve na iyol i kpe u shi we u ure. Aluer kwagh la na u ngu nengen wer shie môm kpa kwagh a za a we a doo ga, shi ka u shi gban ahon yô, a doo un kpen kpen. Aluer u ngu a imba ieren la yô, alaghga a taver ior u keghen ato a we zum u u lu pasen loho u dedoo yô. Jighilii je yô, ieren i wuese kwagh shin lun a ishughun la ngi i yemen ihyan i môm vea ityamegh ki jijingi u Aôndo la. U tesen ikyav yô, ka u zua a iember sha akaa a dedoo a Aôndo a ne u la, shi u na uityendezwa nav jighjigh kpaa.—Gal. 5:22, 23.

Er u lu or u civir Yehova yô, we je kpa u huna kwagh u i er sha kwagh u ieren i wuese kwagh shin lun a ishughun ken ngeren ne la ga. Nahan kpa, aluer u nenge dedoo yô, ka i lu ican kpishi u lun or u wuese kwagh shi hemban veren ishima sha akaa a doon tseegh. Nahan aluer ka taver we kpa, kwagh la a de ne u iyolkpen ga. We kpa u fatyô u lun a ieren ne shi u za hemen u hemban veren ishima sha akaa a dedoo ken uma wou kpaa. Kpa u er kwagh ne nena? Hanma iyange yô, nôngo tôô shie hen sha akaa agen ken uma wou a u fatyô u lun a ishughun shin iwuese sha mi yô. Aluer u ngu eren nahan yô, u lu seer lun a ieren i wuese kwagh la. Kwagh la una na a hemba saan we iyol a ior mba ve hembe veren ishima sha mbamtaver mba ve tagher a mi ken uma la. Henen sha akaa a dedoo a Aôndo kua ior mbagen ve eren a nga a na ishima i taver we shi i saan we iyol la. U fatyô u hiin u ngeren ambaakaa la ken takerada je kpaa. U fatyô u ngeren akaa ahar shin atar nahan aa a ne i saan we iyol ken iyange la yô.

Mbatôvon sha akaa mba ve tim sha kwagh u ieren i wuese kwagh shin lun a ishughun la kaa ér: “Ka a lu ikye yase u wuese kwagh yô, kwagh la a mgbeghan gbenda u mhirinim asem ma henen kwagh la, nahan i hemban lun se ican ga u nengen a akaa a dedoo ken uma wase cii.” Ka hembe saan or u wuese kwagh iyol. Sha nahan yô, henen sha averen a ou, tôôn shie henen sha akaa a a er u ken uma a doon la shi luun a ishughun! Mayange de tôôn akaa a dedoo a a er u ken uma la beelee ga, ‘wuese TER gadia A doo.’ Shi ‘sughun Aôndo sha hanma kwagh cii.’—1 Kron. 16:34; 1 Tes. 5:18.