Kwagh u i nger ken Duteronomi 22:25-27 la ngu ôron ka kwagh u ibo i or la ga, sha ci u Tindi yange vande tesen ér nan ngu a ibo. Tindi ne lu ôron lu kwagh u ishô i wankwase la jighilii. Nenge ase avur agen a a kase avur la yô.

Avur agen a a lu cii ve avur shon ne la ôr kwagh u or u nan yav a wankwase u i lu sôôr nan a sôôr la “ken gar” yô. Or la yange nan lu a ibo sha ci u nan er idya, gadia yange i tôô wankwase u i lu sôôr nan a sôôr shin nan tende zwa a nom la inja er nan er nom kera kpaa nahan. Nahan kpa hide kwase la di ye? Un kpa yange i kaa ér a er idya “sha ci u a lu ken gar je, kpa a gbir vaa ga yô.” Luun er kwase la nan gbire vaa yô, mbagen ma ve ongo nahan ma ve va wase nan. Kpa er nan hee var ga yô, nan kpa nan lu uwegh ken idya la, nahan ve uhar cii yange i kure ve ijir ér mba a ibo.—Dut. 22:23, 24.

Tindi maa hide pase kwagh ugen kpaa, ér: “Man aluer or la nana kohol wankwase u i sôôr un a sôôr la ken toho man nana kighir un sha apera, nana yav a na yô, or u nan yav a na la, nana̱ kpe tswen; kpa wankwase la yô, de eren un kwagh ga; hen wankwase la ma isholibo i kuman ku ngi ga, gadia kwagh ne ngu er or u nan te num sha anngô u nan, nan woo un yô; gadia nan kohol un ken toho, un wankwase u i sôôr un la, a gbire vaa, kpa ma or u yiman un lu ga.”—Dut. 22:25-27.

Yange kwagh a luun nahala yô, mbaajiriv ve tôô ér wankwase la “gbire vaa, kpa ma or u yiman un lu ga.” Nahan wankwase la er idya ga. Kpa or la yô, nan lu a ibo sha ci u nan er idya shi nan ‘kighir [wankwase la] sha apera, nan yav a na,’ man ka wankwase u i lu sôôr un a sôôr yô.

Sha nahan yô, shin er tindi hemba ôron kwagh u ishô i wankwase la jighilii nahan kpa, kwagh u i nger la tese wang ér or la ngu a ibo sha ci u nan kighir wankwase la nan yav a na shi nan er idya. Shi se fatyô u lun a vangertiôr ser mbaajiriv mbara yange ve “tôv sha min kpiligh kpiligh” shi ve tsua kwagh u a zough sha atindi a Aôndo a tese shi i vande ôron a sha ajiir agen kpaa kwa kimbir kimbir yô.—Dut. 13:14; 17:4; Eks. 20:14.