1-2. (a) Yehova ka una nenge ior umiliôn vea kohol imôngo sha ci u Kwaghyan u Ter u Aikighe la nahan, ka nyi ngu a nenge a mi? (Nenge foto u a lu sha igbende la.) (b) Ka nyi se lu timen sha mi ken ngeren nee?

U HEN wer Yehova ka una nenge ior umiliôn imôngo sha tar vea kohol sha u eren mkombo u Kwaghyan u Ter u Aikighe la nahan, ka nyi ngu a nenge a mi? Ka ikpelaior tsô ngu a nenge a mi ga; Yehova ngu a nenge a hanmaor u nan ze mkombo ne cii. Ikyav i tesen yô, ngu a nenge a mba ve ve mkombo ne sha hanma inyom la. Ve mbagen ka ve tagher a atsan tsung je, kpa ve nôngo ve va keng. Mbagen yô, mba fetyô u van mbamkombo mbagen hanma shighe ga, nahan kpa, mkombo u Umbur Ku u Yesu ne yô, ka ve nenge ér ka u vea bunde ga. Yehova shi ngu a nenge a ior mba alaghga a lu kwa ve u hiihii u van mkombo u M-umbur, sha u vea va nenge er ka i er un la kpaa.

² Yehova ka una nenge ior vea va mkombo u Umbur Ku u Yesu kpishi nahan i doo un kpen kpen. (Luka 22:19) Nahan kpa ka iyenge i ior mba ve ve la kwagh a hembe gban un sha mi ga. Kwagh u ka a hemba gban un ishima yô, ka ityôkyaa i ve ve la, ka awashima ve la ngu a lu Yehova kwagh ye. Se lu timen sha mpin u injaa ugen ken ngeren ne. Mpin shon yô ér: Er nan ve se ze mkombo u Umbur Ku u Yesu u i eren kwa môm ken inyom la kua mbamkombo mba se eren hanma kasua mba Yehova ngu a lôhô mba ve soo un laa?

3-4. (a) Hii nan ve se ze mbamkombo? (b) Ka sea za mbamkombo yô, kwagh la a tese ér nyi? (c) Kwagh u i er ken 1 Mbakorinte 11:23-26 tese ér gba u se bunde Mkombo u Umbur Ku Yesu ga sha ci u nyi?

³ Ityôkyaa i vesen i i ne ve se ze mbamkombo mba tiônnongo yô, ka sha ci u ka gbenda ugen u se civir Yehova yô. Shi ka se za mkombo sha ci u ka ker Yehova a tesen se ye. Ior mba ve kenden  a iyol sha yô, ka ve nenge ér or ngu a kwagh u tesen ve ga. (3 Yoh. 9) Nahan kpa se yô, ka i sar se tsung u Yehova man nongo na ve tese se.—Yes. 30:20; Yoh. 6:45.

⁴ Ka sea zaan mbamkombo yô, kwagh la a tese ér se mba ior mba hiden a iyol ijime, shi se kegh a kegh iyol ser i tese se. Hen tugh mbu Umbur Ku u Yesu la, ka se za mkombo u injaa ne sha ci u gba hange hange tseegh ga, kpa ka i lu sha ci u dondon tindi u Yesu wa la kpaa, ér: “Eren nen kwagh ne sha u umbur Mo.” (Ôr 1 Mbakorinte 11:23-26.) Mkombo la ka a seer taver ishimaverenkeghen yase shi a umbur se er se doo Yehova ishima tsung yô. Nahan kpa, Yehova fa er i gbe u a taver se asema hanma shighe, a lu di kwa môm tseegh ken inyom ga yô. Sha nahan yô, ngu a lôhô se mkombo hanma kasua shi a taver se ishima ér se zaan ve kpaa. Iyolhiden a mi ijime ka i mgbegha se u zan. Ka se tôô shighe kpishi hanma kasua se wa iyol sha mbamkombo mban shi se za ve.

5. Ior mba hiden a iyol ve ijime ka ve er nena sha mlehe u Yehova a lehe ior ér ve va una va tese ve laa?

⁵ Hanma inyom yô, ior kpishi mba hiden a iyol ijime ka ve vengese myer u Yehova a yer ve ér una tese ve la. (Yes. 50:4) Ashighe kpishi ka ve hii van mkombo u Umbur Ku u Yesu la, maa ve gema van mbamkombo mbagen mbara kpaa. (Sek. 8:20-23) Se cii ka i saan se iyol, kua mbahev mbara kpaa er Yehova u a lu “iwasen [yase] man Or u yiman” se la a lu tesen se shi hemen se yô. (Ps. 40:17) Jighilii yô, kwagh môm u hemban nan msaanyol shin u a hembe lun a inja a u lumun ser Yehova man Wan na Yesu ve tese yô, ngu ga.—Mat. 17:5; 18:20; 28:20.

6. Iyolhiden a mi ijime yange i wase orgen u zan Mkombo u Umbur Ku u Yesu nena?

⁶ Hanma inyom yô, ka se nôngo sha afatyô wase se lôhô ior mkombo u Umbur Ku u Yesu la er se fetyô cii. Ior kpishi mba hiden a iyol ijime lumun u van mkombo ne, nahan ve zua a mtsera kpishi je. Nenge ikyav i môm. Anmgbian ugen yange na orgen kwatakerada u lôhôn un mkombo u Umbur Ku u Yesu la, kpa or shon kaa a anmgbian la ér una fatyô u van ga. Nahan kpa, hen tugh mbu mkombo ne la, or la va due hen Iyou i Tartor, nahan kpiligh anmgbian la iyol kpen kpen. Gbenda u i sugh or ne, i ngohol un sar sar la, doo un tsung, maa hii u van mbamkombo asev mba se eren hanma kasua la. Jim je yô, ken inyom i dondon la cii, or la bunde mbamkombo ker utar tseegh. Ka nyi yange i mgbegha un gema van mbamkombo ciilii? Lu or u lun ishima legh legh, nahan er kaa sha hiihii la ér una va ga nahan kpa, va gema ishima, nahan va. Shighe kar yô, anmgbian u yange lôhô un la va kaa nahan ér, “Ka or u hiden a iyol ijime tsung.” Ikyav tese wang ér Yehova yange urugh or ne ér a va civir un. Hegen a er batisema, ngu anmgbian.—2 Sam. 22:28; Yoh. 6:44.

7. Akaa a ka se hen ken mbamkombo kua a ka se ôr ken Bibilo la aa wase se u hiden a iyol ijime nena?

⁷ Akaa a ka se hen ken mbamkombo kua akaa a ka se ôr ken Bibilo la, aa fatyô u wasen se u hiden a iyol ijime. Ukasua mba ka ve mase shin kpuaa u a Umbur Ku u Yesu la, mbamkombo asev cii ka ve hemba veren ishima sha ikyav i Yesu kua ieren i hiden a iyol ijime i yange tese sha u nan uma na sha u paan se la. Shi ka a masen shin ayange kpuaa u a umbur Ku u Yesu yô, i taver se ishima ér se ôr avur a Bibilo a a pase akaa a yange mase eren zan zan shighe u i kar wuan Yesu kua shighe u nder shin ku la. Akaa a ka se hen ken mbamkombo mban kua akaa a ka se ôr ken avur a Bibilo shon la cii nga a na se seer lun a iwuese sha nagh ku Yesu na sha ci wase la. Kwagh la ka a mgbegha se u dondon ieren na i hiden a iyol ijime la, shi eren ishima i Yehova zum u se tagher a mbamtaver kpaa.—Luka 22:41, 42.

8. Yesu yange tese ishimataver nena?

⁸ Ka se nôngo ser se kav Yesu sha u dondon ikyav i ishimataver na la kpaa. Hen ase sha ishimataver i Yesu tese ken ayange a shi kpuaa u una kpe la. Yange fa dedoo er ica a gba ga tsô mbaihyomov nav vea hee un shi vea gbidye un shi vea wua un yô. (Mat. 20:17-19) Nahan je kpa, yange kegh iyol u kpen. Ka va nyer sha shighe la yô, a kaa a mbaapostoli nav mbajighjigh mba ve lu vea na ken Gesemane la ér: “Mough nen sha, se yem nen; nenge, u a nengen mker sha a Mo la, mgbôghom.” (Mat. 26:36, 46) Heela tseegh ga, shighe u ikpelaior i toron asema va a ikyav mbi tswamev u va kôron un la, a due a tile tseer tseer, ér mo ne shi a kaa a ushoja mbara ér ve de mbaapostoli nav ve yem. (Yoh. 18:3-8) Nenge imba ishimataver i Yesu tese la sha wono! Nyian ne, Mbakristu mba i shigh ve mkurem kua mba ve lu iyôngo igen la cii ka ve nôngo ér vea dondo ikyav i Yesu la sha u lun a ishimataver. Ka ve tese ishimataver shon nena?

9. (a) Er nan i gbe u saa se taver ishima ve se kôrcio u zan mbamkombo hanma shighe? (b) Ikyav yase ia fatyô u benden a anmgbianev mba i wuhu ve sha ci u jighjigh ve la nena?

⁹ Alaghga a gba u saa se lu a ishimataver zum u se tagher a mbamtaver la keng ve se kôrcio u zan mbamkombo hanma shighe ye. Anmgbianev asev mba nomso man mba kasev mbagen ka ve za mbamkombo shin er ve ure tsung shin iyol i kpe ve gayô ve lu yan ican a kwaghnyoon nahan kpaa. Mbagen ka ve taver ishima ve za mbamkombo shin er mba hen tsombor ve shin mbahemenev mba gomoti ve lu hendan a ve kpoghuloo nahan kpaa. Hen ase er ikyav yase la ka i bende a anmgbianev asev mba i wuhu ve ken purusu sha ci u jighjigh ve la yô. (Heb. 13:3) Ka ve za hemen u lun a jighjigh shi taver ishima shi tilen sha mimi zum u ve ongo ér se mba civir Yehova her shin er se lu tagher a akaa a karen jighjigh wase nahan kpaa. Apostoli Paulu kpa imbakwagh la yange i er un. Shighe u lu ken purusu ken Roma la, yange una ungwa ér anmgbianev nav mba civir Yehova sha mimi yô, a ember tsung. (Fil. 1:3-5, 12-14) Shighe u shi kpuaa a pase Paulu shin i pase un ica lu a gba ga la, Paulu nger washika hen Mbaheberu. A taver Mbakristu mbajighjigh mbara ishima ken washika la ér “dooshima u [ve] anmgbianev ve doo ayol a ve la a̱ lu her” shi kaa ér ve kumban imôngo kpaa.—Heb. 10:24, 25; 13:1.

10-11. (a) Ka unô se fatyô u lôhôn ve mkombo u Umbur Ku u Yesu? (b) Ka ityôkyaa i nyi i lu ken Mbaefese 1:7 i se eren kwagh nee?

¹⁰ Ka se tese ishimataver zum u se lehe mba hen tsombor wase shin mba se eren tom imôngo kua mbawanndor a vese mkombo u Umbur Ku u Yesu yô. Ka se lôhô ve sha ci u nyi? Se mba a iwuese sha kwagh u Yehova man Yesu ve er sha ci wase la je ka u se gba uwegh u lôhôn mbagenev mkombo ne ga. Se soo ser ve kpa ve va zua a mtsera ken ‘mrumun u sha mhôôn’ u Yehova a tese se sha nagh ku ipaan la.—Ôr Mbaefese 1:7; Mpa. 22:17.

¹¹ Ka sea taver ishima a kohol imôngo yô, kwagh la a tese ieren injaa igen kpaa, ka ieren i Aôndo man Wan na ve tese i sha igbenda i vesen yô.

12. (a) Mbamkombo asev ka ve na Yehova man Yesu ve seer doon se ishima nena? (b) Ka nyi 2 Mbakorinte 5:14, 15 a taver se ishima se er sha u dondon ikyav i Yesu?

¹² Yehova man Yesu doo se ishima, nahan dooshima la ngu a mgbegha se u zan mbamkombo. Nahan kwagh u ka se za hen ken mbamkombo la di ngu a na Yehova man Wan na ve seer doon se ishima. Ka sea za mbamkombo yô, i umbur se kwagh u Yehova kua Yesu ve er sha ci wase la. (Rom. 5:8) Mkombo u Umbur Ku u Yesu la, ngu a umbur se er se cii se doo Yehova man Yesu ishima tsung yô. Man kwagh ne ka se tseegh ga kua mba ve lu a kav mluainja u nagh ku ipaan kura ga la kpaa. Kwagh ne ngu a iv asema ase a iwuese nahan se nôngon ser se kaven Yesu ken uma wase ayange ayange. (Ôr 2 Mbakorinte 5:14, 15.) Heela tseegh ga, ishima yase shi ka i mgbegha se u wuese Yehova er a ne se iyua i ipaan la yô. Gbenda môm u se fatyô u wuese un yô, ka sha u nan mbamlumun ken mbamkombo asev a ishima i môm.

13. Se tese ser Yehova man Wan na doo se ishima tsung nena? Pase.

¹³ Se fatyô u tesen ser Yehova man Wan na doo se ishima tsung sha u keghen iyol u den ser nyityôkwagh cii i kar se sha ci ve. Ashighe kpishi ka i gba u se de akaa kposo kposo aa kar se sha er se za mbamkombo yô. Atôônanongo kpishi ka a er mkombo aikighe zum u ior ve kur tom yô, man ashighe kpishi ka se vôr hen shighe ne. Mkombo ugen la di ka wikeende i nyer ye, man ka ayange a ior mbagen ve memen je la. Ka a tume se iyol man sea nôngo a za mbamkombo asev nahan, Yehova a nenge kpa? Ka A nenge yum! Shi er se lu nôngon kwagh kpoghuloo la, kape Yehova di kpa ngu a wuese dooshima wase tsung je la.—Mar. 12:41-44.

14. Yesu yange ver se ikyav i tesen dooshima u tangen iyol ga la nena?

¹⁴ Yesu ver se ikyav i doon tsung er se tesen dooshima u tangen iyol ga la yô. Yange kegh a kegh iyol u kpen sha ci u mbahenen nav shi ken uma na cii a ver mbamgbe vev hiihii, kwagh na hemba gban un ishima ga. Ikyav i tesen yô, yange lu imôngo vea mbadondon un shin er vôr kpishi shin tume un iyol nahan kpaa. (Luka 22:39-46) Yange a hemba veren ishima sha u eren kwagh sha ci u mbagen, luun sha kwagh u una zua a mi hen a ve la ga. (Mat. 20:28) Aluer Yehova man anmgbianev asev doo se ishima kpishi yô, se nôngo sha afatyô wase cii se za mkombo u Kwaghyan u  Ter u Aikighe la, kua mbamkombo mba tiônnongo mbagen mbara cii.

15. Ka unô jighilii i gbe u se hemba nan ishima sha u wasen ve?

¹⁵ Se mba ken mzough u Mbakristu mba mimi mba ve lu anmgbianev cii yô, shi ka se tôô shighe se za lôhô mbagen kpaa ser ve va kohol se. Nahan kpa, gba u se hemba veren ishima u wasen mbara mba ve lu “mbananjighjigh” a vese imôngo mba ve her tom la. (Gal. 6:10) Ka se tese ser ve doo se ishima sha u za taver ve ishima ser ve va mbamkombo, hemba je yô, mkombo u Umbur Ku u Yesu la. Anmgbianev asev mba ve her tom la ka vea hide hen Yehova, Ter wase u se doo un ishima shi a lu Orkuran se la yô, i saan un vea Yesu iyol tsung je, man se kpa kape ka i doo se je la.—Mat. 18:14.

16. (a) Se fatyô u taver ayol a ase asema nena, man mbamkombo asev vea wase se nena? (b) Er nan ve hegen i hembe lun shighe u injaa ken inyom u umbur mkaanem ma Yesu ôr ken Yohane 3:16 laa?

¹⁶ Nôngo lôhô ior mkombo u Umbur Ku u Yesu u a lu eren sha iyange i Tomataan, Aipor 19 inyom i 2019, aikighe la er u fetyô cii sha er vea va yô. (Nenge ngeren u kiriki u “ U Fatyô u Lôhôn Ve Kpa?” la.) Nahan inyom i i lu van ne, se cii se taver ayol a ase asema sha u zan mbamkombo mba Yehova a ser a ver sha ci wase la hanma shighe. Er mkur u tar ne a zurum ne, mbamkombo vea wase se u hiden a iyol ijime shi taver ishima shi tesen dooshima. (1 Tes. 5:8-11) Yô, se tese nen Yehova man Wan na er i lu se ken ishima a dooshima u ve tese se la a ishima yase cii!—Ôr Yohane 3:16.