1. Er nan se fe ser mimi je se mba ken “ayange a masejime”?

ALUER inyom i 1914 la yange i kar cii ve i va mar u yô, ayange a uma wou cii ka a ken shie u “ayange a masejime” a tar ne. (2 Tim. 3:1) Hanmô wase yô, nan ungwa kwagh u akaa a yange Yesu tsengaôron ér aa va za hemen hen shie wase ne la. Akaa ne kua ityav man mban u kwaghyan man ityartenger man iangev shi ihyembeato ia seer shi a tôv ior mba Yehova a ican. (Mat. 24:3, 7-9, 12; Luka 21:10-12) Shi se nenge ior mba eren akaa a apostoli Paulu tsengaôron la. (Nenge ngeren u kiriki u a lu a itinekwagh ér “ Ieren i Ior sha Ayange Ne”) la. Se Mbashiada mba Yehova se fa tsembelee je ser se mba ken “ayange a masetyô.”—Mika 4:1.

2. Ka mbampin mba nyi i gbe u se zua a mbamlumun sha mi?

² Hii ken inyom i 1914 la va hen shie wase ne anyom kar kpishi je. Sha nahan yô, se mba ken mkur u “ayange a masejime” ne cou cou. Er mkur a zurum yô, gba u se zua a mbamlumun sha mbampin mba hange hange mban: Ka akaa a nyi nahan aa er ken mkur u “ayange a masejime” nee? Man ka nyi Yehova a soo ér se eren hegen u se lu keghen akaa shon ne laa?

3. Er i ôr ken 1 Mbatesalonika 5:1-3 nahan, ka nyi akuraior aa yôô?

³ Ôr 1 Mbatesalonika 5:1-3. Paulu ôr kwagh u “iyange i Ter.” Iyange i Ter i i ter ken ivur ne la, ka mhii u shie u a ta num sha “Zegebabilon” u a lu tartor u kwaghaôndo u aiegh u sha tar cii la, man iyange ne ia bee sha shie u Armagedon la. (Mpa. 16:14, 16; 17:5) Cii man “iyange” la i hii yô, akuraior aa yôô “Bem, man mkpeyol”! (Bibilo mbagen gema ishember la ér:  “Bem man mkor.”) Ashie agen mbahemenev mba tar ne ka ve ôr kwagh nahan shie u ityar igen i lu nôngon u seer lun ken mzough vea igen yô. * Nahan kpa, “bem, man mkpeyol” u Bibilo i er kwagh na la yô, una lu inja kposo. Sha ci u nyi? Shie u a yôô bem man mkpeyol ne la ior vea hen ér mbahemenev mba tar ne nôngo kwagh kpoghuloo nahan bem gba; ior vea fatyô u teman kundu kundu, ken mkor a kwagh u tan ve mciem iyol shio. Kpa jighilii yô, “zegecan” una gema a hii, maa “mtim una ande sha a ve ibuv.”—Mat. 24:21.

4. (a) Ka nyi i gbe u se kegh tsô se va fa sha kwagh u “bem, man mkpeyol” u a yôô laa? (b) Ka nyi se hila fe sha kwagh u “bem man mkpeyol” u a va yôô laa?

⁴ Se pande se fa akaa agen sha kwagh u “bem, man mkpeyol” u a va yôô la. Nahan cii kpa, akaa agen nga a se fe ga yô. Se fa kwagh u una na ve a yôô kwagh ne ga, shi se fa gbenda u a yôô un kpaa ga. Aluer ka u a yôô kwagh shon acin imôngo, shin a yôô kwa môm tseegh kpa se fa ga. Aluer ka sha nyi gbenda je i va yôô kpa, kwagh u se fe yô, ka un ne: Mayange se lumun ser kwagh ne a bume se, se yem henen ser mbahemenev mba tar ne vea fatyô u van a bem ga. Doo u se fa ser, ka kwagh shon u Bibilo i kaa ér se lu tsevaa hen shie u a lu yôôn la je la. A lu kwagh u tesen ér “iyange i Ter” zulum!

5. Kwagh u 1 Mbatesalonika 5:4-6 a ôr la wase se u wan iyol keghen “iyange i Ter” nena?

⁵ Ôr 1 Mbatesalonika 5:4-6. Mkaanem ma Paulu man ôr kwagh u i doo u se er, sha er se wa iyol se keghen a kegh “iyange i Ter” la yô. Mayange ‘se kera hungur mnyam er mbagenev nahan ga.’ Gba u se ‘lu per’ shi se lu tsevaa kpaa. Ikyav i tesen yô, gba u se lu tsevaa sha er se palegh u nyôron iyol ken akaa a taregh sha u wan ave sha akaa a patii ga yô. Aluer se nyôr iyol ken akaa ne yô, se hingir “ior i tar ne.” (Yoh. 15:19) Kpa se fa ser ka Tartor u Aôndo tseegh ua fatyô u van a bem sha tar ye.

6. Ka nyi se soo u wasen ior ser ve ere, man ka sha ci u nyi?

⁶ Dugh u se lun per tsevaa la kera yô, gba u se wase mbagenev kpaa ve hen kwagh u Bibilo yange i tsengaôron ér una va er ne. Doo u se umbur ser, zegecan la una hiin je, shie a kar u ior va fan Yehova shi civir un. Ka nahan ve tom wase u pasen kwagh la u lu torough torough hegen ne yum ye! *

7. Ka nyi Yehova a soo ér se er hegene?

⁷ Yehova soo ér se uve ityough ken tom u pasen kwagh la hen anshie u a mase shin ne, cii man “iyange” la ia hii ye. Gba u se “luun . . . a akaa a eren kpishi ken tom u Ter.” (1 Kor. 15:58, NW ) Yesu vande ôron kwagh u se va  er yô. Zum u ôr akaa a aa va lu eren ken ayange a masejime la been yô, a kaa ér: “Kpa á vande ôron akuraior cii Loho u Dedoo ne keng.” (Mar. 13:4, 8, 10; Mat. 24:14) Nenge ase kwagh ne: Hanma shie u u dugh kwaghpasen yô, we kpa u ngu nôngon wer kwaghôron u profeti u Bibilo ne a kure sha mi!

8. Hii nan se fe ser, tom u pasen kwagh u Tartor ne ngu zan a za hemene?

⁸ Ka nyi i tese ér tom u pasen kwagh u Tartor ne ngu zan kera? Hanma inyom yô, ior ka ve seer ungwan loho ne. Ikyav i tesen yô, nenge ase er ingyegh ki ior mba pasen kwagh u Tartor sha tar cii ki lu seer a seer ken ayange a masejime ne yô. Ken inyom i 1914 la, mbapasenkwagh lu iorov 5,155 ken ityar 43. Nyian ne, mbapasenkwagh kuma iorov er miliôn 8 man tiôn nahan ken ityar 240. Kpa se mba a er tom wase ne se bee ga. Gba u se za hemen u yôôn ser, ka Tartor u Aôndo tseegh ua va sôr mbamzeyol mba uumace ye.—Ps. 145:11-13.

9. Er nan ve i gbe u se za hemen u pasen loho u Tartor?

⁹ Tom u pasen kwagh u Tartor ne ua bee ga zan zan saa Yehova una va kaa ér kuma ve. Nahan shie u a shi her u ior vea fatyô u fan Yehova Aôndo man Yesu Kristu la kuma nena? (Yoh. 17:3) Se fa jighilii ga. Kwagh u se fe yô, ka un ne: Cii man zegecan la a hii yô, hanma or u nan “lu a ishima i mimi i zuan a uma u tsôron” cii nana lu a ian her i ungwan loho ne shi va civir Yehova. (Aer. 13:48) Se wase amba la er shie a shi her ne nana?

10. Ka iwasen i nyi Yehova a lu nan se sha er se tese ior mimi?

¹⁰ Yehova ngu eren tom a nongo na u nan se hanma kwagh u kwagh a gbe se a mi sha er se tese ior mimi ne cii. Ikyav i tesen yô, hanma kasua yô, ka i tsaase se ken mkombo u se eren ken atô u kasua la. Mkombo ne ka a wase se u fan kwagh u se ôr a ior zum u se hii zuan a ve, kua zum u se hidi u za sôron ve la. Shi mkombo ne ngu a tese se u henen Bibilo a ior. Shi nongo u Yehova na se Akaa a Se Eren Tom a Mi u Tesen Ior Bibilo Yô la. Akaa ne ka a wase se u . . .

•   hiin iliam a ior,

• ngirigh isharen i ior,

• wasen ior u lun a isharen i seer henen Bibilo,

• tesen ior mimi shie u se lu henen Bibilo a ior la, man

• tesen mba ve lu a isharen la ijiir yase i sha Intanet la sha er vea zaan shami yô; shi lôhôn ve mkombo ken Ayou a Tartor ase.

Ka mimi, aluer se mba a akaa a wasen se u henen Bibilo a ior la tseegh yô, kuma ga. Gba u se eren tom a ikyav mbin. * Ikyav i tesen yô, aluer u lam a or u nan tese isharen man u na nan trak shin magazin yô, nana fatyô u ôron un keghen shie u u hide shi u va kwa ugen yô. Ka se ayol a ase i gbe u se tsua u pasen loho u Tartor la sha gbashima hanma uwer ye; ka kwagh u or a tsua sha ci wase ga.

11. Ka nyi yange i na ve i bugh ijiir i henen Bibilo i sha jw.org i Online Bible Study Lessons laa?

¹¹ Shi nenge ase kwagh ugen u a tese er Yehova a lu wasen ior u henen mimi yô. Ka kwaghhenen u sha jw.org^® u Online Bible Study Lessons (Ape Henen Bibilo sha Ijiir Yase i sha Intanet) la. Yange i er ijiir ne sha ci u nyi? Hanma uwer yô, ior udubu imôngo sha tar ka ve keren ijiir i vea fatyô u henen kwagh u Bibilo sha Intanet yô. Akaa a tesen ior Bibilo a a lu hen ijiir yase i sha Intanet la aa fatyô u wasen ambaaior la u hiin henen mimi u Mkaanem ma Aôndo la. Shi alaghga a taver mbagen mba u lamen a ve la u lumun ér we u hii Bibilo i henen a ve. Aluer kwagh ngu nahan yô, tese ve ijiir yase i henen kwagh sha Intanet ne, gayô tindi ve a adereshi u vea kighir maa una za a ve hen ijiir shon jighilii yô. * Shi aluer gba shami yô, tese ve ape vea zua a kwaghhenen ne ken zwa ugen u vea fatyô u kaven yô.

12. Ka nyi man nyi nahan or a fatyô u henen sha Online Bible Study Lessons laa?

¹² Ka atineakaa a a lu ken kwaghhenen u Online Bible Study Lessons la je ne: “The Bible and Its Author” (Bibilo man Orngeren I) man “The Bible’s Main Characters” (Ior Mba Bibilo I Hembe Ôron Kwagh Ve Yô), man “The Bible’s Message of Hope” (Loho u Ishimaverenkeghen u U Lu ken Bibilo La). Ka akaa a u fatyô u henen ken atineakaa la je ne:

• Gbenda u Bibilo ia fatyô u wasen or yô

• Or u Yehova man Yesu ve lu la kua ior mba mbatyomov ve lu yô

• Ityôkyaa i Aôndo yange gba uumace yô

• Er i hii ve ior ve lu yan ican shi ifer i dumbur yô

Kwaghhenen la shi time sha gbenda u Yehova una va . . .

• bee a ican i yan man ku yô,

• nder mbakpenev vea hide a lu uma yô, shi

• kar a ugomoti mba tar ne mba ve fetyô u eren kwagh u ikyoo ga la, una gema a ver Tartor u Aôndo yô.

13. Ijiir i henen kwagh sha Intanet la kar tile sha ityough ki Bibilo i se henen a ior laa? Ta iwanger.

¹³ Nahan ijiir i henen kwagh sha Intanet ne maa kar tile sha ityough ki Bibilo i se henen a ior laa? Ei. Yesu na se tom u icivirigh u geman ior hingir mbahenen. I er ijiir ne ér mba ve lu a isharen yô, ve za hen kwagh her nahan i sar ve u shi seer henen mimi u Bibilo la. Aluer ve er nahan yô, alaghga vea lumun ér i va hen Bibilo a ve. Ken mkur u hanma kwaghhenen yô, ka i na or u nan lu henen kwagh la ian sha er nana pine ér i tindi or nana va hen Bibilo a nan yô. Aluer i kar kwar yô, hanma iyange iorov 230 ka ve pine ian hen ijiir yase i sha Intanet la ér ma i va hen Bibilo a ve! Kwaghhenen u ka i va tema i henen a or la ngu hange hange kpishi!

14. Kwaghwan u Yesu u i nger ken Mateu 28:19, 20 la tese ér ka nyi ka se nôngo sha afatyô wase ser se ere, man ka sha ci u nyi?

¹⁴ Ôr Mateu 28:19, 20. Aluer se mba henen Bibilo a ior yô, gba u se nôngo sha afatyô wase  cii se ‘gema’ ve ve ‘hingir mbahenen, . . . se tesen ve u kuran akaa a [Yesu] wa se kwagh sha mi cii.’ Gba u se wase ior vea fa er i lu hange hange u vea tsua u tan ikyaa a Yehova man Tartor na yô. Inja na yô, se taver ve ishima ve gema mimi a hingir kwagh ve, sha u dondon kwagh u ve lu henen la shi tseghan ayol a ve sha ci u Yehova shi eren batisema. Saa vea er nahan keng ve, vea war iyange i Yehova ye.—1 Pet. 3:21.

15. Ka nyi se fatyô u eren ga, man ka sha ci u nyi?

¹⁵ Er se vande ôron nahan, shie u a mase shin u a va tim tar ne la kera vese ga. Sha nahan yô, se fatyô u gban zan hemen u henen Bibilo a ior mba ve lu a awashima u hingir mbahenen mba Kristu ga la kpii ga. (1 Kor. 9:26) Tom wase ne hingir torough torough! Ior ngee mba i gbe u vea ungwa loho u Tartor ne cii ve shie a va kar yô.

16. Ka nyi Mpase 18:2, 4, 5, 8 a tese ér gba u hanmô wase cii nana ere? (Shi nenge ngeren u shin kpe la.)

¹⁶ Ôr Mpase 18:2, 4, 5, 8. Avur ne shi tese kwagh ugen u Yehova a soo ér mbacivir un ve er yô. Gba u Mbakristu mba mimi cii vea lu paleghaa a Zegebabilon. Alaghga or u nan lu henen Bibilo hegen ne yange nan vande lun ken kwaghaôndo u aiegh cii ve nan va mase fan mimi ye. Alaghga yange nan zaan shi nan eren akaa ken kwaghaôndo shon je kpaa. Gayô, alaghga nan er iyua ker sha inyar. Cii man i na or u i lu henen Bibilo a nan ian i hingir orpasenkwagh u nan lu a er batisema ga yô, saa nana due ken kwaghaôndo u aiegh kera elegh elegh. Doo u nana nger washika nana pase kwaghaôndo shon ér nan kera ngu nongo a ve ga, gayô nana due ken hanma kwagh u a gbe a zough a kwaghaôndo la shin nongo u u gbe u zough a Zegebabilon cii. *

17. Ka ityom i nyi nahan i gbe u Orkristu nana palegha, man ka sha ci u nyi?

¹⁷ Gba u Orkristu u mimi nana ver ishima a nenge ér, tom u nan eren la biishi a Zegebabilon sha ma gbenda môm kpaa ga. (2 Kor. 6:14-17) Ikyav i tesen yô, nana lumun tom u i lu ma côôci shin adua a lu tôôn ior la ga. Heela tseegh ga, Orkristu u i tôô nan tom hen ma ijiir kpa, doo u nana lumun u za eren tom u ngeen hen iyagh shin sha imaagh ki kwaghaôndo u aiegh ga. Man aluer nan eren tom ka hen ijiir i nan iyol i nan je yô, nana lumun u  eren tom môm u u gbe u zough a Zegebabilon ga. Er nena ve kwagh ne i lu kwagh u eren asenge sha mi ga? Ka sha ci u mayange se soo u lun uwegh ken ityom shin asorabo a iniongo i ukwaghaôndo mba Aôndo a nenge ér ve hôngor la ga.—Yes. 52:11. *

18. Anmgbian ugen yange dondo kwaghwan u Bibilo hen tom na nena?

¹⁸ Anyom a karen ken ijime la, ortamen ugen eren kapinta, nahan orgen va kohol un ér a za er antom u manden kwagh kpuaa hen côôci i i lu hen geri u anmgbian ne kpa lu her yô. Or la yange fa er anmgbian ne a vendan u eren tom hen ayou a aduaa yô. Kpa kwa ne yô, kwagh va tsule or la nahan lu keren or fele fele u nana za er tom la yô. Nahan kpa, anmgbian ne kôr kwaghwan u Bibilo gbang, venda u za eren tom la. Ka ker kasua ugen yô, pipaabaver due a foto u orkapinta u lu manden terankon sha iyou adua shon yô. Luun er anmgbian wase la lumun u za eren tom la yô, ma lu foto na je ma lu ken pipaabaver la ye. Hen ase er kwagh la yange ma vihi iti na hen atô u Mbakristu mbagen yô! Shi hen ase er yange ma lu Yehova ken ishima yô.

19-20. (a) Ka nyi se hila hene? (b) Ka akaa agen a nyi i gbe u se fa?

¹⁹ Kwaghôron u profeti u Bibilo la tese ér, kwagh u vesen ugen ngu u ica a kera gba ga tsô una er sha tar yô, ka myer u mbahemenev mba tar ne vea yôô “bem, man mkpeyol” la. Se wuese Yehova kpishi sha kwagh u a tese se ne. Se fa dedoo ser, mayange akuraior aa fatyô u van a bem u mimi ga. Kpa cii man kwagh u una er maa mtim una va ne a er yô, ka nyi i gbe u se ere? Yehova soo ér se uve ityough pasen loho u Tartor shi se za hemen u nôngon geman ior hingir mbahenen. Shi gba u se palegh kwaghaôndo u aiegh elegh elegh. Man kwagh la wa u duen ken Zegebabilon kera, shi vendan tom u u biishi a na kpaa.

²⁰ Akaa agen kpa nga a a va er ken mkur u “ayange a masejime” ne yô. Shi akaa agen kpa nga a Yehova a soo ér se er yô. Akaa shon yô ka nyi, man se wa iyol se keghen a kegh nyityôkwagh i ica a gba ga tsô ia er la nena? Ngeren u a dondo ne una ôr se.