Ngeren U Timen Sha Mi 38
“Va Nen Her a Mo, . . . Mo Me Na Ne Mmem”
“Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem.”—MAT. 11:28.
ICAM 17 “M Lumun”
KWAGH U I TIM SHA MI KEN NGEREN NE YÔ *
1. Er i nger ken Mateu 11:28-30 nahan, ka ityendezwa i nyi Yesu yange ere?
YESU yange er ityendezwa i doon tsung a ikpelaior igen i lu lamen a ve yô. A kaa ér: “Va nen her a Mo, . . . Mo Me na ne mmem.” (Ôr Mateu 11:28-30.) Yesu lu lamen lu ahumbe a iliam ga. Ikyav i tesen yô, hen ase sha kwagh u yange er a kwase ugen u gba icôronuange yô.
2. Ka nyi Yesu yange er a kwase ugen u lu uange?
2 Yange kwase la lu keren iwasen sha gbashima. Yange za hen mbatwerev kpishi, lu henen ér una zua a mpeveryol. Anyom kar 12 kpa lu yan ican her di tsô, or lu a bee un angev ga. Sha kwagh u Tindi tese yô, kwase ne lu wang ga. (Lev. 15:25) Maa a va ungwa ér Yesu una fatyô u been un angev, nahan a mough a gba keren un. Va zough a Yesu yô, a bende a mkaikyondo na, maa angev nav bee ave ave je! Kpa Yesu yange bee un angev tseegh ga, Yesu shi er kwagh a na sha icivir shi tese un ér a doo un ishima. U tesen ikyav yô, shighe u Yesu lu lamen a na la, a tese ér un na un icivir sha u yilan un ér “wankwase.” Sha mimi yô, kwagh ne yange una na a pever kwase la iyol!—Luka 8:43-48.
3. Ka mbampin mba nyi se na mlumun sha mi?
3 Umbur wer kwase la yange nôngo kwagh; a mough a za hen Yesu. Nyian ne kpa gba u se nôngo kwagh ve se ‘va hen’ Yesu ye. Hegen ne yô, Yesu una bee ior mba ve ‘ve hen’ a na la angev sha ivande ga. Nahan kpa, ngu lôhôn se her ér: “Va nen her a Mo, . . . Mo Me na ne mmem.” Ken ngeren ne, se na mlumun sha mbampin utaan: Se ‘va hen’ Yesu nena? Shighe u Yesu kaa ér: “Tôô nen igbur Yam sha ayol a en” la, lu kaan ér nyi? Ka nyi se fatyô u henen hen Yesu? Tom u Yesu a ne se la ka u nan se mmem nena? Man ka nyi se er ve se za hemen u zuan a mmem er se tee igbur i Yesu nee?
“VA NEN HER A MO”
4-5. Ka sha igbenda i nyi nahan se fatyô u van hen Yesu?
4 Gbenda môm u se fatyô u ‘van hen’ Yesu yô, ka sha u henen akaa a yange ôr shi er la er se fetyô cii. (Luka 1:1-4) Or môm nana fatyô u eren kwagh ne sha ci wase ga, saa se hen akaa ne iyol yase. Shi ka se ‘va hen’ Yesu sha u eren batisema shi hingir mbahenen mba Kristu.
5 Gbenda ugen u se ‘va hen’ Yesu yô, ka sha u zan hen mbatamen mba ken tiônnongo zum u kwagh a gbe se a iwasen yô. Yesu eren tom a “ior” mba ve lu “uiwua” ne u kuran iyôngo na. (Ef. 4:7, 8, 11; Yoh. 21:16; 1 Pet. 5:1-3) A gba u se nôngo kwagh sha u keren iwasen hen ve. Gba u se ver ishima ser mbatamen ve gba karen tsô za fan kwagh u a lu se ken ishima shin fan ér kwagh gba se a iwasen ga. Nenge ase kwagh u anmgbian ugen, mba yer iti na ér Julian. A kaa ér: “Yange va gba u me de tom u shin Betel sha ci u kwaghnyoon, nahan ijende yam igen kaa ér m ôr mbatamen ve va sôrom. Sha hiihii la, m nenge mer kwagh gbam a iwasen ne ga. Kpa m va pine ve iwasen ne, man mve u ve vam inya la gema lum iyua i injaa kpishi.” Mbatamen mba jighjigh er mba uhar mba yange ve va sôr Julian la nahan, ka ve wase se u kaven “mhen u Kristu,” inja na yô, ka u fan shi dondon gbenda u Kristu henen kwagh la kua er kwagh ka una er ve i lu un ken ishima la kpaa. (1 Kor. 2:16; 1 Pet. 2:21) Jighilii yô, kwagh ne ka môm ken uiyua mba hemban doon mba vea fatyô u nan se je ne.
“TÔÔ NEN IGBUR YAM SHA AYOL A EN”
6. Inja i kwagh u Yesu kaa ér: “Tôô nen igbur Yam sha ayol a en” la ér nyi?
6 Shighe u Yesu kaa ér: “Tôô nen igbur Yam sha ayol a en” la, alaghga soo u kaan jighilii ér “Lumun nen hemen wam.” Shin sha gbenda ugen yô, lu kaan ér “Va tôô nen igbur ne vea mo, se er nen Yehova tom imôngo.” A lu nyi Yesu lu ôron jighilii kpa, igbur la ka tom.
7. Er Mateu 28:18-20 a ôr nahan, ka tom u nyi i ne ser ér se ere, man se fatyô u lun a vangertiôr ser nyi?
7 Ka se lumun myer u Yesu la sha u tseghan iyol yase sha ci u Yehova shi eren batisema. Hanma or cii nana fatyô u lumun myer ne. Or môm u nan soo u civir Aôndo sha mimi ve Yesu una venda nan yô, nan ngu ga. (Yoh. 6:37, 38) Hanma or u nan dondon Kristu yô, i na nan ian i icivirigh i eren tom u Yehova a ne Yesu ér a er ne. Se fatyô u lun a vangertiôr ser, Yesu una wase se u eren tom ne sha hanma ian cii.—Ôr Mateu 28:18-20.
“HEN NEN KWAGH SHA IKYEV YAM”
Na mbagenev mmem, er Yesu kpa er nahan (Nenge ikyumhiange i sha 8-11) *
8-9. Er nan yange ior mba hiden a iyol ijime vaan hen Yesu, man ka mbampin mba nyi i doo u se pine ayol a ase?
8 Yange ior mba hiden a iyol ijime vaan hen Yesu. (Mat. 19:13, 14; Luka 7:37, 38) Sha ci u nyi? Nenge ase mkposo u lu hen atô na a Mbafarishi ne. Mbahemenev mba kwaghaôndo mban lu a dooshima ga, shi ve wa imanger. (Mat. 12:9-14) Kpa Yesu yô, ior doo un ishima shi hiden a iyol ijime. Mbafarishi keren ér i naan ve icivir shi i ungwan a ve, nahan aan a tom a ve la yange a doo ve ishima tsung. Kpa Yesu venda kwagh u or keren ér i fa nan la, gema tese mbahenen nav ér ve nengen ayol a ve er ka ikpan i gban ijime nahan. (Mat. 23:2, 6-11) Mbafarishi yange ve er tahav sha ior kpishi, sha ci u ior ve cian ér vea ungwa imo i Mbafarishi ga yô, kwagh a tser ve. (Yoh. 9:13, 22) Kpa Yesu yô, naan ior mmem sha u tesen ve dooshima shi lamen a ve kundu kundu.
9 U hen kwagh ken gbenda u Yesu eren kwagh la kpa? Pine iyol you wer: ‘Ior mba nengen mo ér m ngu ishima legh legh shi m hiden a iyol ijime kpa? Ka m kegh a kegh iyol u eren ityom i kiriki sha ci u mbagenev kpa? M eren a mbagen kundu kundu kpa?’
10. Yange i lu mba ve eren tom vea Yesu la nena?
10 Yesu yange a er kwagh u una na a doo mba ve eren tom a na imôngo la u van ikyua a na yô, shi yange i doo un u tsaase ve kpaa. (Luka 10:1, 19-21) Yange a wase mbahenen nav sha er vea pinen mbampin yô, shi a kegh ato u ungwan mnenge ve sha ma kwagh. (Mat. 16:13-16) Mbahenen mba Yesu yange ve hôm er kon u ka a nenge sha u tsembelee nahan. Yange ve ngohol akaa a Yesu tese ve la, nahan ve ume atam sha u eren ityom i dedoo.
Nôngo i de lun ior ican u van ikyua a we ga shi luun sar sar
De teman a tema ga shi lu a gbashima
Hiden a iyol ijime shi eren tom kpoghuloo *
11. Ka mbampin mba nyi nahan i doo u se pine ayol a ase?
11 U ngu sha ian i hemen mbageneve? Aluer ka nahan yô, pine iyol you wer: ‘M eren a mba hen ijiirtom yam shin mba se lu hen ya môm la nena? Ka m nôngo mer bem a lu kpa? M taver mbagen ishima u pinen mbampin kpa? Ka m kegh ato u ungwan mnenge ve sha ma kwagh kpa?’ Mbafarishi yange ve vihi ishima zum u or lumun a kwagh u ve ôr ga yô, shi or a pase mnenge u nan una kaha a u ve kpa, ve tôv nan a ican kpishi; mayange je se soo u lun er ve nahan ga.—Mar. 3:1-6; Yoh. 9:29-34.
“NÉ ZUA A MMEM”
12-14. Hii nan ve tom u Yesu a ne se la i lu u nan se mmeme?
12 Ka sea er tom u Yesu a ne se la yô, se zua a mmem sha ci u nyi? Atôakyaa nga kpishi, kpa nenge ase agen kpuaa.
13 Se mba a mbakuran mba hemban doon cii. Er Yehova a lu Uhemban Sha nahan kpa, wuese kwagh shi a vihi tu ga. Ka a wuese tom u se eren la. (Heb. 6:10) A na se tahav mbu tôôn ikyav shin eren tom u i ne se la. (2 Kor. 4:7; Gal. 6:5) Tor wase Yesu di hemen sha u veren se ikyav er i doo u se eren kwagh a mbagen yô. (Yoh. 13:15) Shi mbatamen mba ve kuran se la, ka ve nôngon sha er vea dondo Yesu u a lu “Orkuranilev u tamen” la yô. (Heb. 13:20; 1 Pet. 5:2) Ka ve nôngo kpoghuloo sha er vea eren kwagh kundu kundu shi vea taver mbagen ishima yô. Ka ve taver ishima sha u tesen shi kuran se.
14 Se mba a azende a hemban doon cii. Orgen môm nan ngu a azende a doonshima man tom u nan or mkom er se nahan ga. Hen ase sha kwagh ne: Se mba a ian i icivirigh i eren tom vea mba ve hembe lun a aeren a wang kpa ve gem ve nengen ér ve neer perapera ga yô. Mba a mfe kpishi kpa mba gem mba hiden a iyol ijime, shi mba nengen ér mbagen hemba ve. Mba nengen ér se mba di mba eren tom a ve imôngo tseegh tsô ga, kpa mba nengen ér se mba azende a ve. Man ikyaryan la ngi kangenaa je yô, ka ve kegh iyol u kpen sha ci wase je kpaa!
15. Doo u se nengen tom wase ne nena?
15 Se mba a tom u hemban cii. Se mba tesen ior mimi sha kwagh u Yehova, shi ka se saar aie mba satan mbara se haa sha tar. (Yoh. 8:44) Satan ngu nzughul a ior sha mbaaie mba ka ve na ior ve kera lu a ishimaverenkeghen ga yô. Ikyav i tesen yô, ka a soo ér se hen ser, mayange Yehova una de se a akaabo ase ga, shi se doo un ishima kpaa ga. Kwagh ne ka aie u a vihi kpishi shi ka a na iyol i kpe ior yô. Ka sea ‘va hen’ Kristu yô, i de se a asorabo ase. Shi mimi je, hanmô wase cii nan doo Yehova ishima tsung. (Rom. 8:32, 38, 39) Ka sea wase ior vea hen u suur sha Yehova shi sea nenge er ve gema eren kwagh ken uma ve sha inja nahan i saan se iyol je i zua ga!
ZA HEMEN U ZUAN A MMEM ER U TÔÔ IGBUR I YESU NE
16. Ikyav mbi Yesu a kaa ér se tôô la mbi inja kposo a nyityô uikya igen i i gbe u se tôô cii inja nena?
16 Igbur shin ikyav mbi Yesu a kaa ér se tôô la mbi kposo a nyityô uikya igen i i gbe u se tôô cii. Ikyav i tesen yô, mbagenev kpishi ka vea za kur yô, ve vôr kpishi shi ishima i doo ve ker ga. Kpa se yô, ka sea tôô shighe wase u eren Yehova kua Kristu tom yô, i saan se iyol kpishi. Alaghga a tume se iyol shighe u se kur tom yô, nahan a gba u se kighir iyol yase sha er se za mkombo u tiônnongo hen aikighe shon yô. Nahan kpa, ashighe kpishi ka sea za hiden mkombo la yô i saan se iyol, shi i hide i taver se iyol kpaa. Kape ka sea nôngo kpoghuloo ser se pase kwagh shi se hen Bibilo sha tseeneke kpa i lu je la. Injar i ka se zua a mi la ka i hemba agee mbu se tôô u eren akaa ne la ica je!
17. Ka nyi i gbe u se kav sha kwagh u mlu wase, man ka nyi i doo u se wa ikyo sha mi?
17 Gba u se fa ser, hanma wase yô, agee shin tahav mbu nan mbu a ikighir. Nahan gba u se wa ikyo sha akaa a se nôngon ser se er la. Ikyav i tesen yô, alaghga se yem vihin agee ase u kohol akaa a iyolough. Nenge ase kwagh u Yesu ôr a gumor ugen u lu ornyar ne. Gumor ne pine Yesu ér: “Me er nan man me zua a uma u tsôrono?” Gumor ne yange lu vanden kuran atindi kera. Ka keng, yange una lu or u injaa, sha ci u ivangeli i Marku kaa ér gumor ne yange ‘doo Yesu ishima.’ Nahan Yesu kaa a na ér: “Za tôô akaa a u lu a mi la cii, tee,” maa “va dondo sha a Mo.” Yange sar or ne u dondon sha Yesu, nahan kpa gema soo u undun “inyaregh kpishi” ki lu a mi la ga. (Mar. 10:17-22) Kwagh ne na yô, gumor ne venda u tôôn igbur i Yesu lôhô un ér a va tôô la, gema za hemen u eren “inyaregh” tom. (Mat. 6:24) Luun er ka we nahan ka nyi yange ma u tsua u erene?
18. Ka nyi i gbe u se tôôn shighe se erene, man ka sha ci u nyi?
18 Doo u se tôôn shighe se tôvon sha akaa a se lu veren hiihii ken uma wase la. Sha ci u nyi? Sha er se fa ér mimi je se mba eren tom a tahav shin agee ase sha inja yô. Nenge ase kwagh u gumor ugen ne, iti na ér Mark; a kaa ér: “Yange m hen mer, m eren akaa ken uma wam akuma akuma. M hen nahan anyom kar kpishi hegen. M lu eren pania, nahan kpa, hanma shighe yô, m shi henen sha kwagh u inyar man kwagh u me er ve me lu ken mkpeyol yô. Taver mo er hii ve mlu u uma wam lu taver kpishi la. Nahan m va mase kaven mer, m ngu keren mtsera wam hiihii, geman nan Yehova tahav man shighe wam u a mase neer her la.” Mark hide sôr mhen man gbenda u eren akaa ken uma la sha er hanma shighe cii yô, una luun a ian i eren Yehova tom yô. A kaa ér: “Ashighe agen ishima ka i nyian mo sha kwagh u inyar, kpa Yehova man Yesu ve wasem, nahan m hemba mtaver la.”
19. Er nan ve u nengen tom ne sha gbenda u injaa la i lu kwagh u hange hange yumu?
19 Aluer se er akaa a atar ne yô, se za hemen u zuan a mmem er se tôô igbur i Yesu ne. Hiihii yô, gbenda u u nengen tom ne la i lu u injaa. Se mba eren Yehova tom, nahan ka er a soo la i gbe u se er u ye. Se mba mbatomov, man Yehova gema ka Orvesen ken tom ne. (Luka 17:10) Aluer se mba nôngon ser se er un tom er se nenge i doo se cii yô, se lu nan iyol yase ican. Bua u a lu a agee kpishi je kpa, ka una zer nôngon ér una kpela igbur i i kange un la una yem a mi vegher u a soo cii, i de lu vegher u orvesen na a lu kôôm igbur shon ér a yem la ga yô, bua la ngu a vôr kpishi shi a ngôôr vihin iyol ga. Nahan kpa, aluer se gema se dondo gbenda u Yehova a lu tesen ér se er tom la yô, se er akaa a kpilighyol shi se hemba nyityô zayol u se tagher a mi cii. Umbur wer, or môm nan ngu u nana fatyô u yangen Yehova u kuren awashima na ga.—Rom. 8:31; 1 Yoh. 4:4.
20. Doo u awashima wase u tôôn igbur i Yesu la a lu u nyi?
20 Sha uhar yô, eren tom ne a awashima u injaa. Awashima wase yô, ka u Yehova Ter wase u se doo un ishima la a zua a iwuese. Sha ayange a Yesu la, hua mgbegha mbagen u keren mtsera ve, nahan ica gba ga je kera saan ve iyol ga shi ve shir igbur i Yesu i ve tôô la. (Yoh. 6:25-27, 51, 60, 66; Fil. 3:18, 19) Kpa ior mba Aôndo doo ve ishima shi mbawanndor a ve kpa doo ve ishima sha mimi la yô, ve tôô igbur la saan saan sha ayange a ve lu uma shin tar ne cii. Shi ve lu a ishimaveren u za eren tom imôngo vea Kristu sha. Se kpa, aluer awashima wase u tôôn igbur i Yesu la ka u injaa yô, a za hemen u saan se iyol er ve nahan.
21. Sha kwagh u Mateu 6:31-33 a er yô, ka nyi se fatyô u nan jighjigh ser Yehova una ere?
21 Sha utar yô, na jighjigh wer, Yehova una lu a we. Se na ayol a ase u eren hanma kwagh u i kaa ér se er cii kua tom u u taver kpishi je kpaa. Yesu yange ta se icin je ér a tôv se a ican. Kpa se na jighjigh ser, Yehova una na se agee a wan ishima a nyityô ican shin mtaver u se nyer ker cii. Er se lu wan ishima seer a seer la, kape se lu taver seer a seer je la. (Yak. 1: 2-4) Shi se fatyô u nan jighjigh ser, Yehova una na se hanma kwagh u kwagh a gbe se a mi cii, shi Yesu una kura se, shi anmgbianev mba nomso man mba kasev vea taver se ishima. (Ôr Mateu 6:31-33; Yoh. 10:14; 1 Tes. 5:11) Mimi yô, se mba a hanma kwagh u una wase se u wan ishima cii.
22. Ka nyi se fatyô u lun a iwuese sha mi?
22 Kwase u Yesu bee un angev la yange zua a mmem sha iyange la je. Nahan kpa, yange gba u una hingir orhenen u Kristu u mimi ve una zua a mmem u tsôron ye. U hen wer yange er nena? Aluer yange tsua u tôôn igbur i Yesu yô, nenge una zua a injar sha wono! Hegen una lu eren tom imôngo vea Yesu sha! Yange una undu nyi je sha er una dondo Kristu kpa, aluer i kar kwagh shon sha injar i una zua mi la yô, injar la ia hemba kwagh la ica je. Ishimaverenkeghen yase a lu i yemen sha shin va lun uma gbem sha won shin tar kpa, a doo se kpishi er yange se lumun mlehe u Yesu lôhô se ér: “Va nen her a Mo” la yô.
ICAM 13 Kristu Ver Se Ikyav
^ par. 5 Yesu lôhô se ér se va hen a na. Ka nyi i gbe u se er ve se lumun myer u Yesu a lu yilan se nee? Ngeren ne una na mlumun sha mpin la, shi una umbur se er se fatyô u zuan a mmem sha u eren tom imôngo vea Kristu yô.
