KA WEA soo u fan er shighe a lu nahan, ka u er nena? Alaghga ka u gema u kenger agogo. Aluer ijende you pine u er shighe a lu nahan, u ôr nan shighe nena? Igbenda ngi kposo kposo i ôron shighe. Nena yô?

Tôô ase wer shighe la ngu nahan: 1:30 atetan. Alaghga u kaa wer ihwa i môm kar miniti 30. Nahan kpa ka gbenda u i lamen ape u lu la ua tese er u ôr shighe ne ye. Ajiir agen yô, adooga a gba u u kaa wer ka ahwa 13:30. Ka mba ka ve ôr shighe i nyôr ahwa 24 je la. Sha ajiir agen di yô, a yila shighe la ér “tiôn u ahwa ahar,” inja na yô, shi miniti 30 ahwa ahar aa er.

Er u ôron Bibilo yô, alaghga u pine wer, ngise la ior ôron shighe sha ayange a i ngeren Bibilo la nena? Yange igbenda lu kpishi. Ruamabera u ken zwa Heberu la ôr kwagh ter shighe u “pepe” man “iyange sha tembe” kua “aikighe.” (Gen. 8:11; 19:27; 43:16; 1 Utor 18:26) Nahan kpa sha ashighe agen ka i ter shighe shon jighilii.

Sha ayange a i ngeren Bibilo la, yange i ver ior mba kuran gar, hemban cii je yô tugh. Cii man i va mar Yesu yô, Mbaiserael pav tugh ker avegher atar; ve yilan ashighe shin aaven a kuran tugh ne ér mbamkor. (Ps. 63:6) Mbaajiriv 7:19 ôr kwagh u “mkor u her atôutu.” Sha ayange a Yesu la, Mbayuda gema paven tugh ker er Mbagrika man Mbaroma kpa paven nahan. Yange ve pav tugh ker sha mbamkor shin ashighe a kuran tugh anyiin.

Ityakerada i Ivangeli la ter ashighe a kuran shin mbamkor mban acin imôngo. Ikyav i tesen yô, yange lu “er ahwa atar a utu nahan [ka mkor u utu u sha unyiin je la],” Yesu zende sha kwavmnger va ape mbahenen nav lu shin tso la ye. (Mat. 14:25) Yesu yange ôr ken injakwagh igen la ér: “Aluer orya una fe shighe [shin mkor u utu] u ormbaiv a ve yô, ma a kor, ma a kera rumun er i̱ va pev un iyou ga.”—Mat. 24:43.

Yesu yange kaa a mbahenen nav ér: “Kuran nen, gadia ne fa shighe u Orya Una va ga, shin a lu aikigheou, shin a lu atôghôto u utuou, shin a lu sha ikeghtôngonou, shin a lu pepeou.” Shighe u Yesu ôr mkaanem man la, lu ôron kwagh u mbamkor mba utuuv shin ashighe a kuran a anyiin la cii. (Mar. 13:35) Mkor u hiihii u lu ‘aikighe’ la yange a hii shighe u iyangemiren zan zan ahwa utaankarunyiin u utu nahan. Mkor u sha uhar u lu ‘atôutu’ la di a hii er ahwa utaankarunyiin u utu nahan zan zan atôutu. Mkor u sha utar u i lu ‘ikyeghtôngon’ la yange a hii atôutu zan zan ahwa atar a sha use. Alaghga lu hen shighe u mkor ne nomkyegh tôngo hen tugh mbu i kôr Yesu la ye. (Mar. 14:72) Iaven i utu i sha unyiin i i lu mkor u ‘pepe pepe’ la di yange i hii ahwa atar a sha use zan zan sev puaa.

Er ior mba sha ayange a i ngeren Bibilo la lu a agogo ga nahan kpa, ve lu a gbenda u ôron shighe atetan shin shighe u tugh mbu il kpaa.