NGEREN U TIMEN SHA MI 36
ICAM 89 Ungwa Imo i Ter, A̱ Ver U
“Hingir Nen Mba Eren sha Mkaanem Mara”
“Hingir nen mba eren sha mkaanem mara, de lu nen mbaungwan tseegh . . . ga.”—YAK. 1:22.
KWAGH U SE LU HENEN YÔ
Ngeren ne una wase se u seer lun a isharen i ôron Mkaanem ma Aôndo hanma iyange shi henen sha mi shi dondon kwagh u se hen la kpaa.
1-2. Saan mbacivir Aôndo iyol sha ci u nyi? (Yakobu 1:22-25)
YEHOVA man Wan na u ishima ishima la soo ér i saan se iyol. Or u a nger Pasalmi 119:2 la kaa ér: “Mba i saan ve iyol yô, ka mba ve we mbampase Nav ikyo, ve keren Un a ishima ve cii la.” Yesu kpa yange va ôr ér: “Saan mba ve ungwan mkaanem ma Aôndo shi ve eren sha mi la iyol!”—Luka 11:28.
2 Er se lu ior mba civir Yehova yô, saan se iyol. Sha ci u nyi? Se mba a atôakaa kpishi a a ne ve i saan se iyol yô, kpa ityôkyaa i hemban cii yô, ka sha ci u se mba ôron Mkaanem ma Aôndo hanma shighe shi se mba eren sha kwagh u se hen la.—Ôr Yakobu 1:22-25.
3. Ka sea eren sha kwagh u se hen ken Mkaanem ma Aôndo la yô, kwagh la a wase se nena?
3 Ka sea “hingir . . . mba eren sha mkaanem mara” yô, se zua a mbamtsera kpishi. Sha ci u se fa ser aluer se mba eren nahan yô, ka kwagh u vesen je se lu eren u civir Yehova ye. Ka sea fa nahan yô, kwagh la a na i saan se iyol. (Orpa. 12:13) Shi ka sea eren sha kwagh u se lu henen ken Mkaanem ma Aôndo la yô, se seer lun vea mba hen tsombor wase man mba ken tiônnongo kangenaa. Man alaghga we kpa kape kwagh wou a lu je la. Heela tseegh ga, ka se kera nyôr ken mbamzeyol mba ior mba ve venda u ungwan imo i Yehova ka ve nyôr ker la ga. Sha nahan yô, se lumun a kwagh u Tor Davidi yange ôr shighe u wa icam ter atindi man uiniezwa kua ajir a ôron a Yehova ve mase kaan ér: “U wan a ikyo yô, ka zegeinjar” la.—Ps. 19:7-11.
4. Er nan ve ka i taver se u dondon kwagh u se ôr ken Mkaanem ma Aôndo laa?
4 Jighilii yô, ka hanma shighe i lun se zange u eren kwagh u se ôr ken Mkaanem ma Aôndo la ga, sha ci u ka se lu a akaa a eren kpishi. Nahan kpa, gba u se ver shighe u ôron shi henen Bibilo sha er se fa akaa a Yehova a soo ér se er la yô. De se time sha akaa agen a aa wase se u ôron i hanma shighe yô. Shi se time sha igbenda igen i ia wase se u henen sha kwagh u se ôr ken Bibilo la, shi nengen er se dondo kwagh shon ken uma wase la kpaa.
VER SHIGHE U ÔRON MKAANEM MA AÔNDO
5. Ka akaa a nyi nahan ka a na ve se lu a akaa kpishi a erene?
5 Ior mba Yehova kpishi mba a ityom gbing i ve eren yô. Ka se tôô shighe kpishi u eren akaa a Ruamabera a kaa ér nga hange hange la. Ikyav i tesen yô, se kpishi se mba eren tom sha er se nenge sha iyol yase kua icombor yase yô. (1 Tim. 5:8) Mbakristu mbagen kpishi mba nengen sha ior vev mba ve gbe angev shin ve bee iyol yô. Shi se cii ka i gba u se nenge sha iyol yase sha er se lu gbang gbang yô, man kwagh ne ka a tôô shighe. Heela tseegh ga, ka se lu a ityom ken tiônnongo i eren. Man kwagh u vesen ugen u i gbe u se er yô, ka u pasen loho u dedoo sha gbashima. Er u lu a ityom kpishi nahan kpa, u er nan ve u zua a shighe u ôron Bibilo hanma shighe shi henen sha kwagh u u ôr la shi dondon unu?
6. U er nan ve u ôron Bibilo hanma shighe? (Shi nenge foto kpaa.)
6 Bibilo i ôron ngi môm ken “akaa a a hembe lun a inja” a i gbe u se Mbakristu se eren yô, nahan gba u se nôngo tsung se ôron i. (Fil. 1:10) Pasalmi ityough ki hiihii kira ôr kwagh u or u i saan nan iyol yô, kaa ér: “Atindi a TER ka kwagh u gban nan ishima, shi ka atindi a Na nan zeren henen a ken ishima tugh kua tetan kpaa ye.” (Ps. 1:1, 2) Kwagh ne tese wang ér gba u se ver shighe u ôron Bibilo. Ka hanma shighe nahan i hembe doon u ôron Bibilo? Hanma wase nana fatyô u tsuan shighe u una hemba doon nan u ôron Bibilo yô. Kpa tsua shighe u a lu u ican ga u ôron Bibilo hanma shighe yô. Anmgbian ugen iti na ér Victor, a kaa ér: “Ka i hemba doon mo u ôron Bibilo pepe. Er m soon u nderen pepe pepe ga nahan kpa, ka m nder pepe m ôr Bibilo sha ci u akaa nga lun a danen mo kpishi ga. Ka m hemba lun tsevaa shi veren ishima sha kwagh u m lu ôron la.” We kpa alaghga kape ka i lu u je la. Nahan pine iyol you wer, ‘Ka hanma shighe nahan a hemba doon mo u ôron Bibilo?’
Ka hanma shighe nahan i hembe doon u ôron Bibilo? Ka shighe u han nahan u nenge wer u fatyô u ôron Bibilo hanma shighe? (Nenge ikyumhiange i sha 6)
HEN SHA KWAGH U U ÔR LA
7-8. Ka nyi alaghga ia yange se u zuan a iwasen kpishi ken kwagh u se ôr laa? Tese ikyav.
7 Kwagh ugen yô, alaghga se ôr takeda kpishi nahan se kera fatyô u henen sha kwagh u se ôr la ga. I lu nahan u ôr takeda ica gba ga maa kwagh u u ôr la hungur we vee? Se kpishi kwagh ne ka a er se. We kpa kwagh ne una fatyô u eren we shighe u u ôr Bibilo yô. Alaghga u tsua mtom ma Bibilo ma u ôron hanma iyange yô. Aluer ka nahan yô, u er doo. Gba u se tsua akaa a se soo u eren yô, shi se eren a kpaa. (1 Kor. 9:26) Er u ôron Bibilo i lu kwagh u dedoo nahan kpa, ngula tseegh kuma ga. Aluer se soo ser Mkaanem ma Aôndo ma wase se yô, a gba u se er kwagh a hemba di u ôron ma la.
8 De se tese ikyav nahan: Ka i gba u ura ua nôô ve a kpe akaauma cii iyol ye. Kpa aluer ura nôô hen icin i môm kpishi yô, alaghga mngerem ma a ngee shin inya a gande. Kwagh ka una luun nahan man ura a seer nôôn yô, i kera kpe akaauma iyol ga. Kpa ura ka ua nôôn akuma akuma yô, u nyôr shin inya vough, nahan u wase imendenev u vesen. Se kpa gba u se palegh u ôron Bibilo ayem ayem. Se ôron i sha gbenda u se fatyô u henen sha mi shi umbur akaa a se ôr la, nahan dondon a yô.—Yak. 1:24.
Er ura ka u nôô shighe a kar cii ve mngerem ma nyôr shin inya nahan, se kpa gba u se tôô shighe se hen sha kwagh u se ôr ken Mkaanem ma Aôndo la cii ve, se fatyô u dondon un ye (Nenge ikyumhiange i sha 8)
9. Aluer se nenge ser se mba ôron Bibilo ayem ayem yô, ka nyi i gbe u se ere?
9 U nenge wer ashighe agen ka u ôr Bibilo ayem ayemee? Aluer ka nahan yô, ka nyi i gbe u u ere? Ôron Bibilo kure kure sha er u hen sha kwagh u u lu ôron la yô, shin wea ôr i yô tamber, hen sha kwagh u u ôr la. Kwagh ne ka kwagh u taver ga. U fatyô u seer shighe wou u ôron Bibilo la sha er u zua a shighe u henen sha kwagh u u ôr la yô. Shin u fatyô u tsuan avur a Bibilo kpuaa tseegh ôron, nahan tôôn shighe henen sha mi. Victor u se vande ôron kwagh na la kaa ér: “Ka m ôr Bibilo kpuaa, shighe ugen je yô, i lu ityough i môm tseegh. Er m ôron Bibilo pepe yô, kwagh la ka a na m za hemen u henen sha kwagh shon ken iyange la cii.” U fatyô u tsuan er u ôr Bibilo yô, kpa gba hange hange u u ôron i kure kure sha er u hemba zuan a iwasen ken kwagh shon yô.—Ps. 119:97; nenge ngeren u kiriki u a lu a itinekwagh ér “ Mbampin mba Henen sha Mi” la.
10. Tese ikyav er u fatyô u dondon akaa a u lu henen la yô. (1 Mbatesalonika 5:17, 18)
10 Wea ôr Bibilo yô, hen sha igbenda i u fatyô u dondon kwagh u u ôr la yô. Shighe u u ôr ma kwagh ken Bibilo yô, pine iyol you wer, ‘Me dondo kwagh u m ôr ne hegen shin ken hemen nena?’ Ikyav i tesen yô, tôô wer u ngu ôron takeda u 1 Mbatesalonika 5:17, 18. (Ôr.) U ôron avur a Bibilo a ahar ne u been yô tamber, hide hen sha ikwa i u eren msen la man er ka u er msen shon yô. Shi u fatyô u henen sha akaa a u lu a iwuese sha mi yô. U fatyô u tsuan wer u sugh Yehova sha akaa atar. Aluer u tôô miniti kpuaa tseegh u hen sha kwagh u u ôr ken Bibilo la kpa, kwagh la una wase u u kaven Mkaanem ma Aôndo shi eren kwagh u ma kaa la kpaa. Hen ase er aluer u ngu eren kwagh ne hanma iyange ve una wase u hanma kwa u u lu ôron Bibilo yô! U hingir or u eren kwagh u Mkaanem ma Aôndo ma ôr yô. Kpa aluer u nenge wer akaa nga kpishi a i gbe u u nyôôso ken uma wou yô, u er nena?
TSUA AKAA A U ER LA AKUMA AKUMA
11. Ka nyi ia na ve alaghga u nenge wer akaa a i gbe u u nyôôso ken uma wou la ngee gande u-we? Tese ikyav.
11 Ashighe agen u ôr Bibilo yô, iyol a kpe u sha ci u u nenge wer akaa nga kpishi a i gbe u u sôr ken uma wou yô. Hen ase sha kwagh ne: Alaghga iyange igen u ôr Bibilo, nahan i ôr hen ijiir la ér doo u sangen a sange ior ga. (Yak. 2:1-8) Nahan u nenge wer doo u u nyôôso gbenda u u eren kwagh a ior la, maa u gema inja. U er nahan doo! Kpernan shi u ôron Bibilo yô, avur la tese er i gbe u u kôron zwa wou tsaha yô. (Yak. 3:1-12) Maa shi u kav er ashighe agen ka u ôr kwagh a or dang shin u ôr akaa a nan nan iyolkpen yô. Nahan u tsua wer u ôron kwagh u una taver a taver or ishima yô, a lu u nan nan iyolkpen ga. Shi iyange igen u er Bibilo yô, i ôr er i gbe u se palegh u yan ijende a tar ne yô. (Yak. 4:4-12) Maa u nenge wer gba u u wa ikyo sha akaa a u ôron shin u nengen shin u ungwan la. Alaghga iyange i sha unyiin la u nenge wer akaa a i gbe u u nyôôso ken uma wou la ngee u gande.
12. Aluer u ôr Bibilo man u nenge wer gba u u nyôôso akaa ken uma wou yô, doo u iyol ia kpe u ga sha ci u nyi? (Shi nenge ngeren u shin kpe kpaa.)
12 Aluer u nenge wer gba u u nyôôso akaa kpishi ken uma wou kpa iyol i de kpen we ga. Er u nenge wer gba u nyôôso akaa ken uma wou yô tese je ér u ngu or u hiden a iyol ijime shi u ngu a ishima i dedoo. Or u nan hiden a iyol i nan ijime ka nana ôr Mkaanem ma Aôndo yô, nan er sha kwagh u ma kaa la. a Umbur wer u ‘haan or u he iyol’ la ka kwagh u i gbe u se za hemen u eren yô. (Kol. 3:10) Ka nyi ia wase u ve u za hemen u lun or u eren kwagh u Mkaanem ma Aôndo ma kaa laa?
13. Ka gbenda u nyi u hembe doon u u kar ve u er sha kwagh u Bibilo i ôr laa? (Shi nenge foto kpaa.)
13 De sendegh wer u er akaa a i gbe u u nyôôso la cii kwa môm ga, kpa hii u eren a kure kure. (Anz. 11:2) U fatyô u eren kwagh ne: Nger akaa a i gbe u u nyôôso ken uma wou la, maa tsua kwagh môm shin akaa ahar nahan, hii u eren. U been yô, u mase eren agen la. Ka kwagh u han ken akaa a u tsough la u nenge wer doo u u hii erene?
De sendegh wer u er akaa a i gbe u u nyôôso la cii kwa môm ga, kpa hii u eren a kure kure. U fatyô u tsuan kwagh môm shin uhar nahan veren ishima sha mi eren (Nenge ikyumhiange i sha 13-14)
14. Ka akaa a nyi nahan u fatyô u hiin erene?
14 U fatyô u hiin sha kwagh u una taver we u eren ga yô. Shin u fatyô u tsuan wer u hii eren kwagh u u nenge wer hemba ngun hange hange la. U tsuan kwagh u u soo wer u er la yô, tôv sha mi ken ityakeda yase, er Watch Tower Publications Index shin Takerada u Tôvon sha Kwagh ú Mbashiada mba Yehova la nahan. Er msen sha kwagh ne, sôn Yehova a na u “isharen kua tahav mbu eren kwagh” shon. (Fil. 2:13) Maa nôngo er kwagh u u hen la. Aluer u nôngo u er kwagh u u tsough la yô, alaghga a hemba maan we iyol u eren kwagh ugen kpaa. Jighilii yô, aluer u nenge er u nyôôso ieren you i zua sha mlu u Orkristu yô, kwagh la una taver we ishima u seer nyôôso aeren a ou agen shi a hemba lun we ican ga u eren nahan kpaa.
DE MKAANEM MA AÔNDO MA ‘ER TOM KEN A WE’
15. Er nan ve ior mba Yehova ve lu kposo a ior mba ve senge ér mba er Bibilo laa? (1 Mbatesalonika 2:13)
15 Ior mbagenev senge ér ve ôr Bibilo jimin cii kwa imôngo. Kpa mimi je, ve na Bibilo jighjigh? Mba den ér kwagh u ve ôr ken Bibilo la a gema uma vee? Kwagh er vihi yô, mba eren nahan ga. Kpa ior mba Yehova yô, kwagh ve ngu nahan ga! Se lumun er Mbakristu mba sha ayange a mbaapostoli la nahan ser, Bibilo “ka mkaanem ma Aôndo, man kape i lu vough je la.” Heela tseegh ga, ka se nôngo kpoghuloo u eren kwagh u Mkaanem ma Aôndo ma kaa la.—Ôr 1 Mbatesalonika 2:13.
16. Ka nyi ia wase se u hingir mba eren sha Mkaanem ma Aôndo?
16 Ka hanma shighe i lun se zange u ôron shi eren kwagh u Mkaanem ma Aôndo ma kaa la ga. Alaghga a taver se u zuan a shighe u ôron Bibilo. Shin alaghga se ôr i ayem ayem nahan se fatyô u kaven kwagh u i ôr la ga. Gayô alaghga se nenge ser akaa a i gbe u se nyôôso la ngee gande se, nahan iyol a kpe se. Aluer ka mtaver u nyi je u tagher a mi kpa, u fatyô u hemban un sha iwasen i Yehova. Nahan se za nen hemen u lumun iwasen na, sha er se hingir mba eren sha Mkaanem mara, a lu mbaungwan a ungwa tseegh ga yô. Aluer se mba ôron Mkaanem ma Aôndo shi eren sha mi yô, a saan se iyol kpishi je ka u henen a hen ga.—Yak. 1:25.
ICAM 94 Sugh Aôndo sha Mkaanem Nam
a Za sha jw.org/tiv za nenge vidio i i lu a itinekwagh ér Kwagh u Mbakwav Wou Ve Ôr Yô—Bibilo i Ôron la.
